1 Jesúsne doce kammuruza wanmakninnara. Usparuza kiwainnat kit katsa mikwakana namninnara, wan saliztuza puzninnanapa, wan ishturuza wat paninnanapa. 2 Usne usparuza ɨninnara, Dios awaruza ɨninnashimtu kainanapa, ishturuza wat paninnanapa. 3 Usne kaiznara:

—Miwara ɨmtune, kɨlmin ɨtpa. Tɨwilkasakas, tuhkasakas, pankasakas, pialkasakas ɨman. Maizmu kamisha kwaman. 4 Chiwazha yalta naptane, suain pittain, ɨmtu payurakima. 5 Pɨpuluras awakas nantas awakas umɨza sappamakane, tas kaiyat kit wan awa iztakin pil mittɨ kiharain, uspa kwail kiarɨt aizpa piankamanapa.

6 Suasne uspane puzat kit wan pɨpuluwara ɨara, Dios watsal pit kainana, ishturuza wat paninnana.

7 Herodesne, katsa mikwane, Jesús kit aizpa mɨra. Usne Jesúspa kwisha mintuara, mɨnpazha Juan mamasa uznintɨt kaizta akwa. 8 Mɨnpazha Elías, Dios kainammmika, iztɨt kizara. Mɨnpazha mamaz ñamin ɨlapa irɨt Dios kainammmika mamasa uzninta kizara. 9 Sun mɨrawane, Herodesne ka kizta:

—Juanta kɨzpura tɨtna ɨnintau. Suasne ¿Sunne, mɨnmakai? Chiwazha Jesús kit aizpa mɨrau.

Katmizna usne Jesústa azain izshira.

10 Tas kaiyarawane, ɨnintaruzne ussa chiwazha uspa kiarɨt aizpa kaizara. Usne usparuzain Betsaida pɨpulura minat kit ɨara. 11 Sun piankamarawane, akkwan awane ussa an kwizta kanpaara. Usparuza sapnat kit “wat kɨntɨre” kiznarawane, Jesúsne miza Dios awaruza ɨninnashimtu kainanara. Ishturuzakas kakulninnara.

12 Nashmɨzkane, doce kammuruzne ussa aat kit kaizara:

—Wan awara pɨpulurakima nantakima ɨninnari, uspa kumira sayanapa, yalkas pitna sayanapa. Apane pul sukin chinkas wachi.

13 Usne usparuza kaiznara:

—Une usparuza kumira kwinnarain.

Uspane sɨnkaara:

—Cinco pankas paas pishkarukasain mɨjmakpas. Wanta kumira kwinnana, aune kumira paina ɨtpamakpas.

14 Sua cinco mil ampu wanmakkara. Jesúsne usparuza kaiznara:

—Cincuentakimain wanmakkat kit uzninnari.

15 Suasne wanta pilta uzninnara. 16 Cinco pankas paas pishkarukas saptawane, Jesúsne chiyura izak kit Diosta “aishtaish” kizta. Sun wan pitti pittin kɨztawane, kammuruza nailnara. Suasne kammuruzne wan awaruza nail kwinnara. 17 Wan awane kapal kuat kit tukkara. Sun kumira tiztɨt akwa, uspane doce tɨmta winñara.

18 Maza payune Jesúsne paimpa Diosta paikumtu tuazi. Kasharane kammuruzne uzara. Ka mɨmanara:

—Awane ¿Mɨnma na ish kizamtu?

19 Ka sɨnkaara:

—Mɨnpazha nune Juan munnammika i, kizamtu. Mamaztuzne nune Elías i kizamtu. Mamaztuzne nune ñamin ɨlapa Dios kainammmika i, kaizamtu. Sunne mamasa irɨttas kuhsninta, kizamtu.

20 Usparuza mɨmanara:

—Une ¿Mɨnma na ish kaizamtui?

Pedrone ka sɨnkara:

—Nune Diospa nɨrɨtmika i, kizta.

