36
Gumazir kurabar arazir kuraba
Ikiavɨra Itir Godɨn ingangarir gumazim Devit, an onger akar kam osiri.
An onger akabar faragha zuir gumazim gɨnɨghnɨgha onger akar kam osiri.
1 Rom 3:18Arazir kuram, a gumazir kuramɨn navir averiamɨn ikia nɨghnɨziba a ganɨdi.
Gumazir kabanang, me tong Godɨn atiatia an apengan itir puvatɨ.
Bar puvatɨ.
Me bar akɨrim ragha God gasara.
2 Guizbangɨra, me uari uan ziabagh nɨghnɨgha uari uan ziaba fe.
Me kamaghɨn fozir puvatɨ,
God me isɨ kot darɨgh egh me amizir arazir kuraba tuisɨgham.
3 Men akatoribar akaba ikuvizɨ, me zurara bizibagh ifari.
Egha arazir aghuibara amuamin fofozir aghuitam itir puvatɨ.
4 Me uan mɨsiabagh irav ikia arazir kurabara damuasa nɨghnɨsi.
Me zurara tuavir kuramɨn nɨghnɨzibar gɨn mangasavɨra nɨghnɨsi.
Egha tong akɨrim ragha arazir kuratam gasarazir puvatɨ.
Godɨn arazir aghuim
5 Onger Akaba 57:10; 108:4O Ikiavɨra Itir God, nɨn apangkuvim bar ekevegha
uanaga overiamɨn suira.
Ezɨ nɨ zurara guizɨn arazimɨn gɨn ghua uan nɨghnɨzim gɨghavkɨrir puvatɨ,
ezɨ nɨn arazir kam uaghan bar ekevegha uanaga,
overiamɨn itir ghuariabar suira.
6 Nɨn arazir aghuim bar ekevegha mɨghsɨar ekiabar mɨn tughav iti.
Nɨn kotɨn aven itir arazimɨn mɨngarim, e deragha a gɨfozir puvatɨ.
An ongarimɨn mɨn bar konegha vɨn mar iraghu.
O Ikiavɨra Itir God, nɨ gumazamiziba ko asɨziba vɨrara deravɨra me geghuva
men gari.
7 Rut 2:12; Onger Akaba 17:8; 31:19; 91:4O God, nɨn apangkuvir arazim bar derazɨ e bar a gifonge.
Gumazamiziba bar ghua nɨn aven modi.
Mati tuarir nguziba uan amebamɨn avɨzimningɨn apengan ghua modi.
8 Jop 20:17; Onger Akaba 16:11; Akar Mogomem 22:1Nɨn Dɨpenimɨn dagher avɨriba itima,
nɨn gumazamiziba apa izɨvagha mamaghɨra iti.
Mati nɨ uan faner aghuimɨn gumazamizibar amamangatɨzɨ, me anepi moghɨn,
nɨ bizir aghuir bar avɨriba e ganɨdi.
9 Jeremaia 2:13; Jon 4:10; 4:14; 1 Pita 2:9Biziba bar, nɨ dar ikɨrɨmɨrimɨn mɨngarim,
mati dɨpar ikɨrɨmɨrir aghuim anɨdim.
Kamaghɨn, nɨn angazangarimɨn amodoghɨn,
e deravɨra bizibar gari.
10 Gumazamizir nɨ gɨfoziba, nɨ men apangkuvigh kamaghɨra ikɨ.
Gumazamizir nɨn damazimɨn deraziba, nɨ deragh me damu.
11 Nɨ gumazir uari fava akaba batoziba ateghtɨ,
me na dɨkabɨnan markɨ.
Egh gumazir arazir kurabagh amiba ateghtɨ,
me nan agɨraghtɨ kɨ aran kogham.
12 Ia gan.
Gumazir arazir kurabagh amiba daghiregha nguazimɨn fueghav iti.
Me ua dɨkavan kogham.