wee nɑ wɔnwɔndu soore nɡe wi u dɑ̃ɑ binu kunɔnu mɔ̀.

Mɑ u ǹ ɡɑ̃ɑnu wɑ u di.

U ǹ mɑɑ resɛm yebɑ wɑ ye win ɡɔ̃ru ɡɑ kĩ u di.

2 Domi tem mɛ sɔɔ, ɡoo sɑri wi u Gusunɔ mɛm nɔɔwɑmmɛ.

Goo kun mɔ̀ dee dee.

Be kpuro bɑ bwisikumɔwɑ bu tɔmbu ɡo.

Mɑ bɑ sɑ̃kiriɑnɑmmɛ.

3 Bɑ kɔ̃sɑn kobun yɛ̃ru mɔ.

Mɑ sinɑmbu kɑ siri kowobu bɑ tɔmbu nɔm birɑm kɛ̃nu mwɑɑrimɔ.

Ben dɑmɡibu bɑ ben binɛ sɔ̃ɔsimɔ.

Mɑ be kpuro bɑ nɔɔ tiɑ sɑ̃ɑ bu kɑ ko ye bɑ kĩ.

4 Ben wi u sɑnɔ bo, u sɑ̃ɑwɑ nɡe sɑ̃kɑ.

Ben wi u dɛɛre, u ɑwĩi kɔ̃si kere.

Yen sɔ̃ tɛ̃, tɔ̃ɔ te Gusunɔn sɔmɔbu bɑ bu nɔɔsiɑ

tè sɔɔ bɑ koo bu sɛɛyɑsiɑ tɑ tunumɑ.

Wee bɑ burisinɛ kɔ nuku sɑnkirɑnun sɔ̃.

5 Yen sɔ̃, ɑ ku wunɛn berusebu nɑɑnɛ ko.

A de ɑ wunɛn yɑrɑ nɛnɛ wunɛn tiin kurɔn wuswɑɑɔ.

6 Domi bii u rɑ win tundo wɔmɛ,

kpɑ bii wɔndiɑ u win mɛro seesi,

kpɑ biɡii kurɔ u win dwɑɑ mɛro seesi.

Bɑɑwure u rɑ n win yibɛrɛ mɔwɑ win tiin yɛnu sɔɔ.

7 Adɑmɑ nɛ, Yinni Gusunɔwɑ ko nɑ n mɛɛrɑ.

Wiyɑ ko nɑ n nɑɑnɛ sɑ̃ɑ.

Domi u rɑ mɑn fɑɑbɑ ko.

Wiyɑ u koo mɑn wisi.

8 Bɛɛ be i sɑ̃ɑ bɛsɛn yibɛrɛbɑ,

i ku yɛ̃ɛ ye yɑ sun deemɑn sɔ̃.

Bɑɑ sɑ̀ n wɔrumɑ, sɑ ko se.

Sɑ̀ n mɑɑ wɑ̃ɑ yɑm wɔ̃kuru sɔɔ,

Yinni Gusunɔwɑ u ko n sɑ̃ɑ bɛsɛn yɑm bururɑm.

9 Sɑ ko Yinni Gusunɔn mɔru sɔbe,

domi sɑ nùn torɑ.

Adɑmɑ sɑɑ ɡɑɑ sisi yè sɔɔ u koo kɑ sun yinɑ,

kpɑ u sun ɡem wɛ̃.

U koo kɑ sun nɑ yɑm bururɑm sɔɔ

kpɑ u sun durom kuɑ.

10 Bɛsɛn yibɛrɛbɑ bɑ koo ye wɑ.

Sɑɑ ye sɔɔrɑ bɑ koo sekuru wɑ,

be, be bɑ rɑ rɑɑ bikie bu nɛɛ,

mɑnɑ Gusunɔ bɛsɛn Yinni u wɑ̃ɑ.

Bɑ koo bu tɑɑku nɡe pɔtɔkɔ,

kpɑ su bu yɛ̃ɛ.

11 Tɔ̃ru ɡɑrɑ sisi tè sɔɔ bɑ koo Yerusɑlɛmun ɡɑni seeyɑ,

kpɑ bu bɛsɛn tem nɔɔ burɑ yeru yɑsiɑsiɑ tu tondɑ.

12 Sɑɑ ye sɔɔ, bɛsɛɡii be bɑ wɑ̃ɑ Asiriɔ kɑ Eɡibitiɔ

kɑ dɑɑ ni bɑ mɔ̀ Nilu kɑ Efɑrɑtin ɡoorɔ,

kɑ sere mɑɑ be bɑ wɑ̃ɑ nim wɔ̃kun ɡoorɔ kɑ ɡuunɔ,

bɑ koo wurɑmɑ bɛsɛn temɔ.

13 Kpɑ tem mɛ mu tie duniɑ sɔɔ mu ko bɑnsu,

tɔn be bɑ wɑ̃ɑ min kom kɔ̃sum sɔ̃.

14 Yinni Gusunɔ,

ɑ wunɛn tɔn be ɑ ɡɔsɑ kpɑro kɑ wunɛn kpɑrɑ dɛkɑ.

Be wee bɑ wɑ̃ɑ be tɔnɑ dɑ̃ɑ sɔ̃ɔwɔ mi tem ɡem wɑ̃ɑ.

A bu kpɑro Bɑsɑni kɑ Gɑlɑdin kpɑrɑ yenɔ nɡe yellu.

15 A sɔm mɑɑmɑɑkiɡiɑ koowo nɡe mɛ ɑ kuɑ

sɑnɑm mɛ ɑ sun yɑrɑmɑ sɑɑ Eɡibitin di.

16 Bwesenu nu koo mɑɑmɑɑki ye wɑ.

Kpɑ nu sekuru wɑ bɑɑ mɛ nu dɑm mɔ.

Nu koo nɔɔ nɔmɑ wukiri, nu yɔ̃rɑ nu kun ɡɑri ɡeruɑ,

kpɑ nu kun ɡɑ̃ɑnu nuɑ.

17 Kpɑ nu tuɑ di nɡe wɑɑ,

ǹ kun mɛ nɡe yɛɛ yi yi kɑbirimɔ.

Nu koo yɑri sɑɑ nin kuku yerun di kɑ bɛrum,

nu nɑ wunɛ Yinni Gusunɔn mi, nu n diirimɔ,

kpɑ nu n nun nɑsie wunɛn dɑm sɔ̃.

18 Wɑrɑ u kɑ nun weenɛ.

Wee, ɑ rɑ kɑ bɛsɛ wunɛn tɔmbun bweserun sukum mɛ mu tie tɛmɑnɛ

bɛsɛ be sɑ sɑ̃ɑ wunɛn ɑrumɑni

kpɑ ɑ sun bɛsɛn torɑnu suuru kuɑ.

Wunɛn mɔru ku rɑ tɛ.

Domi kĩrɑ ɑ rɑ sun sɔ̃ɔsi.

19 Kɑɑ mɑɑ bɛsɛn wɔnwɔndu wɑ.

Kpɑ ɑ ku bɛsɛn torɑnu ɡɑrisi.

Kpɑ ɑ bɛsɛn durum wunɑ ɑ kɔ̃ yu dɑ sere nim wɔ̃kun temɔ.

20 Kɑɑ bɛsɛ be sɑ sɑ̃ɑ Aburɑhɑmu kɑ Yɑkɔbun sikɑdominu kĩru kɑ bɔrɔkiniru sɔ̃ɔsi

nɡe mɛ ɑ bɛsɛn sikɑdobɑ nɔɔ mwɛɛru kuɑ sɑɑ yellun di.