2 Yinni Gusunɔ, wunɑ ɑ sɑ̃ɑ nɛn kuku yeru.

A ku de n sekuru wɑ.

A mɑn wɔro domi wunɑ ɑ sɑ̃ɑ ɡemɡii.

3 A mɑn swɑɑ dɑkio. A mɑn wɔro fuuku.

A de ɑ n sɑ̃ɑ nɛn kpee bɑɑ kɑ nɛn ɡbɑ̃rɑru

mi kon kpĩ n kuke, kpɑ n kɑ fɑɑbɑ wɑ.

4 A mɑn kpɑro kpɑ bu wɑ mɑ ɑ nɑɑnɛ mɔ,

kpɑ nɑ n kukuɑ wunɛn mi.

5 Mɛyɑ kɑɑ mɑn yɑrɑ sɑɑ tɑɑ ye bɑ mɑn bɛrien di,

domi wunɑ ɑ mɑn kɔ̃su.

6 Nɑ nun nɛn wɑ̃ɑru nɔmu sɔndiɑ,

domi wunɑ ɑ mɑn wɔrɑ Yinni Gusunɔ,

wunɛ wi ɑ nɑɑnɛ mɔ.

7 Nɑ be bɑ bũnu sɑ̃ɑmɔ tusɑ,

mɑ nɑ nun nɑɑnɛ sɑ̃ɑ.

8 Ko nɑ n wɑ̃ɑwɑ nuku dobu sɔɔ wunɛn durom sɑɑbu,

domi ɑ nɛn nɔni swɑ̃ɑru yɛ̃.

Mɛyɑ ɑ mɑɑ yɛ̃ nɡe mɛ nɑ nuki sɑnkire.

9 A mɑn wɔrɑ yibɛrɛbɑn nɔmɑn di.

Wee ɑ derɑ nɑ tii mɔ.

10 Yinni Gusunɔ, ɑ mɑn durom kuo.

Domi nɑ wɑ̃ɑ nuku sɑnkirɑru sɔɔ.

Nuku sɑnkirɑ te, tɑ derɑ nɛn bwɛ̃rɑ kɑ nɛn wuswɑɑ kɑ nɛn wɑsi kpuro burisinɛ.

11 Wɑhɑlɑ yɑ mɑn ɡoomɔ,

mɑ weeweenu derɑ nɑ tɔkɔ mɔ̀.

Nɛn dɑm mu doonɔ nɛn torɑrun sɔ̃,

mɑ nɛn ɡɔmɑ dwiiyɑmɔ.

12 Nɛn yibɛrɛbɑ bɑ mɑn sekuru doke,

mɑ be bɑ sɑ̃ɑ nɛɡibu bɑ tu sosimɔ.

Be bɑ mɑn yɛ̃, beyɑ bɑ nɛn bɛrum mɔ̀.

Bɑ̀ n kɑ mɑn yinnɑ swɑɑɔ, bɑ rɑ duki suwɑ.

13 Tɔmbɑ mɑn duɑri nɡe wi u ɡu.

Nɑ sɑ̃ɑwɑ nɡe ɡɑ̃ɑ ni bɑ kɔ̃.

14 Nɑ nɔɔmɔ kɔ̃sɑ ye tɔmbɑ ɡerumɔ nɛn sɔ̃.

Mɑ be bɑ mɑn sikerenɛ kpuron bɛrum mɑn mɔ̀.

Domi bɑ wesiɑnɑmɔ bu kɑ mɑn ɡo.

15 Adɑmɑ Yinni Gusunɔ, wunɑ nɑ nɑɑnɛ sɑ̃ɑ.

Domi wunɑ ɑ sɑ̃ɑ nɛn Yinni.

16 Nɛn siɑn wɑ̃ɑru kpuro wunɛn nɔmu sɔɔrɑ tɑ wɑ̃ɑ.

A mɑn wɔro sɑɑ nɛn yibɛrɛbɑ

kɑ be bɑ mɑn nɔni sɔ̃ɔmɔn nɔmɑn di.

17 A mɑn wunɛn yɑm bururɑm sɔ̃ɔsio.

A mɑn wɔro wunɛn durom sɔ̃.

18 Yinni Gusunɔ, nɑ̀ n nun sokɑ, ɑ ku de n sekuru wɑ.

Adɑmɑ ɑ de tɔn kɔ̃so u sekuru wɑ,

kpɑ u dɑ ɡɔribun wɑ̃ɑ yerɔ

ɡɔɔ u nùn nɔɔ mɑrisiɑ.

19 A ku de wee kowobu bu ɡɑri ɡere,

kɑ be bɑ tii suɑ ɡɑri mɔ̀, bɑ ɡɑbu ɡɛmɑ.

20 Yinni Gusunɔ, wunɛn durom mu kpɑ̃,

mɛ ɑ be bɑ nun nɑsie yiiye,

kɑ be bɑ ben nɑɑnɛ doke wunɛ sɔɔ.

Tɔmbu bɑ koo kpĩ bu wɑ durom mɛ ɑ rɑ bu kue.

21 Domi ɑ rɑ be bɑ nun nɑsie kɔ̃su,

kpɑ bɑ n wɑ̃ɑ wunɛn wuswɑɑɔ

bu ku kɑ du nɑɑnɑɑnu sɔɔ,

kpɑ ɑ bu bere wunɛn dirɔ tɔn kɔ̃sobun sɔ̃.

22 Yinni Gusunɔ, wunɑ kon siɑrɑ,

domi ɑ mɑn wunɛn durom sɔ̃ɔsi.

Nɑ rɑɑ sɑ̃ɑwɑ nɡe wuu ɡe bɑ tɑrusi,

23 sere nɛn lɑɑkɑri yɑ burisinɑ,

nɑ nɛɛ, wee ɑ mɑn ɡirɑ wunɛn wuswɑɑn di.

Adɑmɑ ɑ nɛn weeweenu nuɑ

sɑnɑm mɛ nɑ nɔɔɡiru suɑ nɑ nun sokɑ.

24 Yen sɔ̃, i Yinni Gusunɔ kĩɔ,

bɛɛ be i nùn nɑɑnɛ sɑ̃ɑ.

Domi u be bɑ nùn nɑɑnɛ doke kɔ̃su.

Adɑmɑ u rɑ be bɑ tii sue sɛɛyɑsie kɑ dɑm.

25 Bɛɛ be i yĩiyɔbu mɔ Yinni Gusunɔn mi,

i nukuru doro,

kpɑ i de bɛɛn bwɛ̃rɑ yu wurɑmɑ.