18
Ikiavɨra Itir God en akurvazima, e uan apaniba abɨri
(2 Samuel 22:1-51)
Devit a Ikiavɨra Itir Godɨn ingangarir gumazim, an onger akar kabar faragha zuir gumazim gɨnɨghnɨgha onger akam osiri.
Dughiar kam Ikiavɨra Itir God, Devitɨn apanim Sol ko apanir igharaziba da uam a ini. Ezɨ a bizir kam gɨnɨghnɨgha Ikiavɨra Itir God bagha onger akar kam gami.
1 2 Samuel 22:47-50O Ikiavɨra Itir God, nɨ gavgavim na ganɨdi,
ezɨ kɨ nɨ bagha bar ifonge.
2 Hibru 2:13Ikiavɨra Itir God, a nan dɨvazir bar gavgavim mɨn iti.
A nan dagɨar kɨ aven uabɨ modimɨn mɨn ikia,
nan akuragha nan apaniba da ua na ini.
Nan God, a dagɨar ekiamɨn mɨn iti,
ezɨ kɨ uan apanibar ara ghua an modi.
A nan oramɨn mɨn ikia na avara,
ezɨ kɨ an uabɨ modi.
A nan akuragh nan ganamin gavgavim ikia,
egha nan dɨvazir bar gavgavimɨn mɨn iti.
3 E Ikiavɨra Itir Godɨn ziam feka!
Kɨ an deima a nan akurazɨma,
apaniba na gasɨghasɨghizir puvatɨ.
Ovevem benir gavgavimɨn mɨn na ikiagharigha gɨfa,
Mati ongarim dɨkava dɨpɨraghira, na avasava ami.
5 Ovevem bar na inizɨ kɨ Gumazamizir Oveaghuezibar Nguibamɨn magɨrasava ami.
Mati me nan suighasa azuazim agurazɨ, a nan suighasa iti.
6 Kɨ osɨmtɨzir ekiamɨn ikia egha pamten Ikiavɨra Itir Godɨn dei.
Kɨ uabɨn akurvaghasa uan Godɨn arai.
Ezɨ a uan Dɨpenimɨn ikia nan ararem barazima,
an an kuarir torim giraghu.
7 Kamaghɨn amizɨ, a nan apanibar atari.
Egha mɨkɨmkɨzim gamizɨ an otogha,
mɨghsɨabagh inobaghnobasi.
8 Mɨgharim Ikiavɨra Itir Godɨn atinimɨn otivaghiri,
ezɨ avim an akamɨn otivaghira bizir avɨribar isi.
Egha mɨzariaba ira tintinibar zui.
9 God overiam kuigha izaghiri,
ezɨ mɨgharir pɨziba an dagarimningɨn apengan iti.
10 Onger Akaba 104:3Mati a enselɨn bar gavgavim gaperazɨ, an a inigha izi.
Mati amɨnim avɨzimning ikia,
God inigha bar atamra izi.
11 An amɨnirbɨrim gamizɨ an anevara.
Mati a purirpenimɨn aven modoghav itima,
amozimɨn mɨturir pɨziba anevara.
12 A ghuariar pɨzibagh amizɨ, angazangarim bar da avarazɨ,
onɨmarim ko amozir ofɨzir ekiar dagɨabar mɨn gariba,
ghuariar pɨzir kam abɨgha azenim giri.
13 Ikiavɨra Itir God uan Nguibamɨn ikia
tiarim akara pamten dagarvasi.
Godɨn Bar Pɨn Itim uan akam akarizɨ,
an akaba mati onɨmarim ko amozir ofɨzir ekiar dagɨabar mɨn gariba daghira izaghiri.
14 An onɨmaribagh amizɨ, da mati an barir aviba,
an apanibagh asavamadi, ezɨ me tintinibar ara zui.
15 O Ikiavɨra Itir God, nɨ men atarir adarir kam,
mati amɨnir ekiam nɨn atinimɨn otogha me gɨva me munamadi.
Nɨn adarir kam ongarim gamizɨ, a bar mɨsɨngi,
ezɨ bizir nguazir mɨngarimɨn suiraziba bar azenim gire.
16 Ikiavɨra Itir God pɨn ikia uan agharim amadazɨ,
a izaghira nan suiragha na gekui.
An ongarir bar konimɨn uam na inigha azenim gatɨ.
17 Dughiar kamɨn nan apaniba bar gavgavigha na abɨnasava ami.
Ezɨ Ikiavɨra Itir God men dafaribar ua na ini.
