2 doo nɔɔruɡiiwɑ wi u rɑ sɑ̃ɑron bwisikunu ko.

Ù n wɑ̃ɑ wɑhɑlɑ sɔɔ, Yinni Gusunɔ u koo nùn yɑrɑ.

3 Yinni Gusunɔ u koo nùn kɔ̃su,

kpɑ u n win wɑ̃ɑru nɛni.

Mɛyɑ u ko n nuku dobu mɔ win wɑ̃ɑru sɔɔ.

U ǹ mɑɑ derimɔ u wɔri win yibɛrɛbɑn nɔmɑɔ.

4 Yinni Gusunɔwɑ u koo nùn kɔ̃su

kpɑ u nùn nɔɔri sɑnɑm mɛ u bɑrɔ u kpĩ.

5 Wee, nɑ ɡerumɔ nɑ mɔ̀,

Yinni Gusunɔ, ɑ nɛn wɔnwɔndu wɑɑwo,

ɑ nɛn hunde bɛkio.

Domi nɑ nun torɑri.

6 Nuku kɔ̃surun sɔ̃, nɛn yibɛrɛbɑ bɑ mɔ̀,

sɑɑ yerɑ̀ kon ɡbi.

Kpɑ bu wɑ bu nɛn yĩsiru duɑri.

7 Goo ù n nɑ nɛn mi, weesɑ yɛ̃ro u rɑ mɑn kue,

kpɑ u nɛn ɡɑri ɡurɑ u kɑ dɑ u nɛn kɔ̃sɑ ɡere tɔɔwɔ.

8 Nɛn yibɛrɛbɑ kpuro bɑ ɡunnu ɡunnu ɡɑri mɔ̀.

Bɑ mɑn kɔ̃sɑ bwisikusimɔ.

9 Domi bɑ mɔ̀, wɑhɑlɑ ye, yɑ mɑn nɛni ɡem kɑ tiɑ.

Nɛ wee nɑ kpĩ, n ǹ koorɔ n mɑɑ se.

10 Nɛn bɔrɔ kĩnɑsi, kɑ wì sɑ wɑ̃ɑ sɑnnu bɔri yɛndu sɔɔ,

nɑ mɑɑ nùn nɑɑnɛ sɑ̃ɑ, mɑ sɑ dimɔ sɑnnu,

wiyɑ u kuɑ nɛn yibɛrɛ.

11 Yen sɔ̃, Yinni Gusunɔ, ɑ nɛn wɔnwɔndu wɑɑwo,

ɑ mɑn wɔro, kpɑ n bu kuɑ ye n weenɛ n bu kuɑ.

12 Nɛn yibɛrɛ ù kun mɑn kɑmiɛ,

sɑɑ ye sɔɔrɑ kon ɡiɑ mɑ ɑ mɑn kĩ.

13 A mɑn kɔ̃su nɛn mɛm nɔɔbun sɔ̃.

Mɑ ɑ derɑ nɑ wɑ̃ɑ wunɛn mi sere kɑ bɑɑdommɑɔ.

14 Nɑ Gusunɔ Isirelibɑn Yinni siɑrɑ.

U ko n wɑ̃ɑwɑ sere kɑ bɑɑdommɑɔ. Ami.