1 Kɑɑ n sɑ̃ɑ nɡe dɔ̃ɔ wi u dɑ̃ɑ ɡbebɑ mwɑɑmɔ,

ǹ kun mɛ wi u nim ɡbisisiɑmɔ,

kpɑ wunɛn yibɛrɛbɑ bu ɡiɑ nɡe mɛ ɑ sɑ̃ɑ,

kpɑ bu diiri wunɛn wuswɑɑɔ.

2 Yinni Gusunɔ,

sɑnɑm mɛ ɑ sɑrɑmɑ ɑ mɑɑmɑɑki kuɑ

ye sɑ ǹ kɑ yĩiyɔ,

ɡuunu diirɑ bɛrum sɔ̃.

3 Sɑ ǹ ɡɑsɔ ɡoon ɡɑri nɔɔre.

Wunɛ bɑɑsi, sɑ ǹ mɑɑ ɡoo wɑɑre

wi u yen bweseru kuɑ

win tɔn be bɑ nùn nɑɑnɛ sɑ̃ɑn sɔ̃.

4 Wi u ɡem swĩi kɑ nuku dobu,

kɑ sere be bɑ wunɛn woodɑ yɑɑye,

bɑ sĩimɔ ye sɔɔ,

berɑ ɑ rɑ swɑɑ ɡbiiye.

Adɑmɑ ɑ kɑ sun mɔru kuɑ

yèn sɔ̃ sɑ durum kuɑ.

Kɑ mɛ, sɑ rɑ n durum ye mɔ̀wɑ sɑ n dɔɔ

sɑɑ yellun di.

5 Sɑ kuɑ nɡe disiɡibu,

mɑ bɛsɛn dɑɑ ɡeɑ yɑ sɑ̃ɑ nɡe yɑ̃ɑ disinuɡinu.

Sɑ ɡbere nɡe wurusu,

mɑ bɛsɛn durum kɑ sun doonɔ nɡe woo.

6 Goo sɑri wi u wunɛn somiru kɑsu.

Goo mɑɑ sɑri wi u rɑ nun kɑnɛ bururu,

domi ɑ sun wunɛn wuswɑɑ beruɑ,

mɑ ɑ sun deri sɑ ɡɔɔ dɔɔ bɛsɛn durum sɔ̃.

7 Kɑ yen de, Yinni,

wunɑ ɑ sɑ̃ɑ bɛsɛn bɑɑbɑ.

Sɑ sɑ̃ɑwɑ nɡe sɔndu,

wunɑ ɑ sun mɔmɑ kɑ wunɛn nɔmɑ.

8 Yinni Gusunɔ, ɑ ku mɔru ko too,

ɑ kun mɑɑ bɛsɛn durum ye yɑɑye sere kɑ bɑɑdommɑɔ.

Adɑmɑ ɑ n yɛ̃ mɑ sɑ sɑ̃ɑwɑ wunɛn tɔmbu.

9 Wee wunɛn wuu si ɑ ɡɔsɑ su kuɑ bɑnsu.

Yerusɑlɛmu yɑ wɔrukɑ.

10 Bɛsɛn sɑ̃ɑ yee burɑ dɛɛrɑ te,

mi bɛsɛn sikɑdobɑ bɑ rɑ rɑɑ nun sɑ̃,

tɑ dɔ̃ɔ mwɑɑrɑ.

Gɑ̃ɑ ɡee ni sɑ mɑɑ mɔ kpuro, nu kɑm kuɑ.

11 Kɑɑ n yenibɑ kpuro mɛɛrɑwɑ ɑ n nɔɔ mɑɑri,

kpɑ bɛsɛn nuki yi sɑnkirɑ n bɑndɑ?