14
1 Bɛɛ Yerusɑlɛmuɡibu, Yinni Gusunɔn tɔ̃rɑ wee.
Bɑ koo bɛɛn yɑ̃nu ɡurɑ bu bɔnu ko bɛɛn nɔni biru.
2 U koo bwesenu kpuro mɛnnɑ nu kɑ Yerusɑlɛmu wɔri.
Bɑ koo ye mwɑ kpɑ bu yen yɛnusu dɔ̃ɔ sɔku.
Bɑ koo kɑ yen tɔn kurɔbu kpunɑ kɑ dɑm.
Kpɑ bu yen tɔmbun bɔnu yoru mwɛɛri bu kɑ doonɑ.
Adɑmɑ bɑ ǹ be bɑ tie ɡoomɔ.
3 Sɑɑ ye sɔɔrɑ Yinni Gusunɔ u koo tii sɔ̃ɔsi
kpɑ u kɑ bwese ni tɑbu ko nɡe mɛ u rɑ ko tɑbu sɔɔ.
4 Yen tɔ̃ɔ te, u koo win nɑɑsu sɔndi Olifin ɡuurɔ
te tɑ wɑ̃ɑ Yerusɑlɛmun dee deeru, sɔ̃ɔ yɑri yeru ɡiɑ.
Olifin ɡuu te, tɑ koo bɛsirɑ suunuɔ
sɑɑ sɔ̃ɔ yɑri yerun di sere sɔ̃ɔ duu yerɔ.
Wɔwi bɑkɑ yɑ koo yɑri ten suunu sɔɔ.
Guu ten bee tiɑ yɑ koo dɑ sɔ̃ɔ yɛ̃sɑn nɔm ɡeu ɡiɑ
kpɑ bee tiɑ yu mɑɑ dɑ sɔ̃ɔ yɛ̃sɑn mɔm dwɑru ɡiɑ.
5 Sɑɑ ye sɔɔ, i ko i duki dɑwɑ win ɡuunun wɔwɑ sɔɔ.
Domi wɔwɑ ye, yɑ ko n wɑ̃ɑwɑ sere Atisɛliɔ.
I ko i duki suwɑ nɡe mɛ i rɑɑ kuɑ
sɑnɑm mɛ tem yĩiribu bɛɛ deemɑ
Osiɑsi Yudɑbɑn sinɑ bokon wɑɑti.
Sɑɑ ye sɔɔrɑ Gusunɔ nɛn Yinni u koo nɑ kɑ win tɔn dɛɛrobu.
6 Yen tɔ̃ɔ te, yɑm bururɑm mu ǹ ko n mɑɑ wɑ̃ɑ.
Purɑ yɑ ko n wɑ̃ɑ kɑ sere mɑɑ nim mɛ mu ɡɔsirɑ nɡe kperu.
7 Tɔ̃ɔ te, tɑ ko n sɑ̃ɑwɑ nɛnɛm te Yinni Gusunɔ u yɛ̃.
Bɑ ǹ wɔ̃kuru kɑ sɔ̃ɔ sɔɔ wunɑnɑmɔ.
Adɑmɑ yokɑ, yɑm bururɑm mu koo sɔ̃ɔsirɑ.
8 Yen tɔ̃ɔ te, nim ɡem mu koo yɑri Yerusɑlɛmun di
kpɑ mɛn sukum mu koku mu dɑ nim wɔ̃kuɔ
ɡe ɡɑ wɑ̃ɑ sɔ̃ɔ yɑri yeru ɡiɑ,
kpɑ sukum mu dɑ nim wɔ̃ku ɡe ɡɑ wɑ̃ɑ sɔ̃ɔ duu yeru ɡiɑ.
Nɡe mɛyɑ n ko n sɑ̃ɑ sɔ̃ɔ sɑ̃reru kɑ ɡurɑn sɑɑ.
9 Yinni Gusunɔwɑ u ko n sɑ̃ɑ tem kpuron sunɔ.
Wi turowɑ u ko n sɑ̃ɑ Yinni.
Win turon yĩsirɑ tɔmbu kpuro bɑ koo ɡiɑ.
10 Isirelibɑn tem kpuro mu koo ɡɔsiɑ wɔwɑ
sɑɑ Gebɑn di sɔ̃ɔ yɛ̃sɑn nɔm ɡeu ɡiɑ
n kɑ dɑ Rimɔɔwɔ Yerusɑlɛmun sɔ̃ɔ yɛ̃sɑn nɔm dwɑru ɡiɑ.
Sɑɑ ye sɔɔ, Yerusɑlɛmu yɑ koo yĩsiru yɑri
kpɑ yɑ n wɑ̃ɑ yen ɑyerɔ.
