28
1 Yoobu u nɛɛ,
tɔmbɑ yɛ̃ mìn di sii ɡeesu kɑ wurɑ yɑ rɑ yɑri
bu sere ye teɑ.
2 Tem diyɑ bɑ rɑ mɑɑ sisu wunɛ,
kpɑ bu sii ɡɑndu sɔwɑ kperun di.
3 Be bɑ sisu sɔwɑmɔ,
sere tem sɔɔwɔwɑ bɑ rɑ kɑ fitilɑ du
kpɑ bɑ n duɔ sere mi su wɑ̃ɑ yɑm wɔ̃kuru sɔɔ,
4 kpɑ bu wɔru ɡbe sere tem sɔɔwɔ,
bu swɑɑ wĩɑ mi, mi ɡoo sɑri.
Bɑ ǹ kpɛ̃ bu sĩ mi.
Wɛ̃ɛyɑ bɑ rɑ n ɡɑsirimɔ bu kɑ du mi.
5 Tem wɔllɔwɑ dĩɑnu rɑ kpi.
Adɑmɑ mɛn sɔɔwɔ,
n sɑ̃ɑwɑ nɡe ɡɑ̃ɑnu kpuro dɔ̃ɔ mwɑɑre.
6 Tem sɔɔ miyɑ kpee ɡobiɡinu rɑ n wɑ̃ɑ.
Mi sɔɔrɑ bɑ rɑ mɑɑ wurɑ wɑ.
7 Kɑsɑ yɑ ǹ swɑɑ ye yɛ̃.
Mɛyɑ mɑɑ yɑbereku ɡɑ ǹ ye wɑɑre.
8 Gbee sunɔ kɑ yɛɛ yi yi tii nɑɑnɛ sɑ̃ɑ yi ǹ ye mwɑɑre.
9 Adɑmɑ tɔnu u kɑ̃kɑ u kperu wɔri u kɔsukɑ,
sere u ɡuunun kpɛɛkpɛɛku ɡirɑri.
10 Kpee ten nɔɔwɔrɑ u rɑ swɛɛ wunɛ,
kpɑ u ɡɑ̃ɑ ɡee ni wɑ, ni nu wɑ̃ɑ mi.
11 Ù n nim kɑmɛ sɔɔ mi, u rɑ mu swɑɑ ɡɑnɛwɑ,
kpɑ u kɑ dukiɑ yɑrimɑ ye yɑ beruɑ sɔɔ mi.
12 Adɑmɑ mɑnɑ tɔnu u koo kpĩ u bwisi wɑ.
Mɑnɑ yi sikɑ.
13 Tɔnu kun yin ɡobin ɡeeru yɛ̃.
Domi yi ǹ wɑ̃ɑ hɑnduniɑ yeni sɔɔ.
14 Yi ǹ wɑ̃ɑ dɑɑrɔ.
Yi ǹ mɑɑ wɑ̃ɑ nim wɔ̃ku sɔɔ.
15 Bɑ ǹ kpɛ̃ bu kɑ yi wurɑ kɔsinɑ.
Bɑ ǹ mɑɑ kpɛ̃ bu yi dwe kɑ sii ɡeesu.
16 Bɑ ǹ kpɛ̃ bu yi weesinɑ kɑ wurɑ ye yɑ wee Ofirin di,
ǹ kun mɛ kɑ kpee ɡobiɡii ni nu nɔni booɡu kɑ bɛrɔ wuru mɔ.
17 Bɑ ǹ kpɛ̃ bu yi weesinɑ kɑ diɡi,
ǹ kun mɛ kɑ nɔrɑ ye bɑ kuɑ kɑ wurɑ,
18 kɑɑ sere ɡere kpee ɡobiɡii ni bɑ sokumɔ korɑi kɑ kirisitɑli?
Bwisi yi kpee ɡobiɡinu bɛɛrɛ kere.
19 Bɑ ǹ kpɛ̃ bu kɑ yi Etiopin kpee ɡobiɡii ni nu nɔni dɔm buuru mɔ weesinɑ.
Bɑ ǹ mɑɑ kpɛ̃ bu yi weesinɑ kɑ wurɑ ɡeɑ.
20 Ǹ n mɛn nɑ, mɑn diyɑ bwisi yi wee.
Mɑnɑ yin nuurɑ wɑ̃ɑ.
21 Tɔnu kun kpɛ̃ u yi wɑ kɑ nɔni.
Gunɔ ɡe ɡɑ yɔ̃ɔwɑ ɡɑ ǹ kpɛ̃ ɡu yi wɑ.
22 Gɔɔ kɑ ɡɔribun wɑ̃ɑ yerɑ koo nɛɛwɑ,
yin ɡɑriyɑ bɑ nɔɔre tɔnɑ.
23 Gusunɔ turowɑ u bwisin swɑɑ yɛ̃.
Wiyɑ u mɑɑ yin wɑ̃ɑ yeru yɛ̃.
24 Domi wiyɑ u hɑnduniɑn ɡoonu nnɛ kpuro wɑɑmɔ.
U mɑɑ kpuro wɑɑmɔ ye yɑ wɑ̃ɑ tem sɔɔ.
25 Sɑnɑm mɛ u wom bunum mɛɛrɑ
mɑ u nim kpɑ̃ɑru mɛɛrɑ,
26 kɑ sere swɛɛ yi ɡurɑ koo swĩi yu kɑ nɛ,
kɑ mɑɑ swɛɛ yi ɡuru mɑɑkinu kɑ ɡuru ɡbɑ̃sukubu koo swĩi,
27 yerɑ u bwisi yi wɑ.
Mɑ u yin ɑsɑnsi wɛ̃ɛrɑ u yi.
28 Sɑɑ yerɑ u tɔmbu sɔ̃ɔwɑ u nɛɛ,
bu nùn nɑsio, yerɑ yɑ sɑ̃ɑ bwisi.
Wi u mɑɑ kɔ̃sɑ ɡɛɛrɑri, wiyɑ u bwisi mɔ.
Yoobun yellun wɑ̃ɑru