21-22 Jesúsne usparuza ka kaiznara:

—Na uruza kaiztu aizpa mɨnainkas kainanaman. Diosne nawa, Ampu namtɨtmikara, an sura ɨninta, awa akwa naiznapa. Ɨlapa Judío pariyaruzkas Moisés kaizta aizpa kamtamtuzkas katsa mikwara nawa chɨhkaanazi, nawa piantaanapa. Kutña payu pailtɨka, mamasa kuhs kit uznash.

23 Sun kainarawane, Jesúsne wanta kaiznara:

—Nawa kanpashitmikane usmin mintu aizpa maintawa. Kurishta imtumikane wan chɨhkamtu. Sunkanane ap kanpammikane wan chɨhkanazi, nakasa chanpa. Nawa kanpazhain. 24 Mɨnpazha uspawain tɨnta kal kiamtu, wat uzanapa. Wat uzamtukas, iarɨnazi. Sunkana wan kaarɨnazi. Diosta kanpamtuzne Dios kuruntu aizpa mɨanazi. Diosne paiña pit mɨmtumikasha watsat mɨlnazi. 25 Katmizna kwazpa kultumikane, chiwal mɨjmikane, wansɨh karɨnazi, irɨka. 26 Mɨnpazha nawa mɨtsal kitne, mɨnpazha na kaizta aizpa mɨtsal kitne, nane, Ampu namtɨtmikane, ussa mɨtsal kinash. Na mamasa chiyuras akane, nane Diospa ángelkana Taitta Dioskana kai malnash. 27 Watcha kaiznamtus. Mɨnpazha akki uztuzpain iamanazi, miza Dios awaruza ɨninnamtu piankamanakima.

28 Ocho payu pailtawane, Jesúsne Pedrorakas Juantakas Santiagorakas ɨnkal ɨzara minara, Diosta paikwan. 29 Diosta paikuamtuasmin, Jesúspa matsɨh naztam malkwera. Paiña kwaksham putchãkana namtɨt. 30 Suane Moiséskas Elíaskas, paas an ñancha uzattuzkas, uskasa kwinta kiilta. 31 Sun paasas Jesús panakin naztam malkwera. Uspane Jesús irɨmtu Jerusalén pɨpulura kwinta kiilta. 32 Pedrokas paiña izmuruzkas pitshiara. Izkularawane, uspane Jesús naztam namtɨt izara. Paas awarakas Jesúskasa panara izara. 33 Paas ampu Jesústas ɨmtazasmin, Pedrone Jesústa ka kaizta:

—Kamtam, watmin akki tumakpas. Kutña ɨranchu sanawas: mazane nu akwa, mazane Moisés akwa, mazane Elías akwa, kizta.

Pedrone us kwinta kit aizpa pianchi. 34 Sun kwinta kimtuasmin, wanish usparuza sɨpnara. Wanish usparuza sɨptane, izmuruzne ishkuara. 35 Diosne wanish ayukmalsɨh ka kiznara: “Anne ap painkul i. Ussa narau. Ussa mɨrain,” kiznara.

36 Dios kaizta aizpa mɨarawane, uspane Jesústa mazainpain pana izara. Uspane puñain paat kit uspa izara aizpa kainanarachi. Akkwan payurakima mɨnainkas izara aizpa kaiznarachi.

37 Mamaz payura, Jesúskas paiña kammuruzkas ɨnkaltas kihsharawane, akkwan awane ussa wanmakkara. 38 Maza ampune usparuztas ussa tɨnta ka kaizta:

—Nane nua paikumtus, ap painkulta iznapa. Maza painkulmin mɨjish. 39 Mɨzha. Saliz ussa piztawane, usne tɨnta kwiantu. Salizne ussa ulnintu, ilpi puznakima. Saliz akkwan piji ussa pizkane, pashpane naiz kit kwisha kwaizta. 40 Nane up kammuruza saliz puzninnapa paikwarau. Puzninmanamarɨt, kizta.

41 Jesúsne sun payura uztuza sɨnkanara:

—Une nawa nɨjkulamtuchi. Une, ma uztuzne, kwail awa mai. Nane uruza wan payurakima tailchamanash. Nane uruza tailchasachish, kiznara. Suasne Jesúsne papihshta kaizta:

—Up painkul nawa karash, kizta.