18 Kɨ dughiar kuramɨn itima nan apaniba iza na ko mɨsosi.
Ezɨ Ikiavɨra Itir God na geghuva nan gari.
19 Onger Akaba 31:8; 118:5A deravɨra nan gara nan akurazɨ, kɨ danganir aghuimɨn ikia deravɨra iti.
A bar guizbangɨra na gifonge, egha kamaghɨn a ua na ini.
20 1 Samuel 24:19Kɨ arazir aghuimɨn gɨn zui.
Ezɨ bizir kam bagha Ikiavɨra Itir God bizir bar aghuir avɨribar na gami.
Kɨ Godɨn damazimɨn zue,
ezɨ a ivezir aghuim isa na ganɨdi.
21 Ikiavɨra Itir God, a nan God.
Kɨ akɨrim ragha a gasarazir puvatɨ.
Kɨ guizbangɨra an Akar Gavgavibar gɨn zui.
22 Kɨ zurara bizir a damuasa e mɨkemezibagh nɨghnɨsi.
Egha kɨ arazir a ifongeziba batoghezir puvatɨ.
23 A fo, kɨ an damazimɨn osɨmtɨziba puvatɨ.
Kɨ guizbangɨra arazir kurabar uabɨra uabɨ geghuva ua bagha gari.
24 1 Samuel 26:23Kɨ Ikiavɨra Itir Godɨn damazimɨn zuegha iti.
Kamaghɨn a nan arazir aghuir kamɨn ganigha,
a ikaragha arazir aghuimɨn na gami.
25 Onger Akaba 25:10; 31:23; 37:28; 40:11; 89:24Ikiavɨra Itir God, gumazir nɨ ataghɨrazir puvatɨzim,
nɨ uaghan an ataghɨrazir puvatɨ.
Gumazir nɨn damazimɨn derazim,
nɨ uaghan arazir aghuim an akakasi.
26 Gumazir nɨn damazimɨn zuezir arazibagh amim,
nɨ uaghan uan arazir zuezibar an akakasi.
Eghtɨ gumazir arazir kuramɨn gɨn zuim,
nɨ uaghan arazir kuramɨn a ikarvasi.
27 Onger Akaba 101:5; Aghuzir Akaba 6:17Gumazamizir uari abɨriba, nɨ men akurvasi.
Gumazamizir uari pɨrafiba, nɨ me abɨri.
28 Jop 29:3O Ikiavɨra Itir God, nɨ nan God, nɨ angazangarim na ganɨdi.
Egha na da mɨtarmem batosi.
29 Kɨ nɨn gavgavimɨn uan apanibav sogham.
Kɨ uan Godɨn akurvazimɨn, apanibar dɨvazim ikiavkɨnigh me abɨragham.
30 Onger Akaba 17:7; 119:140; Daniel 4:37Godra, an araziba da guizbangɨra egha bar aghungi.
A bizitam damusɨ akam akɨrigh, egh an a damuam.
An oramɨn mɨn iti,
eghtɨ gumazitam a bagh izɨ an aven modogh nɨghnɨzir gavgavim an ikɨ, gumazir kam deraghvɨra ikiam.
31 Godɨn Araziba 32:31; 32:39; 1 Samuel 2:2; Aisaia 45:5Ikiavɨra Itir God, a bar guizbangɨra God.
A bar uabɨra dagɨar ekiamɨn mɨn ikia e apasa.
32 Godra nan daroribar na akumakui,
egha gavgavim na ganɨga deragha nan garima,
kɨ zui.
33 Godɨn Araziba 32:13; 2 Samuel 2:18; Habakuk 3:19A nan suemning gamizɨ, kɨ asɨzir atiabar mɨn,
mɨghsɨabar pɨn mar deravɨram arui.
34 A mɨdorozir arazibar nan sure gamizɨ,
nan agharimning barir pir me ainɨn ingarizim, gekuamin gavgavim iti.
35 O God, nɨ uan oram na ganɨngizɨ, kɨ an gɨrakɨrangɨn modozɨ, nɨ nan apanibar dafaribar ua na ini.
Nɨ uan gavgavimɨn nan akura.
Nɨ nan dɨmdiam baregha nan akurazɨ,
kɨ gumazamizibar damazimɨn ziar ekiam iti.
