109
Gumazir osɨmtɨzim itimɨn dɨmdiam
Godɨn ziam fer onger akar kam, Devit an osiri.
A gumazir onger akabar faragha zuim gɨnɨghnɨgha an osiri.
1 O God, kɨ nɨn ziam a pɨrafa.
Nɨ nɨmɨra ikian markɨ.
2 Gumazamizir kuraba ko gumazamizir ifavariba na gasɨghasɨghasa.
Me nan gara ifara akar kurabar na mɨgɨa
nan apanim gami.
3 Me na ekɨarugha nan aghuazir akabar na mɨgei.
Guizbangɨra, me mɨgeir mɨgɨrɨgɨaba, mɨngariba puvatɨ.
4 Kɨ me gifuegha me bagha God ko mɨgei.
Ezɨ me nan atara akaba na gasi.
5 Kɨ arazir aghuibar me gami,
ezɨ me arazir kuraba nan arazir aghuiba ikarvasi.
Kɨ bar me gifonge,
ezɨ me kɨ me gifongezir arazir kam ikarvagha na gifongezir puvatɨgha bar nan aghua.
6 Kɨ ghaze, nɨ jasɨn kuratam a mɨseveghtɨ,
a nan apanim kotiamɨn a baragh egh a tuisɨgh.
An apanitamrama,
an kotiam baragh.
7 Jasɨn kotiam barazir kam oraghtɨ, mɨgɨrɨgɨaba mangɨtɨ,
a mɨkɨm suam, gumazir kam guizbangɨra arazir kuram gami,
a isɨ kalabus datɨgh.
Nan apanim, God ko mɨkɨmtɨ,
jasɨn kurar kam an akar kam gɨfogh egh mɨkɨm suam,
a God ko mɨgeir arazir kam, an arazir kuram.
8 Aposel 1:20Nan ifongiam, a bar zuamɨram aremegh,
eghtɨ gumazir igharazitam an danganim inigh.
9 An aremeghtɨ an boriba afeziaba puvatɨghtɨ,
an amuim uaghan paba puvatɨgham.
10 An boriba dɨpeniba puvatɨgh egh onganarazibar amu ikiasa kɨ ifonge.
Eghtɨ gumaziba me itir dɨpenir kuramɨn me batuegham.
11 Nan apanir kam gumazitabar bizitaba inigh egh da ikaraghan koghtɨ,
kɨ kamaghsua, me izɨ uan biziba ikarvagh an nguazim inigh.
Eghtɨ nguibar igharazibar gumaziba izɨ
bizir a ingangarim gamua ivezeziba bar ada da inigham.
12 Kɨ kamaghsua, gumazitam bar an apangkuvan markɨ.
Gumazitam kamaghɨn an boribagh nɨghnigh suam,
me afeziaba puvatɨ egh men apangkuvan markɨ.
13 Kɨ kamaghsua, an ovavir boriba uaghan bar arɨmɨghiregham,
eghtɨ gɨn otivamin adarazi ua gumazir kamɨn ziam gɨnɨghnɨgh a dɨponan kogham.
14 An inazir afeziaba amizir arazir kuraba, Ikiavɨra Itir God uabɨ adagh nɨghnɨgh.
Egh an amebamɨn arazir kuraba gɨn amangan markɨ.
15 Ikiavɨra Itir God me amizir arazir kurar kam gɨnɨghnɨghvɨra ikɨ,
eghtɨ gumazamiziba gumazir kamɨn adarazi nɨghnɨzitam ua men ikian bar markɨ.
16 Gumazir kam tong apangkuvir nɨghnɨzitam igharaz darazir itir puvatɨ.
A gumazir biziba oteveziba ko, biziba puvatɨziba ko, naviba osemegha itiba,
a paza me gamua ghua me mɨsozi me ariaghire.
17 A faragha gumazamizibagh asɨghasɨghasa ifuegha akar kurabar me mɨgei,
egh a datɨrɨghɨn uabɨ bar moghɨra ikufigh!
A God deragh gumazamizir igharazibar amuasa a me bagha Godɨn azangsɨghan aghua,
eghtɨ uaghan gumazitam God deragh a damusɨ an a bagh Godɨn azangsɨghan markɨ.
18 Dughiabar a mɨgeir mɨgɨrɨgɨaba,
a gumazir igharazibagh asɨghasɨghasa mɨgei,
ezɨ an mɨgɨrɨgɨar kam mati an adiarir a uan mɨkarzimɨn kurkezim.
Kamaghɨn dera, an akar kurar kam dɨpar an apimɨn mɨn an namnamɨn aven ikɨ.
Egh boremɨn mɨn an agharibar aven magɨrɨ.
19 An akar kurar kam, a korotiam aruzɨ moghɨn anevaragh,
egh letiamɨn mɨn uan ivariam gighuigh ikɨ kamaghɨra ikɨ.
20 Ikiavɨra Itir God mɨzazir kamra gumazir na isa kot garɨzibar arɨghasa, kɨ ifonge.
Guizbangɨra, gumazir kaba akar bar kuraba na mɨgei.
21 O Ikiavɨra Itir God, nan Ekiam, nɨ uan ziar ekiam bangɨn, nɨ Akar Gavgavim akɨrizɨ moghɨn nɨ nan akuragh.
Nɨ bar deragha egha zurara nan apangkufi,
kamaghɨn nɨ nan akuragh.
22 Kɨ biziba bar puvatɨgha purama aperaghav ikia,
uan navir averiamɨn aven mɨzazir kuram barasi.
23 Aruem anaga bizibagh isirazɨ dar nedaziba ghua guaratɨghɨn gevi moghɨn,
kɨ mangɨgh gɨvaghasa ami.
Amɨnim odezibagh ivai da mɨgha ghua gevi moghɨn,
kɨ uaghan dar mɨn mɨghegh mangɨgh gɨvagham.
24 Kɨ dagheba ategha egha nan tevir akuriba gavgaviba puvatɨ.
Kɨ bar agharim gurazɨ, agharir suiaba bar nan amɨra.
25 Matyu 27:39; Mak 15:29Gumazamiziba nan gara egha na dɨpofi,
egha me uan dapaniba roa egha nan ingaravati.
26 O Ikiavɨra Itir God, nan God,
nɨ zurara bar nan apangkufi.
Kamaghɨn, nɨ nan akuragh egh uam na inigh.
27 Nɨ nan apaniba kamagh men akaghtɨ, me fogh suam,
nɨrara nan akuragha egha uam nan ini.
28 Me, nɨ na gasɨghasɨghsɨ me nɨ mɨkɨmam.
Eghtɨ puvatɨgham. Nɨ deravɨra na damuvɨra ikiam.
Gumazir na gasɨghasɨghasava amiba
nɨ me abɨnasa kɨ ifonge.
Eghtɨ, kɨ nɨn ingangarir gumazim,
nan navim nan deragham.
29 Nan apaniba aghumsɨzir dafam iniasa, kɨ ifonge,
eghtɨ gumazamiziba men aghumsɨzir arazir kam bar an ganam.
30 Gumazamiziba Godɨn ziam fasa uari akuvir dughiabar,
kɨ an ziam fam.
Egh akar ekiamɨn Ikiavɨra Itir God mɨnamam.
31 Guizbangɨra, apaniba gumazamizir onganaraziba isɨ kot datɨgh kamagh mɨkɨm suam, me arɨmɨghiram.
Ezɨ, God gumazamizir onganarazibar gara men akurvasi.