Yinni Gusunɔ, wunɑ nɑ wuri koosimɔ.

Wunɛ wi ɑ sɑ̃ɑ nɡe nɛn kpee bɑɑ mi nɑ rɑ kuke,

ɑ ku mɑn duɑri.

Domi ɑ̀ n mɑɑri mɛsum,

ko nɑ n sɑ̃ɑwɑ nɡe wi u ɡɔɔ dɔɔ.

2 Nɑ̀ n nɔmɑ yiiyɑ nɑ kɑnɑru mɔ̀ sɑ̃ɑ yee dɛɛrɑ ten mi,

ɑ nɛn kɑnɑru swɑɑ dɑkio.

3 A ku mɑn ɡɑrisi tiɑ kɑ tɔn kɔ̃sobu,

kɑ be bɑ mɑɑ kɑ ben winsim ɡɑri mɔ̀ nɡe kĩru,

ɑdɑmɑ ben ɡɔ̃ruɔ kɔ̃sɑ yɑ yibɑ.

4 A bu ben kookoosun ɑre wɛ̃ɛyɔ nɡe mɛ yi nɛ.

Ye bɑ ɡɑbu kuɑ, ɑ de yu wɔri ben wirɔ.

5 Domi bɑ ǹ ɡɑrɑ ye wunɛ Gusunɔ ɑ mɔ̀.

Yen sɔ̃, ɑ bu kɔsukuo kpɑ bu ku rɑɑ mɑɑ se.

6 Yinni Gusunɔ, wunɑ kon siɑrɑ,

domi ɑ rɑ nɛn kɑnɑru nɔ.

7 Wunɑ ɑ mɑn ɡɑnuɑ nɡe tɛrɛru,

ɑ sɑ̃ɑwɑ nɛn dɑm.

Wunɛ sɔɔrɑ nɛn nɑɑnɛ wɑ̃ɑ, domi ɑ mɑn fɑɑbɑ kuɑ.

Mɑ nɑ nuku dobu mɔ,

nɑ nun siɑrɑmɔ kɑ womusu.

8 Yinni Gusunɔ, ɑ sɑ̃ɑwɑ wunɛn tɔmbun dɑm.

Domi ɑ sɑ̃ɑwɑ nɡe kɑ̀rì, ɑ kɑ wi ɑ ɡɔsɑ fɑɑbɑ ko.

9 A wunɛn tɔmbu fɑɑbɑ koowo kpɑ ɑ bu domɑru kuɑ,

be, be bɑ sɑ̃ɑ wunɛn ɑrumɑni.

A bu kpɑro kpɑ ɑ bu nɔɔri sere kɑ bɑɑdommɑɔ.