44
Apaniba paza Israelia gamima, me uarir akurvaghasa Godɨn azangsɨsi
Kar Koran adarazir onger akam.
A gumazir onger akar kamɨn faragha zuim gɨnɨghnɨgha an osiri.
Me onger akar kam kamagh a dɨbori, Maskil.
1 Ua Me Ini 12:26-27; Onger Akaba 78:3O God, e uan kuarir toribar orazi,
en inazir afeziaba bizir ekiar nɨ men dughiamɨn fomɨra me bagha amizibar e geghani.
2 Onger Akaba 78:55; 80:8Nɨ uabɨ uan gavgavimɨn ikɨzir igharazibar gumazamizibar nguazimɨn me batuegha,
uan gumazamiziba isa nguazir kamɨn me arɨghizɨ me gavgavigha iti.
Nɨ ivezir kuram isa Kantrin Igharazibar Gumazamizibagh anɨngi.
Egha en inazir afeziabagh amizɨ, me deravɨra ikia borir bar avɨriba bate.
3 Godɨn Araziba 8:17; Josua 24:12En inazir afeziaba uan mɨdorozir sababar mɨdorozim gamua nguazir kam inizir puvatɨ.
Me uan agharibar mɨsogha uan gavgavibar apaniba abɨrazir pu.
Bar puvatɨ.
Nɨ uabɨ me gifongegha me ko itima, nɨn angazangarimɨn gavgavim me gisirazɨ,
me nɨn gavgavimra, uan apaniba abɨni.
4 Nɨ nan atrivim ko nan God.
Nɨ Akar Gavgavim anɨngizɨma, Jekopɨn adarazi uan apanibav sogha me abɨri.
5 E nɨn gavgavimɨn amodoghɨn
e uan apanibav sogha me abɨra.
6 Onger Akaba 33:16; Hosea 1:7Kɨ nɨghnɨzir gavgavim uan barir pim ko baribar itir puvatɨ.
Da nan akuraghtɨ kɨ uan apaniba abɨraghan kogham.
7 Nɨrara en akurazɨ
en apaniba e mɨsogha e abɨrazir puvatɨ.
En aghuazir gumaziba, nɨ me abɨrazɨ
me aghumsɨgha okam nɨghnɨsi.
8 O God, nɨrara e nɨn ziam fɨ,
egh nɨ mɨnabɨ mamaghɨra ikiam.
(Ighiam gamua an suiam
atugha avughsegha ua
ighiam gami.)
atugha avughsegha ua
ighiam gami.)
9 Nɨ datɨrɨghɨn manmaghsua akɨrim ragha e gasara?
Kamaghɨn en apaniba uam e abɨrima, e aghumsɨsi.
En mɨdorozir gumaziba mɨsoghasa zuima,
nɨ ua me ko zuir puvatɨ.
10 Nɨ kamaghɨn e gamizɨ, e uan apanibar atiatigha are.
Ezɨ en apaniba uari bagha bar en biziba ini.
11 Nɨ e ataghizɨ, e sipsipɨn me mɨsueghtɨ aremeghamibar mɨn iti.
Nɨ en nguazimɨn e batuegha e amangizɨ, e tintinibar ghua
Kantrin Igharazibar Gumazamizibar tongɨn pura iti.
12 Nɨ uan gumazamiziba isa gumazir igharaziba pura ingangarir gumazir kɨnibar ikiasa me amangizɨ,
gumazir kaba dagɨar ekiatamɨn me givezezir puvatɨ.
13 Nɨ kamaghɨn e gamizɨ, en boroghɨn itir darasi,
dɨbovir akabar e mɨgɨa en ingaravati.
14 Bizir nɨ e gamizir kamɨn eghaghanim otozɨ,
Kantrin Igharazibar Gumazamiziba a baregha
dapaniba roa aghumsɨzir akabar e mɨgɨa en ingaravati.
15-16 Kɨ zurara orazima, gumaziba dɨbovir akabar na mɨgɨa aghumsɨzim na ganɨga
bar akar kurabar na mɨgei.
Kɨ uaghan zurara garima, apaniba ko gumazir ivezir kuram na danɨngasava amiba
mɨzazim na gasi.
Kamaghɨn amizɨ kɨ zurara aghumsɨzir bar dafam isima a bar nan avara.
17 O God, en nɨghnɨzimɨn, e nɨ ataghizir puvatɨ.
Nɨn Akar Dɨkɨrɨzir Gavgavim, e anebɨghizir puvatɨ.
Ezɨ bizir kurar kaba e batifi.
18 Jop 23:11E akɨrim ragha nɨ gasarazir puvatɨ,
egha nɨn tuavim ataghizir puvatɨ.
19 Onger Akaba 23:4Nɨ guizbangɨra e abɨra, mati nɨ asɨzir atiaba itir danganimɨn e ataghizɨ,
e akurvaziba puvatɨgha uarira iti.
Nɨ mɨtarmer bar ekiamɨn e avarazɨ e an aven iti.
20-21 Onger Akaba 139:1; Jeremaia 17:10O en God, e nɨn ziam fan koghɨva,
godɨn ifavaribar ziaba fɨtɨ nɨ fogham.
Nɨ guizbangɨra gumazibar navir averiabar itir nɨghnɨzir mogomeba,
nɨ bar dagh fogha gɨfa.
22 Rom 8:36E nɨn gɨn zui, ezɨ bizir kam bangɨn me zurara e mɨsozima e ariaghirasava ami.
Me kamaghɨn nɨghnɨgha ghaze, e mati sipsipɨn gumaziba mɨsueghtɨ aremeghasavɨrama amibar mɨn,
me e mɨsoghasa.
23 Onger Akaba 35:23; 78:65O Ekiam, nɨ manmaghɨn amigha akuavɨra iti?
Nɨ osegh dɨkafigh.
Nɨ akɨrim ragh e gasaraghvɨra ikian markɨ.
24 Nɨ manmaghsua uan guam bar en modo?
Egha apaniba pazavɨra e gamir araziba ko mɨzazir e isir kabar garir puvatɨ?
Nɨ en osɨmtɨzim bakɨnɨghnɨghan markɨ!
25 E nguazim gisɨn daghirezɨ,
en mɨkarziba mati gumaziba ariaghiregha
nguazim gireghav iti.
26 O God, nɨ uan apangkuvir arazim gɨnɨghnɨgh
dɨkavigh izɨ en akuragh,
egh uam e inightɨ e arɨmɨghiran kogham.