1 Ninifuɡibɑ kuɑ bɔ̃rurobu.

Domi bɑ sɑ̃ɑwɑ tɔn ɡowobu.

Bɑ weesu yibɑ.

Mɑ bɑ kuurɑmɔ kɑ ɡbɑnɑ.

Bɑ rɑ n tɔmbun yɑ̃nu ɡurɑmɔwɑ.

2 Wee sɛnɑn dɑmusu nɔɔrɑmɔ wuu ɡe sɔɔ.

Wee tɑbu kɛkɛbɑn uruun wɔkinu nɔɔrɑmɔ,

mɑ dumi yi yi ɡɑwe yi yɔ̃ɔkumɔ.

3 Mɑɑsɔbu bɑ wee,

bɑ tɑkobibɑ kɑ yɑɑsi nɛni yi bɑllimɔ.

Wee bɑ tɔmbu mɛɛrɑ kuɑ,

mɑ ɡonu tɛrie bɑɑmɑ, nu ǹ ɡɑrirɔ.

Mɑ bɑ nu wɔrikimɔ.

4 Ninifu yɑ sɑ̃ɑwɑ nɡe kurɔ sɑkɑrɑ kowo kpoko.

Yɑ bwese dɑbinu yoru diisiɑ yen burɑm kɑ yen sɔrorun sɔ̃.

5 Yen sɔ̃nɑ nɛ Gusunɔ, wɔllu kɑ tem Yinni, kon ye wɔrimɑ.

Kon yen yɑberu ɡbɑbiɑ n kɑ yen wuswɑɑ wukiri,

kpɑ n yen tereru bwesenu sɔ̃ɔsi,

kpɑ yu sekuru wɑ.

6 Kon ye kubɑnu sure, kpɑ tɔmbu bu ye kɑ.

7 Sɑɑ yerɑ wi u ye wɑ u koo dukɑ su,

kpɑ u nɛɛ, Ninifu yɑ kuɑ bɑnsu.

Wɑrɑ u koo ye wɔnwɔndu kuɑ.

Mɑnɑ kon bu wɑ be bɑ koo ye nukuru yɛmiɑsiɑ.

8 Tebɛsi yɑ wɑ̃ɑ Nilun nim swɛɛ yi bɑ ɡbɑn bɔkuɔ.

Nim mu kɑ ye sikerenɛ.

Mɑ mu sɑ̃ɑ yen ɡbɑ̃rɑru.

Ninifu, ɑ tɑmɑɑ ɑ Tebɛsi ye sɑnɔ kere?

9 Etiopiɡibu kɑ Eɡibitiɡibɑ bɑ sɑ̃ɑ yen dɑm.

Putiɡibu kɑ Libiɡibu bɑ sɑ̃ɑwɑ yen somiɔbu.

10 Kɑ mɛ kpuro, yen tii yɑ yoru dɑ.

Bɑ ye mwɑ mɑ bɑ yen bibu ɡo swɛɛ kpuro sɔɔ.

Bɑ yen wiruɡibu tɛtɛ toosi,

mɑ bɑ yen dɑmɡibu mwɛɛrɑ bɑ yɔni doke.

11 Wunɛ Ninifu, kɑɑ nɔni sɔ̃ɔrɑwɑ,

kpɑ ɑ n sɑ̃ɑ nɡe wi u tɑm ɡoore,

kpɑ ɑ kuku yeru kɑsu yibɛrɛbɑn sɔ̃ ɑ kuke.

12 Sɑɑ ye sɔɔ, wunɛn ɡbɑ̃rɑnu kpuro nu ko n sɑ̃ɑwɑ nɡe dɑ̃ɑ nìn mɑrum mu ye.

Bɑ̀ n mu sirɑ kpɑ mu wɔri wi u koo mu din nɔɔwɔ.

13 Wee wunɛn tɔmbu bɑ sɑ̃ɑ nɡe tɔn kurɔbu wunɛn suunu sɔɔ.

Wunɛn tem wusun kɔnnɔsu su kɛniɑrɑ mɑm mɑm yibɛrɛbɑn wuswɑɑɔ.

Mɑ dɔ̃ɔ u sin kɔkɔrɔbɑ di.

14 Bɛɛ Ninifuɡibu, i nim tɑkirio i yi.

Domi bɑ koo bɛɛn wuu tɑrusi.

I bɛɛn ɡbɑ̃rɑrun dɑm sosio.

I birikibɑ muro kpɑ i sɔndu tɑɑku i kɑ tu bɑni.

15 Bɑɑ ì n yebɑ kpuro kuɑ,

kɑ mɛ, dɔ̃ɔ u koo nɑ u bɛɛ di,

ǹ kun mɛ bu bɛɛ ɡo kɑ tɑkobi.

Bɑ koo bɛɛ kpeerɑsiɑwɑ nɡe mɛ twee yi rɑ dɑ̃ɑ wurusu di.

Wee, i dɑbiɑ nɡe twee.

16 Bɛɛn tenkubɑ bɑ kperi dɑbiru kere.

Adɑmɑ be kpuro bɑ doonɑ

nɡe twee yi yi yɔ̃ɔwɑ.

17 Bɛɛn kɔ̃sobu bɑ dɑbi nɡe ɡbɑbu swɛ̃ɛ.

Bɛɛn sɔm kowobu bɑ dɑbi nɡe twee

yi yi sinɑ dɑ̃ɑ kikisɔ bururu.

Adɑmɑ ye sɔ̃ɔ u yɑrɑ mɑ yi yɔ̃ɔwɑ yi doonɑ,

bɑ ǹ tubɑ mi yi dɑ.

18 Wunɛ Asirin sinɑ boko,

wee wunɛn kpɑrobu bɑ dom yĩbirimɔ.

Wunɛn tɑbu durɔ dɑmɡibu bɑ ǹ mɑɑ wɑsi.

Mɑ wunɛn tɔmbu bɑ yɑrinɛ yɑm kpuro ɡuunu wɔllɔ,

ɡoo sɑri wi u koo bu kpɑɑsinɑ.

19 Goo kun wunɛn mɛɛrɑ ye nɔɔrimɔ.

Yɑ koo nun ɡowɑ.

Wi u nuɑ ye yɑ nun deemɑ, u koo tɑkɑ kowɑ nuku dobun sɔ̃.

Domi ɡoo sɑri wi ɑ ǹ nɔni sɔ̃ɔwɑ.