1 Yinni Gusunɔn sɑ̃ɑ yerun wurɑ ɡeɑ ye, yɑ tĩrɑ.

Ten kpenu nu yɑri swɛɛ kpuro sɔɔ.

2 Yerusɑlɛmun tɔn be bɑ rɑɑ ɡɑrisi nɡe wurɑ ɡeɑ,

bɑ ɡisɔ bu ɡɑrisiwɑ nɡe tem mɔnnu.

3 Bɑɑ kɑ ɡbeeku bɔ̃nɔ, nu rɑ nin binu bom kɛ̃.

Adɑmɑ nɛn tɔmbu bɑ ǹ ben bibun wɔnwɔndu mɔ.

Bɑ sɑ̃ɑwɑ nɡe tɑɑtɑɑ niru te tɑ wɑ̃ɑ ɡbɑburɔ.

4 Bɑ derɑ ben bii wɛ̃ɛnun yɑri mɑni nin dɑrosu sɔɔ nim nɔrun sɔ̃.

Bibu bɑ dĩɑnu kɑsu, ɑdɑmɑ ɡoo sɑri wi u koo bu wɛ̃.

5 Be bɑ rɑ rɑɑ dĩɑ ɡeenu di,

bɑ ɡbisukumɔ swɛɛ sɔɔ.

Be bɑ seeyɑ doo nɔɔru sɔɔ,

bɑ kubɑnu bũurimɔ.

6 Nɛn tɔmbun sɛɛyɑsiɑbu bu kpɑ̃, bu Sodomuɡibu kere,

wuu ɡe Yinni Gusunɔ u kpeerɑsiɑ nɔni kpɑki teeru

ɡoon nɔmɑ sɑri mi sɔɔ.

7 Ben sinɑ bibu bɑ rɑɑ wɛ̃su bururɑm kere.

Bɑ mɑm bom bekum bururɑm kere.

Ben wɑsin ɡɔnɑ rɑ n sɔ̃riwɑ

kpɑ ben wuswɑɑ yɑ n bɑllimɔ nɡe kpee ɡobiɡinu.

8 Adɑmɑ tɛ̃ bɑ dɔ̃ɔ durom tĩrɑm kere.

Bɑ ku rɑ mɑɑ bu tubu swɛɛ sɔɔ.

Bɑ woorewɑ sere ben ɡɔnɑ yɑ kukunu mɑni.

Mɑ ben wɑsi ɡbere nɡe dɑ̃ɑ ɡbebɑ.

9 Be bɑ ɡbimɔ tɑbu sɔɔ, ben ɡɔɔ burɑm bo

n kere be bɑ rɑ nɔni sɔ̃ɔre

bu woorɑ ɡɔ̃ɔrun sɔ̃ bu sere ɡbi.

10 Bɑɑ mɛ bii mɛrobu bɑ ben bibu kĩ too,

kɑ mɛ, bɑ bu yikumɔ bɑ dimɔ

wɑhɑlɑ ye yɑ be, nɛn tɔmbu deemɑn sɔ̃.

11 Yinni Gusunɔ u win mɔru kpuro sɔ̃ɔsi,

u Yerusɑlɛmu dɔ̃ɔ sɔ̃re

mɑ yɑ dɔ̃ɔ mwɑɑrɑ sere kɑ yen kpɛɛkpɛɛkuɔ.

12 Sinɑ boko ɡoo ǹ kun mɛ tɔn diro ɡoo sɑri hɑnduniɑ sɔɔ

wi u rɑɑ tɑmɑɑ yibɛrɛ u koo kpĩ u du Yerusɑlɛmun ɡbɑ̃rɑrun kɔnnɔn di.

13 Wɑhɑlɑ bɑkɑ yeni yɑ nɑwɑ

Gusunɔn sɔmɔbu kɑ yɑ̃ku kowobun torɑnun sɔ̃.

Domi berɑ bɑ be bɑ ǹ torɑnu ɡɑnu kuen yɛm yɑri Yerusɑlɛmun swɛɛ sɔɔ.

14 Bɑ rɑ n sirenɛwɑ swɛɛ sɔɔ bɑ n bɑbi nɡe wɔ̃kobu

bɑ n disi sɔɔwɑ tɔmbun yɛm sɔ̃.

Goo kun kɑ̃kɔ u mɑm ben yɑ̃nu bɑbɑ.

15 Bɑ̀ n dɑ tɔmbun bɔkuɔ, bɑ rɑ bu ɡirewɑ bu nɛɛ,

i doonɔ minin di, bɛɛ disiɡibu.

I ku susimɑ i sun bɑbɑ.

Yerɑ bɑ rɑ doonɛ min di bɑ kun yɛ̃ mi bɑ dɔɔ.

Bɑ̀ n mɑɑ wɑ̃ɑ bwese tukunun suunu sɔɔ,

nu rɑ bu sɔ̃wɑ nu nɛɛ,

i ku sinɑ bɛsɛn suunu sɔɔ mini n kɑ tɛ.

16 Yinni Gusunɔn tii u bu yɑrinɑsiɑ kɑ mɔru.

U ǹ kĩ u bu wɑ.

U ǹ ben yɑ̃ku kowo ɡoo doke ɡɑ̃ɑnu.

U ǹ mɑɑ ben durɔ tɔkɔnun wɔnwɔndu kue.

17 Sɑ swɑɑ mɛɛrɑ sɑ wɑsirɑ

su kɑ wɑ mìn di somirɑ koo sun nɑɑwɑ.

Sɑ rɑɑ bweseru ɡɑru mɛɛrɑ

te sɑ yĩiyɔ tɑ koo sun fɑɑbɑ ko.

Wee, tɑ ǹ sun fɑɑbɑ kue.

18 Yibɛrɛbɑ bɑ bɛsɛn sɑnu sɑnusu mɛɛrɑ,

bu kɑ sun yinɑri su dɑ wuun bɑtumɑ sɔɔ.

Bɛsɛn ɡɔɔ turuku kuɑ.

Bɛsɛn wɑ̃ɑrun tɔ̃rɑ kpɑwɑ mi.

19 Bɛsɛn yibɛrɛ be, bɑ ɡunɔ bɑkeru sɑ̃ɑbu kere.

Bɑ sun yɔɔru bwɛ̃ɛyɛ ɡbɑburɔ.

Bɑ sun nɑɑ ɡire sere ɡuunu wɔllɔ.

20 Bɛsɛn sinɑ boko wi u derɑ sɑ wɑ̃ɑ,

wi, wi Yinni Gusunɔ u ɡɔsɑ,

wee, bɑ nùn yinɑ mwɑ.

N deemɑ sɑ rɑɑ nɛɛ,

win sɑɑbuwɑ sɑ kɑ tii mɔ bwesenun suunu sɔɔ.

21 Bɛɛ mɑɑ Edɔmubɑ, bɛɛ be i wɑ̃ɑ Usiɔ,

i ko kpĩ i nuku dobu ko tɛ̃,

ɑdɑmɑ i n yɛ̃ mɑ siribu bɛɛ mɑrɑ.

I ko i ko nɡe be tɑm mu ɡoomɔ kpɑ i tereru yɔ̃rɑ.

22 Bɛɛ Yerusɑlɛmuɡibu, bɛɛn sɛɛyɑsiɑbu kpɑ.

Bɑ ǹ mɑɑ bɛɛ yoru mwɑɑmɔ bu kɑ doonɑ.

Adɑmɑ bɛɛ Edɔmubɑ, Yinni Gusunɔ u koo bɛɛ mɔru kɔsiɑ,

kpɑ u bɛɛn torɑnu terɑsiɑ.