1 Kɔ Kanu Kəpɔŋ kəmbaŋ Sara pəmɔ tɔkɔ kənaloku ti mɔ, kɔ Kanu kəlasɛ kɔ dim dɔkɔ kənasɔŋ kɔ mɔ. 2 Kɔ Sara ɛmbɛkəs, k'oŋkomɛ Abraham wan wərkun detem dɔn disrɛ, tɛm tatɔkɔ Kanu kənaboŋcər kɔ mɔ. 3 Kɔ Abraham ewe wan wərkun nwɛ Sara oŋkomɛ kɔ mɔ «Isiyaka.» 4 Kɔ Abraham ɛŋkəŋc Isiyaka wan kɔn wərkun nwɛ tataka ta camət-maas tɔn, pəmɔ tɔkɔ Kanu kənasom kɔ ti mɔ. 5 Abraham ɛnasɔtɔ meren 100, ntɛ aŋc-kom wan kɔn Isiyaka mɔ. 6 Kɔ Sara oloku: «Kanu kəsɔŋ' em kəselsər. Nwɛ o nwɛ ene kəkom kem Isiyaka mɔ, tɔŋyɔ kɔ mesel.» 7 K'endeŋər: «An' ɛnatam kəsɔŋɛ Abraham kəlaŋ a Sara endemɛsər awut-ɛ? Mba iŋkomɛ kɔ wan wərkun detem dɔn disrɛ.»

8 Kɔ wan ɛmbɛk k'awurɛ kɔ mɛsɛ. Kɔ Abraham omboc kəsata kəpɔŋ dɔsɔk ndɛ awurɛ Isiyaka mɛsɛ mɔ. 9 Kɔ Sara ɛnəŋk wan wərkun, nwɛ wəran wəMisira Hakar ɛnakomɛ Abraham mɔ, pəc-sel. 10 Kɔ Sara oloku Abraham: «Məbɛləs wan wəran wəcar nwɛ kɔ wan kɔn wərkun. Bawo wan ka wəcar wəkawɛ ŋafɔdepaŋnɛ kɛ kɔ wan kem.» 11 Kɔ toloku tatɔkɔ tɛntɛlɛ Abraham bel-bel teta wan kɔn. 12 Mba kɔ Kanu kəloku Abraham: «Ta tɛtɛl' am teta wan kam wərkun kɔ kɛrɛ, wəcar kam. Məwosɛnɛ Sara ntɛ o ntɛ ɛŋfaŋər əm mɔ. Bawo nnɔ Isiyaka eyi mɔ, məndesɔtɔ yuruya nyɛ yendetɔmpər tewe tam mɔ. 13 Indeyɔnɛ sɔ wan ka wəcar kam atɔf. Bawo nkɔn sɔ yuruya yam y' ɔyɔnɛ.»

14 Kɔ Abraham ɛyɛfɛ bət-bət suy, k'ɛlɛk kəcom, k'ɛlas apampɛ domun k'ɔsɔŋ Hakar, k'ɛndəŋsər kɔ wan, k'ɛmbɛləs ŋa. Kɔ Hakar ɔŋkɔ pəyi Tɛgbɛrɛ ta Bɛrseba. 15 Ntɛ apampɛ ŋelip domun mɔ, kɔ Hakar ɛsak wan tɔtɔk dəntɔf. 16 K'ɛŋkafələr k'ɔŋkɔ pəndɛ kəsək pəc-cɔpəsnɛ: «Ifaŋ fɛ kəgbətənɛ wan kem pəc-fi.» K'ɔŋkɔ pəndɛ pəbɔlɛnɛ kɔ dobolu da kələm ka ambəŋcəran katin pətɛfərnɛ kɔ, pəc-bok. 17 Kɔ Kanu kəne wan dim, kɔ mɛlɛkɛ ma Kanu mewe Hakar dareŋc kɔ meyif kɔ: «Ak' ɔyɔ əm-ɛ Hakar? Ta mənesɛ! Bawo Kanu kəne wan kam dim nde eyi mɔ. 18 Məyɛfɛ məlɛk wan, məsumpər kɔ waca mɛrəŋ, bawo afum alarəm ŋ' indesɔŋ kɔ.» 19 Kɔ Kanu kəmepi Hakar fɔr k'ɛnəŋk kələmp. K'ɔŋkɔ pəlas apampɛ domun, k'ɔsɔŋ wan k'omun. 20 Kɔ Kanu kəmbum wan nwɛ ɛŋc-bɛk, pəyi dətɛgbɛrɛ mɔ, k'ende pəyɔnɛ wəpɛnɛ mbəŋcəran. 21 Kɔ Səmayila ɛmbɛk dəndo tɛgbɛrɛ ta Paran, kɔ kɛrɛ ɛntɛnɛ kɔ wəran wəMisira.

