3
1 Hɑnduniɑ ye sɔɔ, ɡɑ̃ɑnu bɑɑnire kɑ nin sɑɑ.
Tɑrɑ mi, sɑɑ bɑɑyere kɑ yen sɑɑ.
2 Mɑrubu kɑ bin sɑɑ,
ɡɔɔ mɑɑ kɑ win sɑɑ.
Duurubu kɑ bin sɑɑ,
wukɑbu mɑɑ kɑ bin sɑɑ.
3 Goberu kɑ ten sɑɑ,
bɛkiɑbu mɑɑ kɑ bin sɑɑ.
Kɔsukubu kɑ bin sɑɑ,
bɑnɑ mɑɑ kɑ yen sɑɑ.
4 Swĩi kɑ yin sɑɑ,
yɛ̃ɛsu mɑɑ kɑ sin sɑɑ.
Weeweenu kɑ nin sɑɑ,
yɑɑbu mɑɑ kɑ bin sɑɑ.
5 Kɔ̃ɔ mɛnnɑbu kɑ bin sɑɑ,
kɔ̃ɔ mɛnnɑbun deribu kɑ bin sɑɑ.
Bɔkɑsinɑɑ kɑ yen sɑɑ,
bɔkɑsinɑɑn deribu mɑɑ kɑ bin sɑɑ.
6 Gɑ̃ɑnun kɑso kɑ ɡen sɑɑ,
nin kɔ̃ɔrɑbu kɑ mɑɑ bin sɑɑ.
Gɑ̃ɑnun yiibu kɑ bin sɑɑ,
nin kɔ̃ɔbu mɑɑ kɑ bin sɑɑ.
7 Gɛ̃ɛkubu kɑ bin sɑɑ,
yinɑ mɑɑ kɑ yen sɑɑ.
Mɑribu kɑ bin sɑɑ,
ɡɑri ɡerubu mɑɑ kɑ bin sɑɑ.
8 Kĩɑnɑɑ kɑ yen sɑɑ,
tusinɑɑ mɑɑ kɑ yen sɑɑ.
Tɑbu kɑ bin sɑɑ,
bɔri yɛndu mɑɑ kɑ ten sɑɑ.
9 Arufɑɑni yerɑ̀ tɔnu u rɑ wɑ win sɔmburu sɔɔ. 10 Nɑ wɑ sɔmɑ ye Gusunɔ u rɑ tɔnu sure. 11 Yinni Gusunɔ u rɑ ɡɑ̃ɑnu kpuro kowɑ nin sɑɑ sɔɔ nu n wɑ̃. U mɑm doke tɔnun bwisikunu sɔɔ mɑ ɡɑ̃ɑnu wɑ̃ɑ ni nu ku rɑ kpe, bɑɑ mɛ tɔnu kun kpɛ̃ u tubu sɔmɑ ye Gusunɔ u mɔ̀ sɑɑ toren di sere kɑ hɑnduniɑn kpeerɔ. 12 Nɑ tubɑ mɑ ɡɑ̃ɑnu sɑri ni nu wɑ̃ mɑ kun mɔ tɔnu u nuku dobu ko kpɑ u wɑ̃ɑ ɡeeru di win wɑ̃ɑrun tɔ̃ru kpuro sɔɔ. 13 Adɑmɑ tɔnu ù n wɑɑmɔ u dimɔ u nɔrumɔ mɑ u nuku dobu mɔ win sɔmɑn ɑren sɔ̃, ye, yɑ sɑ̃ɑwɑ Gusunɔn kɛ̃ru. 14 Nɑ ɡiɑ mɑ ye Gusunɔ u kuɑ kpuro, yɑ koo tɛwɑ. Bɑ ǹ ɡɑ̃ɑnu ɡɑnu sosimɔ ye sɔɔ, bɑ ǹ mɑɑ ɡɑ̃ɑnu ɡɑnu kɑwɑmɔ ye sɔɔ. Nɡe mɛyɑ Gusunɔ u rɑ ko kpɑ tɔmbu bu kɑ nùn nɑsiɑ. 15 Ye yɑ wɑ̃ɑ tɛ̃, kɑ ye yɑ ko n wɑ̃ɑ siɑ, yɑ rɑɑ wɑ̃ɑ kɔ. Gusunɔ u rɑ dewɑ ye kpuro yu mɑɑ wure yɑ n koorɑmɔ.
Gɔɔ u sɑ̃ɑwɑ ɡɑ̃ɑnu bɑɑniren
wii ɡoberu
16 Yen biru, nɑ wɑ siri ɡbɑburɔ mɑ kɔ̃sɑ kowo u ɡemɡii siribu di hɑnduniɑ ye sɔɔ. 17 Mɑ nɑ tii sɔ̃ɔwɑ nɑ nɛɛ, Gusunɔ u koo ɡemɡii kɑ tɔn kɔ̃so siri. Domi ɡɑ̃ɑnu bɑɑnire kɑ nin sɑɑwɑ. Nɡe mɛyɑ bɑ koo mɑɑ kookoosu bɑɑsire siri. 18 Nɑ mɑɑ tii sɔ̃ɔwɑ nɑ nɛɛ, sɔ̃ɔ teeru, Gusunɔ u koo tɔmbun lɑɑkɑri mɛɛri kpɑ ben tii bu ɡiɑ mɑ bɑ ǹ yɛɛ sɑnɔ kere. 19 Domi tɔnun kɔkɔrɔ kɑ yɛɛɡiɑ yɑ sɑ̃ɑwɑ tiɑ. Be kpuro bɑ rɑ ɡbiwɑ. Sɑɑ ye sɔɔ, tɔnu u ǹ yɛɛ sɑnɔ kere. Yeni yɑ tubum sɛ̃. 20 Gɑ̃ɑnu kpuro nu dɔɔwɑ yɑm tem. Tuɑ bɑ kɑ ni kpuro kuɑ. Tuɑ ye sɔɔrɑ ni kpuro nu mɑɑ wurɔ. 21 Wɑrɑ koo kpĩ u nɛɛ, tɔnun hundewɑ yɑ rɑ yɔ wɔllɔ kpɑ yɛɛɡiɑ yɑ n wɑ̃ɑ temɔ. 22 Ye nɑ wɑ n burɑm bo tɔnun sɔ̃, yerɑ u nuku dobu ko kɑ win sɔmburun ɑre. Yerɑ u mɔ mi. Domi wɑrɑ u koo mɑɑ de u nuku dobu ko kɑ ye yɑ wee win biru.
Gem sɑriru
tɔmbun wɑ̃ɑsinɑɑ sɔɔ