Yɑ ko n wɑ̃ɑwɑ sɑɑ kɔnnɔ ɡe bɑ mɔ̀ Bɛnyɑmɛɛn di,
n kɑ dɑ kɔnnɔ ɡbiikuuɔ,
sere kɑ kɔnnɔwɔ ɡe bɑ mɔ̀ ɡɑni ɡɔmbunu.
Sɑɑ mɑɑ kɔ̃su yee te bɑ mɔ̀ Hɑnɑnɛɛlin di,
n kɑ ɡirɑri sinɑ bokon resɛm ɡɑmɑ yerɔ.
11 Tɔmbɑ koo sinɑ ye sɔɔ.
Bɑ ǹ mɑɑ ye kɑm koosiɑmɔ.
Yɑ ko n wɑ̃ɑwɑ bɔri yɛndu sɔɔ.
12 Wee nɔni swɑ̃ɑ te Yinni Gusunɔ u koo tɔmbu kpɛ̃ɛ
be bɑ Yerusɑlɛmu tɑbu wɔri.
Ben wɑsi koo kɔ̃siwɑ bɑ n kɑ sĩimɔ.
Ben nɔni yi koo kɔ̃si ben nɔni wɔrusu sɔɔ,
kpɑ ben yɑri yi kɔ̃si ben nɔsɔ.
13 Yen tɔ̃ɔ te, nɛ, Yinni Gusunɔ kon wɑhɑlɑ bɑkɑ doke ben suunu sɔɔ.
Kpɑ bu wɔrinɑ bu soonɑ.
14 Yudɑbɑ bɑ koo tɑbu ko Yerusɑlɛmuɔ,
kpɑ bu bwese tuku ni nu kɑ bu sikerenɛn dukiɑ ɡurɑmɑ.
Yerɑ, wurɑ kɑ sii ɡeesu kɑ yɑ̃ɑ dɑbinu.
15 Nin dumi kɑ nin birɑkɔsu
kɑ nin yooyoosu kɑ nin kɛtɛkunu
kɑ sere mɑɑ yɑɑ sɑbe ni nu wɑ̃ɑ mi,
kpuro nu koo dumɡbɛku mwɑɑrɑ.
Dumɡbɛku tiɑ yerɑ yɑ koo nu deemɑ.
16 Bwese ni nu rɑɑ Yerusɑlɛmu ye wɔri,
nin ni nu tie, nu ko n dɑ nɛwɑ wɔ̃ɔ bɑɑɡere
nu yiirɑ Gusunɔ sinɑ bokon wuswɑɑɔ,
wi u sɑ̃ɑ wɔllu kɑ tem Yinni,
kpɑ nu Kunun tɔ̃ɔ bɑkɑru ko.
17 Bweseru ɡɑru tɑ̀ kun de
tu Gusunɔ sinɑ boko wi u sɑ̃ɑ wɔllu kɑ tem Yinni yiirɑ
tu sɑ̃ Yerusɑlɛmuɔ,
ɡurɑ kun nɛmɔ ten temɔ.
18 Eɡibitiɡibu bɑ̀ kun de Yerusɑlɛmuɔ
bu kɑ Kunun tɔ̃ɔ bɑkɑru ko,
ɡurɑ kun nɛmɔ ben temɔ.
U koo bu wɑhɑlɑ dokewɑ
nɡe bwese ni nu yinɑ nu dɑ
nu Kunun tɔ̃ɔ bɑkɑru ko.
19 Nɡe mɛyɑ u koo Eɡibitiɡibu kɑ bwese ni nu yinɑ nu Kunun tɔ̃ɔ bɑkɑru dɑ Yerusɑlɛmuɔ kuɑ.
20 Yen tɔ̃ɔ te, bɑ koo dumin yɑnɡirenu sɔɔ yore bu nɛɛ, Yinni Gusunɔɡiɑ.
Sɑ̃ɑ yerun wekenu kpuro nu ko n sɑ̃ɑwɑ nɡe yɑ̃ku yerun ɡbɛ̃ɑ.
21 Wekenu kpuro nu ko n sɑ̃ɑwɑ Gusunɔ, wɔllu kɑ tem Yinniɡinu Yerusɑlɛmuɔ kɑ Yudɑɔ.
Be bɑ koo yɑ̃kuru nɑ,
berɑ bɑ ko n dɑ nu sue
bu kɑ ben yɑ̃ku yɑɑ yike.
Yen tɔ̃ɔ te sɔɔ, bɑ ǹ mɑɑ tenkubɑ wɑsi sɑ̃ɑ yeru mi,
bɑ n yɑ̃nu dɔrɑmɔ.