22 Tɛm tatɔkɔ, Abimɛlɛk ŋasol kɔ Pikɔl, wəbɛ wəka asɔdar ɔn, k'ende pəloku Abraham: «Kanu kəsol am mes mmɛ məŋyɔ mɔ fəp. 23 Mədɛrəm' em oŋ ma nnɔ, məckornɛ Kanu a məfɔdetiŋkər im, məfɔdesɔtiŋkər awut em, məfɔtiŋkər awut-sɔ em, kɔ məndetɔmpər em kɔ atɔf nŋɛ məyi mɔ abəkəc ŋosoku, pəmɔ layidi ndɛ intɔmpər' am mɔ.» 24 Kɔ Abraham oloku: «Indɛrəm am ti.» 25 Mba kɔ Abraham ɛnal Abimɛlɛk teta kələmp nkɛ acar a Abimɛlɛk ŋanabaŋɛ fənɔntər mɔ. 26 Kɔ Abimɛlɛk oloku: «Iŋcərɛ fɛ nwɛ ɛnayɔ tɔyɔ tatɔkɔ mɔ: Mənasɔŋɛ f' em ti kəcərɛ, mɔkɔ məndesɔŋ' em oŋ ti kəcərɛ.» 27 Kɔ Abraham ɛlɛk ŋkesiya, cir kɔ cəna, k'ɔsɔŋ yi Abimɛlɛk. Kɔ ŋaluksərnɛ kɔ ŋasek danapa mɛrəŋ maŋan. 28 Kɔ Abraham ɛŋcəmbər kəsək cir cəyecəra camət-mɛrəŋ ca yɔcɔl yɔn. 29 Kɔ Abimɛlɛk eyif Abraham: «Cir camət-mɛrəŋ ca ake cɔ məŋcəmbər kəsək-ɛ?» 30 K'Abraham oloku Abimɛlɛk: «Məwosɛ kəbaŋ cir caŋcɛ tɔyɔnɛ kəmentər a in' ɛnakay kələmp kaŋkɛ.» 31 Ti tɔ awenɛ tofo tatɔkɔ «Bɛrseba», bawo dəndo kəfo kaŋkɔ kɔ ŋanadɛrəmɛnɛ. 32 Kɔ ŋantəŋnɛ kəsek danapa dəndo Bɛrseba. Kɔ tɛyɛfɛ dənda, Abimɛlɛk kɔ Pikɔl wəbɛ ka asɔdar ɔn ŋayɛfɛ, kɔ ŋalukus atɔf ŋa aPɛlɛsɛt. 33 Kɔ Abraham ɔmbɔf abet * kətɔk nkɛ kəwurɛnɛ «tumbunyi» mɔ. Bɛrseba, k'oŋkornɛ Kanu Kəpɔŋ nkɛ kəntɔlip doru o doru mɔ. 34 K'Abraham eŋcepərɛnɛ tɛm tobolu atɔf ŋa aPɛlɛsɛt.