2 bɑ̀ n nɛn nɔni swɑ̃ɑru

kɑ nɛn wɑhɑlɑ kpuro kilo sɔndi,

3 yɑ ko n nim wɔ̃kun yɑni sɛɛri bunum kere.

Yen sɔ̃nɑ nɑ ɡɑri mɔ̀ nɡe wiiro.

4 Domi Dɑm kpuroɡii u mɑn yɑburɑ kɑ sɛ̃ɛnu.

Mɑ nin dɛ̃ɛ nɛn wɑsi duuri.

Mɑ u mɑn ɡɑ̃ɑ nɑnumɡinu kpɑre nɡe tɑbu kowo.

5 Kɛtɛku ɡbeeku ɡɑ rɑ swĩ

ɡɑ̀ n yɑkɑ bekusu wɑ ɡɑ dimɔ?

Kɛtɛ yɑ rɑ swĩ yɑ̀ n yɑkɑsu wɑ yɑ dimɔ?

6 Bɑ koo kpĩ bu dĩɑnu di ni nu mɑɑri sɔ̃ɔ sɔ̃ɔ nu ǹ bɔru mɔ?

Goo sɛ̃ɛrun kpikum mu rɑ n do?

7 Nɑ ku rɑ dĩɑ nin bweseru kɑ̃.

Nɡe mɛyɑ nɑ wɑhɑlɑ ye nɑ mɔ̀ mini tusɑ.

8 Gusunɔ u nɛn kɑnɑru mɔɔ,

kpɑ u mɑn kuɑ ye nɛn ɡɔ̃ru ɡɑ kĩ.

9 U den win nɔmu dɛmiɔ u mɑn mwɑ,

u munku u dɑkurɑ.

10 Sɑɑ ye sɔɔrɑ kon nuku dobu ko nɛn wɑhɑlɑ bɑkɑ yeni sɔɔ.

Kpɑ nɛn nukuru tu yɛmiɑ.

Nɑ yɛ̃ mɑ Yinni Gusunɔ u dɛɛre,

nɑ ǹ mɑɑ win woodɑ ɡɑɑ yinɛ.

11 Mbɑ ko nɑ n mɑɑ yĩiyɔ sɑnɑm mɛ nɑ ǹ dɑm mɔ.

Mbɑ nɑ mɑɑ mɑrɑ, domi nɑ yɛ̃ mɑ nɑ ɡuwɑ mi kɔ.

12 Nɑ dɑm mɔwɑ nɡe kperu?

Nɛn wɑsi yi sɑ̃ɑwɑ nɡe sii ɡɑndu?

13 Aɑwo, nɑ sɑ̃ɑwɑ dɑm sɑriruɡii.

Goo mɑɑ sɑri wi u koo mɑn fɑɑbɑ ko.

14 N weenɛwɑ wi u nɔni sɔ̃ɔre u durom wɑ win bɔrɔn mi,

bɑɑ u kun Dɑm kpuroɡii nɑsie.

15 Adɑmɑ wee, bɛɛ nɛn bɔrɔbɑ i mɑn nuki sɑnkɑ nɡe dɑɑ te tɑ nim ɡberɑ.

16 Purɑn sɑɑ, kpɑ tɑ n nim yibumɔ bɑɑmɑn di mɛ mu dɛɛre.

17 Yɑm susurun sɑɑ, kpɑ sɔ̃ɔ u tu ɡberɑsiɑ.

18-20 Nim nɔru ɡɑ̀ n tenkubɑ mɔ̀,

be bɑ wee sɑɑ Temɑ kɑ Sɑbɑn di, yerɑ bɑ rɑ ɡɛre mi.

Domi bɑ tu nɑɑnɛ sɑ̃ɑ.

Adɑmɑ bɑ̀ n turɑ mi, ben ɡɔmɑ rɑ dwiiyewɑ,

kpɑ bu yɑɑyɑɑre ko bu kɔ̃ɔrɑ, bu ɡbi ɡbɑburɔ.

21 I sɑ̃ɑwɑ nɡe dɑɑ te.

I nɛn weeweenu nɔɔmɔ, mɑ i bɛrum soore.

22 Nɑ bɛɛ bikiɑre n nɛɛ, i mɑn kɛ̃ru kɛ̃ɛmɑ bɛɛn ɑrumɑnin di,

23 n wɑ n kɑ yɑri yibɛrɛn nɔmun di?

N kun mɛ i kɑ mɑn yɑkiɑ tɔn kɔ̃so ɡoon nɔmɑn di?

24 I mɑn sɔ̃ɔsio mi nɑ torɑ, kpɑ n mɑri.

25 Tɔnu u koo ɡem wurɑ.

Adɑmɑ ye i mɑn ɡerusimɔ mi, mɑnɑ yen ɑsɑnsi wɑ̃ɑ.

26 I kĩwɑ i nɛn ɡɑri ɡɔburu wɑ, i yi mɛɛri kɑm,

kpɑ i mɑn tɑɑrɛ wɛ̃, nɛ wi nɑ ǹ mɑɑ ɡɑ̃ɑnu yĩiyɔ?

27 Bɛɛ, i ko kpĩ i ɡobeku tɛtɛ toosi,

kpɑ i mɑm bɛɛn bɔrɔ dɔrɑ.

28 Tɛ̃, nɑ bɛɛ kɑnɑmɔ, i mɑn mɛɛrimɑ.

Kon bɛɛ weesu kuɑwɑ bɑtumɑ sɔɔ?

29 I suuru koowo, i de i kun sɑ̃ɑ murɑfitibɑ fɑ!

I de i nɛn dɛɛrɑru wɑ.

30 Gɑri kɔ̃si yi rɑ n wɑ̃ɑ nɛn nɔɔwɔ?

I tɑmɑɑ nɑ ku rɑ ɡeɑ kɑ kɔ̃sɑ wunɑnɛ?