3
1 Yenibɑn biru, Yoobu u den nɔɔ wukiɑ mɑ u ɡɑri ɡeruɑ u tɔ̃ɔ te bɑ nùn mɑrɑ bɔ̃rusi. 2 U nɛɛ,
3 bɔ̃rurɑrɑ tɔ̃ɔ tè sɔɔ bɑ mɑn mɑrɑ.
Bɔ̃rurɑrɑ wɔ̃ku tè sɔɔ bɑ nɛn ɡurɑ suɑ.
4 Yen tɔ̃ɔ te, tu ko yɑm wɔ̃kuru mɑm mɑm.
Gusunɔ u ku mɑɑ ten ɡɑri ko wɔllu mi.
U ku de yɑm bururɑm mu mɑɑ koorɑ te sɔɔ.
5 Gɔribun wɑ̃ɑ yerun yɑm wɔ̃ku bɑkɑru tu tu wukiri,
kpɑ ɡuru wiru tɑ n tu wukiri.
Yen dɔmɑ te, suru kɑ sɔ̃ɔ bu mwɑɑnɑ kpɑ bɛrum mu n wɑ̃ɑ tem sɔɔ.
6 Gusunɔ u de wɔ̃ku te, tu tĩrɑ n bɑndɑ.
U ku mɑɑ tu ɡɑrisi wɔ̃ɔn tɔ̃nu sɔɔ.
U ku mɑɑ tu ɡɑrisi surun sɔ̃ɔ sɔɔ.
7 U de tɔ̃ɔ te, tɑ n sɑ̃ɑ tɔ̃ɔ bɑrukɑ sɑriruɡiru,
kpɑ ɡoo u ku rɑɑ nuku dobu ko te sɔɔ.
8 Sɔrobu bu tɔ̃ɔ te bɔ̃rusio.
Be bɑ wɑɑ bɑkɑn dweebu yɛ̃ bu tu bɔ̃rusio.
9 Kperi yi yi koo yɑri tɔ̃ɔ ten yokɑ yi ku bɑlli.
Tɑ̀ n yɑm bururɑm yĩiyɔ, tu mu biɑ.
Tu ku mɑɑ buruku sɔ̃ɔ wɑ.
10 Domi tɑ ǹ nɛn mɛron nukuru yinɑsie.
Tɑ derɑwɑ bɑ mɑn mɑrɑ n kɑ wɑhɑlɑ yeni wɑ.
11 Mbɑn sɔ̃nɑ nɑ ǹ ɡu nɛn mɛron nukurɔ.
Mbɑn sɔ̃nɑ nɑ ǹ ɡu sɑnɑm mɛ bɑ mɑn mɑrumɔ.
12 Mbɑn sɔ̃nɑ nɛn mɛro u mɑn mɑrɑ u tɑɑru swĩi.
Mbɑn sɔ̃nɑ u mɑn nɔɔri u bom kɑ̃.
13 Nɑ̀ n dɑɑ ɡu dɔmɑ te, nɑ ko n dɑɑ kpĩwɑ,
kpɑ nɑ n dò nɑ n wɛ̃re,
14 nɡe sinɑmbu kɑ ben bwisi kɛ̃ɔ be bɑ tii sinɑ kpɑɑnu bɑniɑ tem mɛ sɔɔ mɑ nu kuɑ bɑnsu.
15 Mɛyɑ nɑ ko n wɛ̃re nɡe sinɑ bii be bɑ ben diɑ wurɑ kɑ sii ɡeesu yibiɑ,
mɑ bɑ ɡu.
16 Ǹ kun mɛ, nɑ n wɛ̃re nɡe bii wìn nukuru bɑ yɑrɑ,
ǹ kun mɛ, nɡe bii wi bɑ mɑrɑ mɑ u yɑnde ɡu u ǹ sɔ̃ɔ wɑ.
17 Nɑ ko n wɑ̃ɑ ɡɔriɔ mi tɔn kɔ̃sobun tii bɑ wɛ̃re,
kɑ sere mi be bɑ wɑsirɑ bɑ ǹ mɑɑ dɑm mɔ bɑ wɑ̃ɑ bɑ wɛ̃re.
18 Miyɑ pirisɔmbɑ bɑ wɛ̃re,
bɑ ǹ mɑɑ be bɑ bu dɑm dɔremɔn nɔɔ nɔɔmɔ.
19 Dɑmɡibu kɑ bwɛ̃ɛbwɛ̃ɛbu bɑ wɑ̃ɑ mi sɑnnu.
Yobu bɑ̀ n dɑ mi, bɑ rɑ yɑkiɑrewɑ sɑɑ ben yinnin min di.
20 Mbɑn sɔ̃nɑ Yinni Gusunɔ u rɑ de tɔnu wi u wɑhɑlɑ mɔ̀ u yɑm sɑ̃reru wɑ.
Mbɑn sɔ̃nɑ u rɑ de wi u nuki sɑnkire u n wɑ̃ɑ.
21 Domi tɔn ben bweserɑ bɑ ɡɔɔ kĩ, ɑdɑmɑ bɑ ǹ nùn wɑsi.
Bɑ ɡɔɔ win binɛ mɔ n kere dukiɑ.
22 Bɑ ku rɑ n nuku dobu mɔ sere bɑ̀ n ben siki wɔru wɑ.
23 Adɑmɑ nɑ sɑ̃ɑwɑ wi u kun yɛ̃ mi u dɔɔ,
mɑ Yinni Gusunɔ u nɛn swɑɑ kɛnusi u kɑ sikerenɑ.
24 Weeweenun sɑɑbu, nɑ ku rɑ di.
Nɛn wuri kun nɔru mɔ nɡe nim mɛ mu kokumɔ.
25 Yèn bɛrum nɑ mɔ̀, yerɑ yɑ rɑ mɑn deemɛ.
Ye nɑ mɑɑ nɑsie, yerɑ yɑ rɑ mɑn wɔri.
26 Wee, nɑ ǹ wɑ̃ɑ sɛ̃ɛ, nɑ ǹ mɑɑ wɛ̃re.
Nɑ ǹ bɔri yɛndu mɔ, mɑ nɑ rɑ n burisinɛ.
Elifɑsin ɡɑri