1 Nɡe mɛ bɑ̀ n dɑ̃ru burɑ,

ten nuurun di kpii pɔturɑ rɑ yɑri,

nɡe mɛyɑ ɡoo u koo yɑri u bɑndu di Isɑin bweseru sɔɔ.

2 Gusunɔn Hunde u ko n dɑ n wɑ̃ɑ kɑ wi.

Hunde wi, u koo nùn bwisi kɑ dɑm kɛ̃

u kɑ win tɔmbu kpɑrɑ,

kpɑ u Gusunɔn kĩru ɡiɑ u nùn nɑsiɑ.

3 U koo nùn mɛm nɔɔwɑwɑ kɑ kĩru.

Mɛyɑ u ǹ tɔnu sirimɔ kɑ sɛndɑru,

ǹ kun mɛ, bɑ nɛɛn sɔ̃.

4 U koo sɑ̃ɑrobu siriɑwɑ dee dee,

kpɑ u bwɛ̃ɛbwɛ̃ɛbu ben ɡem wɛ̃.

Win ɡɑri yi ko n sɑ̃ɑwɑ nɡe bokuru

te u koo kɑ tɔmbu sɛɛyɑsiɑ,

kpɑ yi n sɑ̃ɑ nɡe tɑkobi

ye yɑ koo tɔn kɔ̃sobu ɡo.

5 Win ɡem kɑ win bɔrɔkinirɑ ko n sɑ̃ɑwɑ

nɡe kpɑkɑ ye u sɛ̃ke pɔrɑɔ

u n kɑ win tɔmbu kpɑrɑmɔ.

6 Yɛɛ ɡɔbi kɑ yɑ̃ɑnu nu ko n wɑ̃ɑ yɑm tem,

kpɑ ɡbeeku musukunu kɑ boo binu nu kpunɑ sɑnnu.

Mɛyɑ mɑɑ ɡbee sunɔ binu kɑ kɛtɛ binu nu ko n wɑ̃ɑ sɑnnu,

kpɑ bii piibu u nu kpɑrɑ.

7 Kɛtɛbɑ kɑ ɡbeeku bɔ̃nu nu koo di sɑnnu,

kpɑ nin binu nu n wɑ̃ɑ yɑm tem.

Gbee sinɑnsu su koo yɑkɑsu di nɡe nɛɛ.

8 Bibu bɑ koo kpĩ bu kɑ surɔkɔnu dwee,

kpɑ bu ben nɔmu kpɛ̃ɛ wɑɑ ɡɔsɔnun wɔrusɔ.

9 Bɑɑwure u ko n Yinni Gusunɔn yɛ̃ru yibɑwɑ

nɡe mɛ nim wɔ̃ku ɡɑ nim yibɑ.

Yen sɔ̃nɑ be bɑ koo dɑ bu Yinni Gusunɔ sɑ̃

win ɡuurɔ te u tii ɡɔsiɑ Yerusɑlɛmuɔ,

ben ɡoo kun win winsim kɔ̃sɑ kuɑmmɛ.

10 Sɑɑ ye sɔɔ, ɡoo u koo yɑri Isɑin

bweserun di nɡe dɑ̃ɑ kpii pɔturɑ,

kpɑ u n sɑ̃ɑ nɡe ɡidi bɔrɑ bwesenu kpuron sɔ̃.

Bwese ni, nu koo ɡɔsirɑmɑ win mi.

Kpɑ win wɑ̃ɑ yeru tɑ n Gusunɔn yiiko sɔ̃ɔsi.

11 Sɑɑ ye sɔɔ, Yinni Gusunɔ u koo mɑɑ win dɑm sɔ̃ɔsi

u kɑ win tɔn be bɑ tie yɑkiɑ

be bɑ yɑrinɛ bɑ wɑ̃ɑ Asiriɔ kɑ Eɡibitiɔ

kɑ Pɑturɔsiɔ kɑ Etiopiɔ

kɑ Elɑmuɔ kɑ Bɑbiloniɔ kɑ Hɑmɑtiɔ Sirin temɔ,

kɑ sere be bɑ wɑ̃ɑ nim wɔ̃kun ɡoonɔ.

12 U koo ɡidi bɔrɑ ɡirɑ

u kɑ sɔ̃ɔsi mɑ u koo Isirelibɑ mɛnnɑ

be bɑ rɑɑ yoru mwɛɛrɑ,

kpɑ u Yudɑ be bɑ rɑɑ yɑrinɛ hɑnduniɑn ɡoonu nnɛ sɔɔ mɛnnɑ.

13 Efɑrɑimubɑ bɑ ǹ mɑɑ kɑ Yudɑbɑ nisinu mɔ̀.

Yudɑbɑ bɑ ǹ mɑɑ kɑ Efɑrɑimubɑ yibɛrɛ tɛɛru mɔ̀.

14 Bɑ koo mɛnnɑ bu Filisitibɑ wɔriwɑ

sɔ̃ɔ duu yeru ɡiɑ,

kpɑ bu Filisiti be ko ben yobu.

Mɛyɑ bɑ koo mɑɑ mɛnnɑ bu sɔ̃ɔ yɑri yeruɡibu wɔri.

Bɑ koo Edɔmu kɑ Mɔɑbubɑ dɑm dɔre,

kpɑ bu Amɔnibɑ tɑɑre.

15 Yinni Gusunɔ u koo de Eɡibitin dɑɑrun nim mu ɡberɑ.

U koo tu nɔmu dɛmiɛ u wom wure kɑ dɑm,

kpɑ u tu bɔnu ko kɛri nɔɔbɑ yiru,

kpɑ win tɔmbu bu tu tɔburɑ kɑ nɑɑsu.

16 U koo swɑɑ yɑrɑ win tɔn be bɑ tien sɔ̃,

be bɑ wɑ̃ɑ Asiriɔ.

U koo bu swɑɑ yɑrɑ nɡe mɛ u rɑɑ bu kuɑ

sɑnɑm mɛ u bu yɑrɑ Eɡibitin di.