42 Pashpara amtuasmin, salizne ussa nainnin kit tɨnta ulninta. Jesúsne salizta parat kit pashparas puzninta. Jesúsne pashpara kakulnin kit paiña papihshta chɨhkara. 43 Wanne Dios wat kirɨt akwa iztaspaarɨt.

Jesús chiwazha kirɨt akwa, wanne iztaspaarɨt. Suasne usne kammuruza ka kaiznara:

44 —An pit wat mɨrain. Mɨnpazha nawa aanazi, Ampu namtɨtmikara pizanapa, katsa mikwara chɨhkanapa.

45 Kammuruzne Jesús kaizta aizpa piankamarachi. Diosne usparuza sun pit piankamninnarachi. Ishkuara akwa, uspane Jesús kaizta aizpa mɨmaarachi, an piankamana.

46 Paiña kammuruzne usparuzpain ka mɨaamɨzta: ¿Mɨnma an tɨnta i? kizara. 47 Jesúsne uspa minta aizpa nɨjkul kit pashpara tain kit us tukin kunnin kit 48 usparuza ka kaiznara:

—Une we tɨntaruza an pashpakana sap kit kiwaintawa. We tɨntaruza na akwa kiwaintumikane nawa sap kit kiwaintu. Nawa saptumikane ap Taittara, nawa ɨnintamikasha saptɨnazi. Katmizna uruzpain an we tɨntamikane an tɨnta namtɨnazi.

49 Suasne Juanne ussa kaizta:

—Kamtam. Aune saliz puzninmikasha iztamakpas. Us nua paikukane, usne saliztuza puzninnamtu, us tɨnta ɨnim mɨj akwa. Us aukanain nua kanpamtuchi akwa, aune ussa “Jesústa paikumun, saliztuza puzninnanapa,” kiztamakpas.

50 Jesúsne ussa kaizta:

—Sunkana kaizmun. Aukasa aliz chimikane aumɨza kiwainnamtu.

51 Chiyura nuna kasha pakane, Jesúsne Jerusalén pɨpulumal ɨn min kit ɨmɨzta. 52 Usne mɨnpazharuza an ñancha ɨninnara. Uspane Samaria pɨpulura ɨat kit nappara, pitmukin sayana. 53 Sun Samaria pɨpulura uztuzne ussa yal nammɨlannarachi, us Jerusalén pɨpulumal pianashimtu akwa. 54 Paiña kammuruz, Santiagokas Juankas, sun nɨjkulpailkane, Jesústa ka kizpailta:

—Chiyuras uztuza paikuiznapas, ippa ɨninnapa, usparuza kuanapa, ianapa.

55 Suasne Jesúsne puij kit paasta pilchanara, uspa sun kaizta akwa. 56 Ampu namtɨtmikane au sura atchi, awaruza piantana. Usne apain ara, awaruza watsat mɨlnana.

Suasne uspane mamaz pɨpulura ɨara.

57 Miwara ɨamtuasmin, maza ampune Jesústa kaizta:

—Anpat, mɨnta ɨkwara nua kanpashiras, kizta. 58 Jesúsne ussa sɨnkara:

—Ɨnkal kwizane pil kulta pitmu mɨj. Chitchukas tɨra pitmu mɨj. Sunkana Ampu namtɨtmikane pitmu kwaizkulna mɨjchi.

59 Jesúsne mamazta kaizta:

—Nawa kanpazha.

Usne sɨnkara:

—Anpat, an ñancha ap papihshta pilta kamshimtus, iraka.

60 Jesúsne ussa sɨnkara:

—Diosta pianchimikane irɨttuza kamshina. Nune sunkana kinchi. Ɨt kit awaruza Dios aumɨza ɨninnashimtu kainanari.

61 Mamazne ussa kaizta:

—Anpat, nane nua kanpashimtus. An ñancha ap kwaltuza ɨru kiznashimtus.

62 Jesúsne ussa sɨnkara:

—Ap kal masamikane ap kal kitpa, pailnakima. Ap kal chɨhkatmikane Dios ɨnintura kiwainsachi.