1 Sun kitpane, Jesúsne Galilea suwara chara. Judea sukin ɨshitchi, sua Judío awa ɨnintuz ussa piantashiamtu akwa. 2 Judío awawa katsa pishta kasha pamɨzta. Sun pishtara Judío awane ainki ɨranchu saat kit sua uzara. 3 Paiña aimpihshtuzne ussa kaizara:

—Apain nukkulmun. Judea sura ɨtpa, nuwa kanpamtuz up kal kimtu aizpa izanapa. 4 Nu kimtu aizpa puinmun, akkwan awa nu kimtu aizpa piankamanapa. Nune kwisha watsal kal kimtu. Katmizna sun kitpa, wan awa up kal izanapa.

5 Paiña aimpihshtuzne us watsat mɨlmumika i nɨjkularachi. 6 Jesúsne kaiznara:

—Ma payu nane Jerusalén pɨpulura chamanash. Uruzne chiwazha urara ɨashinai. 7 Ma uztuzne uruza aliz kulamanazi. Uspane nawa aliz kulamtu, na usparuza kwail kiamtu kiznamtu akwa. Katmizna uspane nawa pashiamtuchi. 8 Une pishtara ɨrain. Nane ɨmtuchish, na ap wat ɨmtu payu taiztachi akwa.

9 Usparuza sun kiznarawane, Galilea sura nukkulta.

10 Paiña aimpihshtuz ɨarawane, Jesúskas izpachin pishtara ɨzi. 11 Judío awa ɨninturuzne ussa pishtara sayat kit kaizara:

—¿Sun ampune mɨntama tusa?

12 Awa usparuzpain us akwa kwisha kwinta kiara. Mɨnpazha ka kizara: “An ampune wat amit.” Mamaztuzne ka kizara: “Usne watchi. Usne awaruza kain kinamtu.”

13 Sunkana mɨnminkas Jesúspa tɨnta pararachi, Judío awa ɨninturuzpa ishkuamtu akwa.

14 Pishta kakwa pamtɨkane, Jesúsne katsa Dios yalkin nap kit awaruza kamtanamɨzta. 15 Judío awane iztaspaat kit kaizara:

—An ampune ¿Mizamaka wan piani, pɨnkɨh kamtachine?

16 Jesúsne sɨnkanara:

—Ap kamtamne apchi. Nawa ɨnintamikane na kamtamtu aizpa nawa chɨhkara. 17 Dios pashimtu aizpa kitmikane ap kamtampa piankamnazi. Dios nawa kamtamtu akwa, une Diospa piankamanazi. Na mintu aizpa kamtamtuchi. 18 Usminpain paramtumikane sunkana kimtu, awa ussa wari paraanapa. Kal kimtumikane paiña kal kitpa, awa ussa ɨninmumikasha wari kizanapa. Sun ampune watcha i. Mizurainkas pɨrail kaiztuchi. 19 Moisésne uruza ɨninnara, paiña ɨnintu aizpa kianapa. Une us kaiznara aizpa kiamtuchi. ¿Chitma une nawa piantashimuspas?

20 Awane sɨnkaara:

—Salizne nua pizta. ¿Mɨnma nua piantashimtui?

21 Jesúsne sɨnkanat kit kaiznara:

—Na maza iztasparɨt kal kwaizkultu payura kit akwa, une sunpa iztaspaarɨt. 22 Sunkana Moisésne uruza ampu pashpawa aya tɨtnapa, circuncisión kitpa, ɨninnara. (Moisés sun ɨninnarachikas, u kwalne an ñamin sun kinanapa ɨninnara.) Katmizna une kwaizkulmu payurakas ampu pashpawa aya tɨttamtu. Ankas kal i. 23 Une ampu pashpawa aya tɨttamtu, Moisés kaizta aizpa kianapa. Une kwaizkulmu payura sun kiamtu. Na maza ampura kwaizkulmu payura kakulnintune, une ¿chitma nakasa aliz kulamtu? 24 U awa kiamtu aizpa izamtuasmin, usparuza “kwail kiarɨt” kizman. U awa kiamtu aizpa izakane, une uspawa watcha kainarawa.

25 Suasne mɨnpazha Jerusalén pɨpulura uztuzne usparuzpain mɨmamɨzta:

—¿Awane an ampura piantana sayamtuki? 26 Mane usne wan iztakin paranamtu. Mɨnminkas chinkas kizamtuchi. ¿Judío ɨnintuzne an ampu Dios nɨrɨtmika i nɨjkulamtuki? 27 Aune an ampu mɨntas amtu pianmakpas. Dios narɨtmika akane, mɨnminkas mɨntas amtu piankamasachi.