36 Aghuzir Akaba 4:12Nɨ bar tuavir aghuim na ganɨngizɨ kɨ an ghua,
apɨghsigha irɨzir puvatɨ.
37 Kɨ uan apanibar agɨntɨghavɨra ikia ghua,
men suiragha me gasɨghasɨgha bar me agɨfa.
38 Kɨ me gasezɨ me kuabara ira,
nan dagarimningɨn apengara ira ua dɨkavasava amuava avenge.
39 Nɨrara mɨdorozim damuasa gavgavim na ganɨngi,
ezɨ kɨ me mɨsogha me abɨrazɨ,
me nan dagarimningɨn apengan iti.
40 Nɨ nan apanibagh amizɨ,
me akɨribagh ighegha na gasegha uam are.
Gumazir na gifongezir puvatɨziba,
kɨ bar me gasɨghasɨki.
41 Gumazir kaba uarir akurvaghasa diava arai,
ezɨ men akurvaghamin gumaziba puvatɨ.
Me Ikiavɨra Itir Godɨn diava arai,
ezɨ a men dɨmdiaba barazir puvatɨ.
42 Kɨ bar me gasɨghasɨghizɨ,
me mati amɨnim nguazir mɨnemeniam giveragha ghu.
Kɨ me dɨkabɨra me abɨni,
mati kɨ tuavimɨn nguazir beghneaziba dɨka zui.
43 Nɨ gumazir na gasɨghasɨzibar dafarimɨn uam nan akura.
Nɨ na gamizɨ, kɨ Kantrin Igharazibar Gumazamizibar dapanimɨn oto.
Gumazamizir kɨ fozir puvatɨziba,
nɨ men kantriba na ganɨngizɨ, kɨ dagh ativagha dar gari.
44 Kantrin Igharazibar Gumazamiziba kamaghɨn na baregha zuamɨra iza,
nan guamɨn uan teviba apɨrigha nan akam barasi.
45 Men gavgaviba bar gɨvazɨ,
me nɨrɨzim ko agorogem sara na bagha izi.
46 Ikiavɨra Itir God, a zurara ikia mamaghɨra iti.
A dagɨar ekiamɨn mɨn na modozɨ kɨ an apazangɨn itima a na geghufi,
kamaghɨn amizɨ, kɨ ziar ekiam a danɨngam.
God nan akurvazimɨn ikia ua na inizɨ,
kamaghɨn, kɨ an ziam fam.
47 Onger Akaba 94:1Nan apaniba na gamizir arazir kuraba, Godra ua da ikarvasi.
A Kantrin Igharazibar Gumazamiziba isa nan apengan me atɨ.
48 A nan apaniba da ua na ini.
Bar guizbangɨra, Ikiavɨra Itir God,
nɨ nan apanibar damazibar ziar ekiam na ganɨngi.
Nɨ nan akurazɨ,
mɨdorozir gumaziba na mɨsoghezɨ kɨ aremezir puvatɨ.
49 Rom 15:9Kamaghɨn amizɨ, Ikiavɨra Itir God,
kɨ Kantrin Igharazibar Gumazamizibar tongɨn ikɨ nɨn ziam fɨ,
onger akar nɨn ziam feba bangam.
50 Kɨ Devit, Ikiavɨra Itir God atrivimɨn ikiasa na ginabagha na amɨsefe.
A nan akurvazima, kɨ uan apanibav sogha me abɨri.
A zurara nan apangkuva mamaghɨra iti.
Nan gɨn otivamin ovavir boriba,
a kamaghɨra me damu mangɨvɨra ikiam.
18:1: 2 Samuel 22:47-50
18:2: Hibru 2:13
18:4: Onger Akaba 116:3
18:4: Jona 2:5-7
18:10: Onger Akaba 104:3
18:19: Onger Akaba 31:8; 118:5
18:20: 1 Samuel 24:19
18:24: 1 Samuel 26:23
18:25: Onger Akaba 25:10; 31:23; 37:28; 40:11; 89:24
18:27: Onger Akaba 101:5; Aghuzir Akaba 6:17
18:28: Jop 29:3
18:30: Onger Akaba 17:7; 119:140; Daniel 4:37
18:31: Godɨn Araziba 32:31; 32:39; 1 Samuel 2:2; Aisaia 45:5
18:33: Godɨn Araziba 32:13; 2 Samuel 2:18; Habakuk 3:19
18:36: Aghuzir Akaba 4:12
18:47: Onger Akaba 94:1
18:49: Rom 15:9