55
1 Womu ɡe Dɑfidi u wom kowobun wiruɡii kuɑ kɑ mɔrɔku. Ge wee.
2 Yinni Gusunɔ, ɑ swɑɑ tem kpĩiyɔ ɑ nɛn kɑnɑru nɔ.
A ku mɑn biru kisi nɑ̀ n nun kɑnɑmɔ.
3 A nɛn lɑɑkɑri koowo kpɑ ɑ mɑn wisi.
Wee nɑ sirenɛ kɑ nuku sɑnkirɑru,
4 nɑ burisinɛ yibɛrɛbɑn ɡɑrin sɔ̃
kɑ tɔn kɔ̃sobun dɑm dɔrebun sɔ̃.
Tɔmbɑ mɑn kɔ̃sɑ kuɑmmɛ,
bɑ mɑn tɑɑrɛ wɛ̃ kɑ mɔru bɑkɑ.
5 Nɑ nuki sɑnkire too nɛn ɡɔ̃ruɔ.
Mɑ ɡɔɔn bɛrum mɑn nɛnuɑ.
6 Nɑ nɑndɑ sere nɑ diirimɔ.
7 Nɑ nɛɛ, nɑ̀ n dɑɑ kɑsɑ mɔ nɡe kpɑruko,
kon yɔ̃wɑ n dɑ n sinɑ nɑ n wɛ̃re.
8 Kon dukɑ yɑkurɑ n dɑ mi n tomɑ,
kpɑ nɑ n wɑ̃ɑ ɡbɑburɔ.
9 Kon dukɑ yɑkurɑ fuuku n kuku yeru kɑsu,
kpɑ ɡuru woo dɑmɡuu ɡu ku rɑɑ mɑn so.
10 Yinni, ɑ nɛn yibɛrɛbɑn kpunɑɑ kɑm koosio,
kpɑ bu ku nɔɔsinɑ.
Domi nɑ wɑɑmɔ tɔmbɑ wɔbiɑ kɑ sɑnnɔsu mɔ̀ wuuɔ
11 bɑ kɑ ɡen ɡbɑ̃rɑru sikerenɛ sɔ̃ɔ sɔɔ kɑ wɔ̃kuru.
Mɛyɑ kɔ̃sɑ bɑ mɔ̀ wuu ɡe sɔɔ.
12 Nuku kɔ̃suruɡibu kɑ ɡbɛnɔbu kɑ keetɑɡibɑ
bɑ yibɑ wuu ɡe sɔɔ.
13 Ǹ n yibɛrɛn nɑ u nɑ u mɑn wɔnwɑ,
nɑ ǹ ɡɑm ɡerumɔ.
Goo ù n mɑn tusɑ, kon kuke win sɔ̃.
14 Adɑmɑ wunɑ ɑ kuɑ mɛ,
wunɛ wi ɑ sɑ̃ɑ nɛn beruse kɑ nɛn bɔrɔ,
wunɛ wi nɑ rɑ nɛn ɑsiri sɔ̃.
15 Nɛ kɑ wunɛ, kĩi bɑkɑrɑ tɑ sun mɑninɛ,
mɑ sɑ dɔɔ sɑnnu Yinni Gusunɔn sɑ̃ɑ yerɔ.
16 A de ɡɔɔ u tɔn kɔ̃sobu sɛ̃re subɑru sɔɔ,
kpɑ bu dɑ ɡɔribun wɑ̃ɑ yerɔ wɑsiru.
Domi nuku kɔ̃surɑ yibɑ ben swɑɑ sɔɔ.
17 Adɑmɑ Yinni Gusunɔ, wunɑ nɑ fɑɑbɑ kɑnɑmɔ.
Kɑɑ mɑɑ mɑn fɑɑbɑ ko.
18 Tɔ̃ɔ ɡiriru kpuro, nɑ rɑ n weeweenu mɔ̀wɑ.
Mɛyɑ ɑ mɑɑ nɛn nɔɔ nɔɔmɔ.
19 A ǹ kɑɑ de yibɛrɛbɑ bu mɑn nɔmɑ turi bɑɑ mɛ bɑ dɑbi.
Kɑɑ mɑn bɔri yɛndu wɛ̃.
20 Yinni Gusunɔ, wunɛ wi ɑ sɔ̃ wunɛn sinɑ ɡɔnɑɔ sere kɑ bɑɑdommɑɔ,
wunɑ kɑɑ nɛɡii nɔ, kpɑ ɑ bu sekuru doke.
Domi n ǹ koorɔ bu ɡɔ̃ru ɡɔsiɑ
yèn sɔ̃ bɑ ǹ nun nɑsie.
21 Bɑ wi u kɑ bu wɑ̃ɑ bɔri yɛndu sɔɔ sɑnnɔ wɔri.
Bɑ ɑrukɑwɑni ye u kɑ bu bɔkuɑ kusiɑ.
22 Gɑri doriyɑ yi rɑ n wɑ̃ɑ tɔn kɔ̃so win nɔɔwɔ.
Adɑmɑ tɑbun ɡɑriyɑ yi rɑ n wɑ̃ɑ win nukurɔ.
Mɛyɑ mɑɑ win ɡɑri yi rɑ n kokumɔwɑ nɡe ɡum yɑrum.
Adɑmɑ yi rɑ n sɑ̃ɑwɑ nɡe tɑkobibɑ.
23 A wunɛn wɑ̃ɑru kpuro Yinni Gusunɔ nɔmu sɔndio,
kpɑ u nun nɔɔri.
Domi u ǹ derimɔ ɡemɡii u wɔrumɑ.
24 Yinni Gusunɔ, wunɑ kɑɑ de tɔn kɔ̃sobu bu dɑ ɡɔribun wɑ̃ɑ yerɔ.
Kpɑ tɔn ɡowobu kɑ be bɑ bwisi kɔ̃si mɔ bu ɡbi sɛkum.
Adɑmɑ nɛ, wunɑ nɑ nɑɑnɛ sɑ̃ɑ, Yinni Gusunɔ.