42
Ikiavɨra Itir Godɨn ingangarir gumazimɨn mɨgɨrɨgɨaba
1 Aisaia 43:10; Matyu 3:17; 17:5; Mak 1:11; Luk 3:22; 9:35; Jon 3:34; Efesus 1:6 Matyu 12:18-21Ikiavɨra Itir God ghaze:
Ia gan! Kar nan ingangarir gumazim, kɨ uabɨ anemɨsefe,
egha kɨ bar a gifuegha, a bagha bar akonge.
Egha uan Duam isa a gatɨ.
Eghtɨ a nguazir kamɨn kantribar gumazamiziba guizɨn arazimɨn gɨn mangɨsɨ me tuisɨgham.
2 A mɨkɨmamin dughiamɨn, a pamten akam akarigh mɨkɨman kogham.
A tuavibar tuiv aghurighvɨra pamten mɨkɨman kogham.
3 Ighurunim gavgaviba puvatɨgha dɨpɨrasava amim, a bar anepɨrighan kogham,
egh lamɨn pamtem isir puvatɨzim, a anemungeghan kogham.
Egh a kamaghɨra, gavgaviba puvatɨzir gumazamizibar asughasugh deravɨra me damuam.
A kamaghɨra damu mangɨ, guizɨn arazim damightɨ a ikɨ gavgavigham.
4 Eghtɨ osɨmtɨzitam a dɨkabɨraghan kogham.
A pamten ingar mangɨva, dughiar a guizɨn arazimɨn gɨn mangɨ gumazamiziba tuisɨghamim otogham.
Egh an otogh gavgavigh nguazir kam bar an ikiam.
Ezɨ saghon itir arighatɨzibar gumazamiziba,
me arazir God uarir sure damuamibav mɨzua iti.
5 Aposel 17:24-25Ikiavɨra Itir God, an overiamɨn ingarigha a isa inimɨn mɨn an onegha anetɨ.
Egha nguazir kamɨn ingarigha, an itir biziba bar dar ingarigha dagh amizɨ, da otivigha aghui.
Egha angamɨra ikiamin amɨnim ko gavgavim isa nguazir kamɨn gumazamizibagh anɨngi.
Godɨn kamra, uan ingangarir gumazim mɨgɨa ghaze,
6 Aisaia 49:6; Luk 2:32; Aposel 13:47; 26:23“Kɨ Ikiavɨra Itir God, nɨ nan arazir aghuimɨn bizibar amuasa kɨ nɨn dia.
Egh nɨn agharimɨn suiragh, deragh nɨ geghuv nɨn ganam.
Egh nɨ bangɨn, kɨ Akar Dɨkɨrɨzir Gavgavim nguazir kamɨn gumazamiziba ko a damuam.
Egh nɨ damutɨ, nɨ kantribar gumazamiziba, bar men angazangarimɨn mɨn ikiam.
7 Aisaia 61:1; Luk 4:18; Hibru 2:14-15Nɨ ingangarir kam damuam:
Nɨ damazir okavɨrɨzibar amutɨ, me ua ganam.
Egh kalabusɨn itir gumazamizir danganir mɨtarmemɨn apiaghav itiba,
nɨ me damightɨ me fɨrighɨregham.
8 Aisaia 48:11“Kɨrara, kɨ Ikiavɨra Itir God, kar nan ziam.
Ezɨ kɨ uabɨra, ia nan ziar ekiamra fɨ.
Ia gumaziba ingarizir marvir guatamɨn ziam fan bar markɨ.
9 Ia ganigh! Bizir kɨ fomɨra otivasa mɨkemeziba,
da datɨrɨghɨn otivigha gɨfa.
Kɨ bizir igharazir tɨghar otivamibar gun ia mɨkɨmam.
Eghtɨ ia dagh foghvɨra ikɨtɨ, da gɨn otivam.”
Gumazamiziba bar, Ikiavɨra Itir Godɨn ziamra fɨ
10 Ia nguazir kamɨn itir gumazamiziba bar,
ia ighiar igiam bangɨ, Ikiavɨra Itir Godɨn ziam fɨ!
Ia gumazir kuribagh aruiba ko ongarimɨn osiriba, ia an ziam fɨ.
Ia saghon itir arighatɨzibar gumazamiziba, ia ighiar igiaba bangɨ.
11 Ia dakɨghtɨzir danganimɨn itir nguibabar gumazamiziba ko, Kedarian adarasi,
ia tiariba akar an ziam fɨ.
Ia Selan nguibamɨn gumazamiziba,
ia mɨghsɨabar mavanegh dɨm mɨkɨm bar akongegh.
12 Ia gumazamizir roghɨra itiba, ziar ekiam Ikiavɨra Itir God danɨng.
Ia saghon itir arighatɨzibar gumazamiziba,
ia bar moghɨra an ziam fɨ.
13 Ikiavɨra Itir God mati, mɨdorozir gumazir gavgavim, egha a datɨrɨghɨn mɨsoghasa zui.
A tiarim akara diava mati, gumaziba mɨdorozim foreghasa mɨsoghamin arazibagh amua, mɨsoghasa gara iti.
Egha a gavgavim ikia, uan apaniba ko mɨsoghasa atiatir puvatɨgha,
bar me abɨni.
14 Ikiavɨra Itir God ghaze,
“Kɨ dughiar ruarimɨn uabɨn asugha aghumra ikia, bizitam gamizir puvatɨ.
