1 Yinni Gusunɔ u nɛɛ,

bɛɛ be nim nɔru ɡɑ mɔ̀, i nɑ i nim nɔ.

Bɑɑ bɛɛ be i ǹ ɡobi mɔ, i nɑ i mwɑ i di.

I nɑ i tɑm kɑ bom mwɑ i nɔ n kun kɑ ɡobi.

2 Mbɑn sɔ̃nɑ i bɛɛn ɡobi dimɔ

ye yɑ ǹ ɑrufɑɑni mɔ sɔɔ.

Mbɑn sɔ̃nɑ i bɛɛn sɔmburun ɑre dimɔ

ye yɑ ǹ bɛɛ debumɔ sɔɔ.

I mɑn swɑɑ dɑkio

kpɑ i wɑ i di ye yɑ ɡeɑ sɑ̃ɑ,

kpɑ bɛɛn bwɛ̃rɑ yu yɛmiɑ dĩɑ duronun sɔ̃.

3 I swɑɑ dɑkimɑ, i nɑ nɛn mi,

kpɑ i wɑ i n wɑ̃ɑ.

Kon kɑ bɛɛ ɑrukɑwɑni bɔke

ye yɑ kun kpeemɔ,

n kɑ bɛɛ durom sɔ̃ɔsi sere kɑ bɑɑdommɑɔ,

mɛ̀n nɔɔ mwɛɛru nɑ Dɑfidi kuɑ.

4 Wee, nɑ nùn kuɑ nɛn seedɑɡii

bwese tukunun mi.

Nɑ nùn kuɑ nin sinɑ boko.

5 Nɛ, Gusunɔ wunɛn Yinnin sɔ̃,

kɑɑ bwese tukunu sokusiɑ,

kpɑ nu duki nɑ wunɛn mi,

bɑɑ mɛ nu ǹ dɑɑ nun yɛ̃.

Domi nɛ, Isirelibɑn Yinni Dɛɛrowɑ nɑ nun bɛɛrɛ wɛ̃ɛmɔ.

6 Ǹ n mɛn nɑ, i Yinni Gusunɔ kɑsuo tɛ̃

sɑɑ ye u wɑ̃ɑ bɛɛn bɔkuɔ.

I nùn sokuo sɑnɑm mɛ u wɑ̃ɑ bɛɛn turuku.

7 Kpɑ durumɡii u win dɑɑ kɔsi,

toro u mɑɑ win bwisiku kɔ̃sunu deri,

kpɑ u ɡɔsirɑ u wurɑmɑ Yinni Gusunɔn mi.

U koo nùn wɔnwɔndu kuɑ,

wi, wi u ku rɑ suuru kpɑnɛ.

8 Yinni Gusunɔ u nɛɛ,

nɛn bwisikunu kun sɑ̃ɑ nɡe bɛɛn bwisikunu.

Bɛɛn kookoosu su ǹ mɑɑ sɑ̃ɑ nɡe nɛɡisu.

9 Nɡe mɛ wɔllɑ kɑ tem tomɑ,

nɡe mɛyɑ mɑɑ nɛn bwisikunu

kɑ nɛn kookoosu kɑ bɛɛɡisu tondinɛ.

10 Nɡe mɛ ɡurɑ kɑ ɡuru kpenu rɑ tem dwiiyɑsie,

kpɑ dĩɑnu nu se nu mɑɑ ɡbee wuko bweseru wɛ̃,

kɑ ye u koo di,

11 nɡe mɛyɑ nɛn ɡɑri yi nɑ ɡeruɑ,

yi ku rɑ kɑm wɔri yi kun nɛn kĩru kue,

kpɑ yi nɛn himbɑ yibiɑ.

12 Kɑ ɡem, i ko yɑri yorun di kɑ nuku dobu,

kpɑ bu bɛɛ kpɑrɑ ɑlɑfiɑ sɔɔ.

Guunu kɑ ɡunɡunu nu koo yɛ̃ɛri bɛɛn wuswɑɑɔ,

kpɑ dɑ̃ɑ ni nu wɑ̃ɑ yɑkɑsɔ nu tɑki ko.

13 Mi sɑ̃ki rɑ kpi, dɑ̃ɑ ye bɑ mɔ̀ sipɛrɛ,

kɑ dɑ̃ɑ kiki nubu duroruɡisɑ su koo kpi mi,

kpɑ ye kpuro yu ko yĩreru

te tɑ nɛn yiiko sɔ̃ɔsimɔ sere kɑ bɑɑdommɑɔ.