1 Taitta Dios aumɨza kwisha pashinamtu akwa, usne aumɨza Diospa pashpa namninnarɨt. Watcha, Diospa pashparuz makpas. Katmizna au sukin uzturuzne, Diosta pianchiruzne, aumɨza pianchi, Diosta piankamarachi akwa. 2 Na uruza pashinamtu akwa, u Diosta piantuz mɨrain. Aune Diospa pashpakanain makpas. Kwiztane aune miza Dios aumɨza maizarɨnsa pianchimakpas. Jesucristo akane, aune uskanain iztɨt namarɨnapas. Suasne aune ussa wat izanapas. 3 Jesucristokanain namna tɨrizamturuzne kwail kishiamtuchi. Uspane uspa kwail kiarɨt aizpa sɨnam kulna Diosta paikuamtu, Jesucristo sɨnam uztakanain uzanapa.

4 Wan awaruzne kwail kiamɨz kit Dios ɨnintu aizpa mɨamtuchi. 5 Uruzne Jesucristo au sukin ara pianmai, au kwail kirɨt aizpa sɨnam sananapa. Usne chinkas kwail kitchi. 6 Wan Jesucristora mɨmturuzne kwail kiamtuchi. Wan kwail kimturuzne Jesucristora nɨjkulamtuchi. Ussa piankamarachi. 7 Ap pashpakanain mɨza. Mɨnainkas uruza pɨrailkanain kizmumikara mɨman, kwail kiamanpa. Wat kimɨztumikane wat awa i. Usne Jesucristo wat kimtukanain kimtu. 8 Kwail kimɨzturuzne Diablokasa chamtu. Diablone an ñancha kwail kitmika azi. Kwail kimɨzta. Dios Painkulne au sukin kihshta, wan Diablowa kal, wan kimtu aizpa kawal kiana.

9 Diospa pashparuzne kwail kiamɨztuchi, Dios usparuza uzninnamtu akwa. Usne kwail kishimɨztuchi, Dios ussa paiña kwal namninta akwa. 10 Sunkana aune Diosta piantuzakas Diablokasa chamtuzakas pianmakpas. Wat kimtuchimikakas, paiña aimpihshta pashimtuchimikakas Diospa kwal chi mai.

11 Uruzne an pitmin an ñancha ka mɨarɨt. Nɨjkulturuza pashinarawamakpas. 12 Caín uztakanain uzman. Caín Diablokasa cha akwa, usne paiña aimpihshta piantara. ¿Chikishma ussa piantara? Usne paiña aimpihshta piantara, Diablowa kal kimtu akwa. Paiña aimpihshne Diospa wat kal kimɨzta.

13 Diosta piantuz mɨrain. Au sukistuz ukasa pilchapuzkane, nɨjkulat kit ishkuman. 14 An ñancha uztuasmin, aune miza uzna piankamarachimakpas. Irɨt awakanain uztamakpas, Diosta piankamarachin. Mane aune miza uzna pianmakpas, Diosta pianturuza pashinamtu akwa. Mamaztuza pashimtuchimikane irɨt awakanain uzmɨztu. 15 Wan mamaztuza aliz pilchapuztumikane mamazta piantatmikana namtɨmtu. Mamazta piantaramikane pailta payukima uzmanazi. Sunkana uruzne pianmai. 16 Cristo au akwa irɨt. Sunkana usne aumɨza anara, miza mamaztuza pashinana. Sunkanain aune Diosta piantuza kiarawamakpas, inakima. 17 Kwazpamikane wan mɨj. Kwazpamika, Diosta pianmika we mɨjmikara iztane, us we mɨj aizpa mɨlamtukine, us we kumtu aizpa kwintukine, kwazpamikane “Diosta pashimtus” kaizsachi. 18 Ap pashparuz, mɨrain. Aune pitparain mamaztuza pashinasachimakpas. Mamazpa akwa wat kal kimtune, aune mamaztuza watcha pashinamakpas.

19 Au mamaztuza pashinamtune, aune Dios watcha pit pianmakpas. Suasne aune Dios iztakin nilmin uzpuspas, ishkwatchin. 20 Au kwail kiarɨt aizpa minñarane, Diosne, aukinkas anza katsamikane, aumɨza kiwainanazi, au minñamtu aizpa kwail kiamanpa. Usne au pian aizpakas anza wan pian. 21 Na pashimturuz, mɨrain. Kwail kirɨt aizpa ayukta nukkultukine, aune Diosta paikwashimakpas, ishkwatchin. 22 Aune Diosta wan paikumtu aizpa sappiznapas, an us ɨnintu aizpa mɨamtu akwa, au us pashimtu aizpa kiamtu akwa. 23 Diosne sunkana aumɨza ɨninnara, paiña painkulta, Jesucristora nɨjkulanapa. Uskas aumɨza ɨninnara, mamaz nɨjkulturuza pashinanapa. 24 Dios ɨnintu aizpa mɨmturuzne Dioskasa chaamtu. Uskas aukasa cha. Sunkana Diosne aukasa chamtu pianmakpas, paiña Sɨnam Izpul aukasa uznapa ɨninta akwa.