Datɨrɨghɨn, kɨ amizim navim asegha otasa mɨzazim isa arai moghɨn, kɨ pamten diava arai.
Egha bar avɨghaghegha, nan akam ko nan atinim pamten amɨnim gekua aven ghua azenan izi.
15 Kɨ mɨghsɨaba bar dagh asɨghasigh,
egh temeba ko grazibar amightɨ, da mɨsigham.
Egh kɨ faner ekiaba ko dɨpar akarebar amightɨ,
da bar dakegham.
16 Onger Akaba 18:28; Aisaia 40:31; Matyu 3:3; Mak 1:3; Luk 3:5; Jon 1:23Kɨ uan gumazamiziba inigh tuavir me fomɨrama aruizir puvatɨzimɨn me atɨghtɨ, me an mangam.
Me datɨrɨghɨn mati damaziba okavigha amɨnirbɨrimɨn iti.
Eghtɨ kɨ amɨnirbɨrim me dam anedegh, angazangarim me danɨngam.
Tuavir fɨghtɨzir kurar me fomɨram aruiziba, kɨ da akozeghtɨ,
me tuavir voroghɨra ireghav itibar aruam.
Kɨ guizbangɨra, me gɨn amadaghan kogham.
Bizir kɨ damuasa mɨkemezir kaba, kɨ tam ateghan kogham.
Kɨ guizɨn dar amightɨ, da otivam.
17 Gumazamiziba marvir guabar ziaba fa nɨghnɨzir gavgavim dar ikia ghaze,
da men guizɨn godba.
Ezɨ kɨ bar gumazamizir kaba batuegh me damutɨ,
me bar aghumsigh uan nɨghnɨzibagh iragham.”
Israelia, gumazamizir damazir okavɨrɨziba ko kuarir onganibar mɨn iti
18 Ikiavɨra Itir God ghaze:
“O Israelia, ian damaziba pɨrizɨ, ian kuariba bar ongani.
Ia uan damaziba kuigh ganɨva, egh kuariba arigh oragh!
19 Ia nan ingangarir gumazamiziba, kɨ ua bagha ia amɨsefe,
eghtɨ ia na baghvɨra ikɨ, nan abuir gumazibar mɨn ikɨ
nan akam inigh mangam.
Egha ia gumazir damazir okavɨrɨziba ko, kuarir onganibar mɨn iti,
egha bar damazir ikuviziba ko kuarir onganiba, bar me gafira.* Vezɨn kam, Hibrun akam an mɨngarim deragha bigha an gun mɨkemezir puvatɨ.
20 Bizir bar avɨriba, ia dar ganigha dar akaba baraki.
Egha bizir kaba, ia deragha dar gari puvatɨ,
egha deragha kuariba arigha, akar kam baraghizir puvatɨ.”
21 Ikiavɨra Itir God, arazir aghuibaram ami.
Kamaghɨn amizɨ, a uan Akar Gavgaviba isa ia ganɨngi.
Eghtɨ gumazamizir igharaziba dar ganigh kamaghɨn fogh suam,
Akar Gavgavir kaba, bar deragha bar pɨn iti.
22 O Israelia, ia datɨrɨghɨn bar paza iti.
Apaniba ia gasɨghasɨgha ian biziba okemegha da inigha ghue.
Me uaghan pamtem ian suigha ia inigha
ghua kalabuziar dɨpeniba ko toribar aven ia arɨki.
Ia mati pura bizir kɨniba, apaniba ia okemegha ia inigha ghue,
ezɨ ian akurvagh ua ia iniamin gumaziba puvatɨ.
23 Ezɨ datɨrɨghɨn ikegh mangɨ,
ian te deragh kuariba arigh nan akam baragham?
24 Tinara mɨkemezɨ, apaniba iza, e Jekopɨn anabamɨn gumazamizibagh asɨghasɨki?
E Israelia, tinara e isa en apanibar agharim gatɨzɨ, me izegha en biziba okeme?
Ikiavɨra Itir God uabɨ arazir kam gami.
E akɨrim ragha Ikiavɨra Itir God gasaragha arazir kurabagh amua,
an Akar Gavgaviba batogha, a ifongezɨ moghɨn zuir puvatɨ.
Kamaghɨn amizɨ, a uabɨ bizir kam gamizɨ, an oto.
25 A en apanibar amamangatɨzɨ, me iza e ko mɨsosi.
Ezɨ tuavir kamɨn, a uan anɨngagharim isa e Israelia, e gingezɨ, an e avara.
An anɨngagharim avimɨn mɨn bar en isi.
E arazir kamɨn gara, egha deragha fozir puvatɨgha,
bizitam gamir puvatɨ.
42:1: Aisaia 43:10; Matyu 3:17; 17:5; Mak 1:11; Luk 3:22; 9:35; Jon 3:34; Efesus 1:6
42:1: Matyu 12:18-21
42:5: Aposel 17:24-25
42:6: Aisaia 49:6; Luk 2:32; Aposel 13:47; 26:23
42:7: Aisaia 61:1; Luk 4:18; Hibru 2:14-15
42:8: Aisaia 48:11
42:16: Onger Akaba 18:28; Aisaia 40:31; Matyu 3:3; Mak 1:3; Luk 3:5; Jon 1:23
*42:19: Vezɨn kam, Hibrun akam an mɨngarim deragha bigha an gun mɨkemezir puvatɨ.