1 ɑ ɡɔsirɑmɑ, ɑ ɡɔsirɑmɑ, Sunɛmun bii,

ɑ ɡɔsirɑmɑ su nun mɛɛri.

Mbɑn sɔ̃nɑ i nɛ Sunɛmun bii mɛɛrɑ

nɡe wi u yɑɑmɔ tɔn wuunu yirun bɑɑ sɔɔ.

2 wɔndiɑ bɛɛrɛɡii, wunɛn nɑɑsu su wɑ̃ sɑlubɑtɑ sɔɔ.

Wunɛn pɔrɑ yɑ wɑ̃wɑ nɡe sɑbɑ.

Wi u ye kuɑ mɔmɔn tiiwɑ.

3 Wunɛn bwĩirun ɡirɑ yerɑ sɑ̃ɑwɑ bwɛrɛrɛ nɡe nɔrɑn nɔɔ

ye yɑ ku rɑ tɑm kpe.

Wunɛn bɔsɔ ɡɑ swɛ̃ri nɡe ɑlikɑmɑ ye bɑ kɑ biibii sikerenɛ.

4 Wunɛn bwɑ̃su sɑ̃ɑwɑ nɡe yɑɑ kpikun binu yiru.

5 Wunɛn wĩiru tɑ buririwɑ nɡe suunu donnu.

Wunɛn nɔni yi dɛɛrewɑ nɡe Hɛsibonin yɛru

si su wɑ̃ɑ wuu bɔkɔ ɡen kɔnnɔn bɔkuɔ.

Wunɛn wɛ̃ru tɑ dɛndewɑ mɑm mɑm nɡe Libɑnin kɔ̃su yeru

te tɑ Dɑmɑsi mɛɛrɑ.

6 Wunɛn wirɑ suɑrewɑ nɡe ɡuu te bɑ mɔ̀ Kɑɑmɛli.

Mɑ wunɛn tɑrɑ yɑ bɑllimɔ nɡe beku ɡobiɡiru

sere yɑ sinɑ bokon bwɛ̃rɑ kpuro mwɑ.

7 Wunɛn burɑm bɑndɑ, ɑ mɑn wɛ̃re too.

Wunɛ sɔɔrɑ nɛn kĩru kpuro wɑ̃ɑ.

8 Wunɛn wɑsi yi dɛndewɑ nɡe kpɑkpɑ bɑ̃ɑ.

Wunɛn bwɑ̃su su sɑ̃ɑwɑ nɡe dɑ̃ɑ mɑrum swɑɑru.

9 Nɑ nɛɛ, kon kpɑkpɑ yɔwɑ kpɑ n yen mɑrum nɛnɛ.

Wunɛn bwɑ̃su su sɑ̃ɑwɑ nɡe resɛm swɑɑru.

Wunɛn wɛ̃siɑru tɑ nuburu do nɡe dɑ̃ɑ mɑrum mɛ bɑ mɔ̀ pɔmu.

10 Nɑ̀ n nun sɔ̃su, nɑ rɑ n nuku dobu mɔ nɡe wi u tɑm durom nɔrɑ.

tɑm mɛ, mu kokuo nɛn kĩnɑsin sɔ̃

mu du win nɔɔ sɔɔ ù n dweeyɑmɔ.

11 Nɑ sɑ̃ɑwɑ nɛn kĩnɑsiɡii,

mɑ win kĩru kpuro wɑ̃ɑ nɛ sɔɔ.

12 nɛn kĩnɑsi, ɑ yɑrimɑ su dɑ bɑru kpɑɑnɔ kpɑ sɑ n wɑ̃ɑ mi.

13 Bururu sɑ ko se su dɑ dɑ̃ɑ ɡbɑɑrɔ,

su wɑ resɛm tɔ̃kɑ kɑ dɑ̃ɑ te bɑ mɔ̀

ɡerenɑdi yɑ̀ n kpɑre yɑ wɛ̃su sɑ̃ɑ.

Miyɑ kon nun kĩru sɔ̃ɔsi.

14 Dɑ̃ɑ te bɑ mɔ̀ mɑndɑrɑɡore tɑ ten turɑre yɛ̃kɑmɔ.

Bɛsɛn yɛnu kɔnnɔwɔ, sɑ dɑ̃ɑ mɑrum kpuro mɔ mɛ mu dobu bo,

ɡinɑkuɡim kɑ ɡisɔku ɡeɡim.

Nɑ mɛ kpuro yii wunɛn sɔ̃ nɛn kĩnɑsi.