1 Sɑnɑm mɛ sɔɔ, tem mi ɡɑ̃ɑnu ku rɑ kpi,

mu koo tem wurɑmɑ

kpɑ mu biibii burɛ kpi.

2 Kpɑ nuku dobu bu sɔ̃ɔsirɑ mi,

kɑ womusu kɑ nɑsɑrɑn kuuki.

Mu ko n ɡirimɑ mɔ

nɡe Libɑnin dɑ̃ɑ sɔ̃ɔ.

Mu ko n bɛɛrɛ mɔ

nɡe ɡuu te bɑ mɔ̀ Kɑɑmɛli kɑ Sɑronin tem ɡem.

Sɑɑ ye sɔɔ, bɑ koo Yinni Gusunɔn yiiko wɑ

kɑ yen ɡirimɑ.

3 Yen sɔ̃ tɛ̃,

bɛɛ be i wɑsire, i nɔmɑ sɑ̃ɑre,

i tii tɑ̃sisio i nɔmɑ suɑ.

Bɛɛ be i diirimɔ,

i de bɛɛn dũɑ yi dɑm ko.

4 Bɛɛ bèn ɡɔ̃ru ɡɑ ǹ kpĩ,

i ku nɑndɑ. I tii dɑm kɛ̃ɔ.

Domi Gusunɔ bɛɛn Yinni u sisi u bɛɛ mɔru bɑrɑ,

kpɑ u bɛɛn yibɛrɛbɑ kɔsie ye bɑ bɛɛ kuɑ.

Win tiiwɑ u koo nɑ u bɛɛ fɑɑbɑ ko.

5 Sɑɑ yerɑ wɔ̃kobun nɔni koo wukiɑrɑ,

kpɑ sosobu bu ɡɑri nɔ,

6 kpɑ kɔ̃ri kpirinuɡibu bɑ n yɔ̃ɔkumɔ nɡe kpɑsi.

Mɛyɑ wi u ku rɑ kpĩ u ɡɑri ɡere,

win yɑrɑ koo kusiɑrɑ

kpɑ u n nɔɔɡiru mɔ̀ kɑ nuku dobu.

Nim mu koo yɑri mu koku

tem mi ɡɑ̃ɑnu ku rɑ kpi sɔɔ,

7 kpɑ yɑni sɛɛri mi sɔ̃ɔ rɑ ɡɛm wɔ̃ yi ko yɛru,

kpɑ dɑru koki yi yɑri

mi tem mu ɡbere,

kpɑ nɑɑ yɑri kɑ ɡbĩi yi kpi

mi ɡbeeku bɔ̃nu nu rɑ kuke.

8 Miyɑ bɑ koo swɑɑ yɑrɑ bu ye

soku dɛɛrobun swɑɑ.

Durumɡii ɡoo kun dɔɔ mi.

Be bɑ ye swĩi, bɑ ǹ kɔ̃ɔrɑmɔ,

bɑɑ be bɑ ǹ bwisi mɔ.

9 Gbee sunɔ ǹ kun mɛ yɑɑ ɡɔbɑ ɡɑɑ kun swɑɑ ye sĩimɔ.

Be Yinni Gusunɔ u fɑɑbɑ kuɑ,

beyɑ bɑ koo swɑɑ ye mwɑ,

10 bu kɑ dɑ Siɔniɔ kɑ nɑsɑrɑn womusu.

Ben wuswɑɑ yɑ n nuku dobu sɔ̃ɔsimɔ bɑɑdommɑ,

kpɑ weeweenu kɑ nuku sɑnkirɑnu nu bu doonɑri.