28 Dios katsa yalta kamtanamtuasmin, Jesúsne sun mɨt kit tɨnta kaiznara:

—Une nawa piankamamtu. Une na mɨntas amti pian. Apminpain at chi ish. Usne, watchamika i, nawa ɨninta. Une ussa pianchi. 29 Nain ussa pianish, us nawa ɨninta akwa. Mane tas arau.

30 Suasne awa ussa piz kit sɨpshiarakas, mɨnminkas ussa pizarachi. Mama ussa piztu payu taiztachi. 31 Akkwan awane us nɨrɨtmika i nɨjkulara. Mamaztuzne kaizara: “Dios nɨrɨtmika akane, usne, an ampukana, anza iztasparɨt kal kimanazi.”

32 Fariseo awa Jesúspa kaizamtu aizpa mɨarawane, uspakas pariya ɨnintuzkas Dios katsa yalkis policíaruza ɨninnara, Jesústa piz kit mɨl kit kajchira sɨpnapa. 33 Suasne Jesúsne kaiznara:

—Nane ukasa akwan payu chin tunash. Suasne nawa ɨnintamikawarain kailtɨnash. 34 U nawa sayamtukas, une nawa wanmalamanazi. Mɨnminkas na ɨmtura ɨasachi.

35 Suasne Judío awane usparuzpain ka mɨmamɨzta:

—¿Anne mɨnpa ɨrɨnsa? Usne au iztakis ɨsachi. ¿Usne Griego suwara Judío awaruza kamtana ɨrɨnsa? ¿Diosta pianchiruza kamtana ɨrɨnsa? 36 Us kaiztu aizpa piankamsachimakpas. Sunkana kaizta: “Nawa saiyanazi. Nawain wanmalamanazi. Une na ɨmtura ɨasachi.”

37 Minpa pishta payune anza katsa i. Sun payura Jesúsne kuhs kit tɨnta kaiznara:

—Mɨnpazha kwazi kiltane, nawa anka. Nawa nɨjkultumikane nawa atpa, kwanpa, uznapa. 38 Jesúsne sunpa kaiz kit kwaziwa kwinta kira, awa kwazi kiltu akwa. Awane kwazi kwanpa pashiamtu, au sukin uzna. Jesúsne ankas Dios pitpa kaiztu: Nawa nɨjkultumikane kwazi kumtu mikakana i. Usne uznazi.

39 Sun kizkane, Jesúsne paiña Sɨnam Izpulpa kwinta kira. Paiña Sɨnam Izpulne Jesústa nɨjkultuza sapnashinat kit uzninnanazi. Jesús mama irɨttas kuhstachi akwa, Diosne paiña Sɨnam Izpulta mama ɨnintachi, Jesústa an watsal namnapa.

40 Jesús kaizta aizpa mɨarawane, mɨnpazha awaruzpain kaizara:

—An Dios kainammmikane i.

41 Mamaztuzne kaizara:

—Anne Dios narɨtmika i.

Mamaztuzne mamaz tuntu kizara:

—Cristone Galilea suras amanazi. 42 Dios pɨnkɨhta ka parɨt: “Cristone Davidpa ɨninmikawa kwaltas puznazi. Usne Belén pɨpulukin kawinazi.”

43 Awane Jesús akwa paimpa ɨara. 44 Mazakanane ussa pizshiara, kajchira sɨpna. Mɨnminkas ussa pizarachi.

45 Dios katsa yalkis policíane ɨninturuz purakin kaiyara. Pariyaruza ɨnintuzkas Fariseo policíaruzkas mɨmanara:

—¿Chikishma Jesústa karaamanash?

46 Policíane sɨnkanara:

—Mɨnminkas an ampukana paratchi.

47 Suasne Fariseo awane mɨmanara:

—¿Jesúsne uruza kain kinamtukish? 48 Au Judío awaruza ɨninturuzne us Dios narɨtmika i nɨjkularachi. Fariseo awaruzkas us Dios narɨtmika i nɨjkularachi. 49 An awane Moisés ɨninta aizpa kanpamtuchiruzne wan karaanazi. Uspane Jesústa mɨat kit ussa kanpaamtu.

50 Nicodemone, Jesústa amta izna ɨtmikane, Fariseo awaruztas azi. Usne kaiznara:

51 —Aumɨza ɨnintɨt aizpa pianmakpas. Aune mazara kwail kirɨt kizsachimakpas. An ñancha aune ussa mɨrawamakpas, paiña kwail kirɨt aizpa piankamna.

52 Suasne sɨnkaara:

—¿Nukas Jesúskana Galilea suras atkish? ¿Nu paiña kanpammika kish? Dios pɨnkɨhta iztane, une Dios kainammika Galilea suras amtuchira piankamanazi.

53 Suasne wan chiwal usparuzpa yalta kaiyarɨt.