60
(I mɑɑ mɛɛrio nɑɑsu 7-14, 108:7-14)
1 Womu ɡe Dɑfidi u wom kowobun wiruɡii kuɑ kɑ mɔrɔku. U ɡu kuɑwɑ u kɑ keu sɔ̃ɔsi. 2 Womu ɡe, Dɑfidin tɑbɑ ɡɑ kɑ yɑ̃ bi u kɑ Siriɡii be bɑ wɑ̃ɑ Mɛsopotɑmiɔ kɑ Sobɑɔ kuɑ. Ye Dɑfidi u tɑɑ bi wee, win tɑbu sunɔ Yoɑbu u Edɔmun tɑbu kowobu ɡowɑ nɔrɔbun subɑ wɔkurɑ yiru (12.000) wɔwɑ ɡɑɑ sɔɔ ye bɑ mɔ̀ Bɔru. Womu ɡe wee.
3 Gusunɔ, wee ɑ sun yinɑ mɑ ɑ sun yɑrinɑsiɑ.
Bɑɑ mɛ ɑ mɔru sɑ̃ɑ, ɑ sun seeyo.
4 A derɑ tem mu yĩirɑ mɑ mu bɛsikirɑ.
A mu kpɑɑsinɔ domi mu kɑnkirɑmɔ.
5 A derɑ wunɛn tɔmbɑ nɔni sɔ̃ɔrɑ,
mɑ bɑ tɑm nɔrɑ mu ben wiru ɡɔsiɑ.
6 Be bɑ nun nɑsie, berɑ ɑ wunɛn ɡidi bɔrɑ wɛ̃,
kpɑ yu sɔ̃ɔsirɑ ɡem sɔ̃.
7 A sun wɔro kɑ wunɛn dɑm.
A bɛsɛn kɑnɑru nɔɔwɔ,
kpɑ su fɑɑbɑ wɑ bɛsɛ wunɛn kĩnɑsibu.
8 Gusunɔ u ɡeruɑ win sɑ̃ɑ yee dɛɛrɑrɔ u nɛɛ, u koo nɑsɑrɑ wɑ.
U koo Sikɛmu bɔnu ko kpɑ u tɔmbu Sukɔtun wɔwɑ yɑbuɑ.
9 Wiyɑ u Gɑlɑdi mɔ. Wiyɑ u mɑɑ Mɑnɑse mɔ.
Efɑrɑimu yɑ sɑ̃ɑwɑ nɡe win sii furɔ kɔkɔru.
Mɑ Yudɑ yɑ sɑ̃ɑ nɡe win sinɑ dɛkɑ.
10 Adɑmɑ Mɔɑbu yɑ sɑ̃ɑwɑ win woburutiɑ.
U koo Edɔmu bɑrɑ nɔɔ teu kɔ̃ɔwɑ u kɑ sɔ̃ɔsi mɑ yɑ kuɑ wiɡiɑ.
Filisitibɑ bɑ koo nùn nɑsɑrɑn kuuki koosi kɑ nuku dobu.
11 Wɑrɑ u koo kɑ mɑn dɑ wuu ɡbɑ̃rɑruɡuu ɡen mi.
Wɑrɑ u koo mɑn kpɑrɑ u kɑ dɑ Edɔmuɔ.
12 Yinni Gusunɔ, wunɑ kɑɑ kɑ mɑn dɑ, wunɛ wi ɑ rɑɑ sun yinɑ,
mɑ ɑ ku rɑ mɑɑ kɑ bɛsɛn tɑbu kowobu yɑri.
13 A sun somiɔ su kɑ yɑri nɔni swɑ̃ɑrun di.
Tɔnun somiru tɑ sɑ̃ɑwɑ wom dirum.
14 À n wɑ̃ɑ kɑ bɛsɛ, sɑ ko kpĩ su tɑbu ko kɑ wɔruɡɔru.
Kpɑ ɑ bɛsɛn yibɛrɛbɑ kɔsuku.