1 Kɔ Yakuba ene mɛcɛm-cɛmnɛ ma awut a Labaŋ, ŋac-loku: «Yakuba ɛlɛk daka da papa wəkosu fəp, di dɔsɔŋɛ kɔ kəyɔnɛ ka wəka daka dandɛ fəp.» 2 Kɔ Yakuba ɛŋgbɛkərɛ fɔ kəro ka Labaŋ kəyi fɛ sɔ nnɔ eyi mɔ, pəmɔ tɔkɔ pənayi cɔkɔ-cɔkɔ mɔ. 3 Kɔ Kanu Kəpɔŋ kəloku Yakuba: «Məlukus atɔf ŋa awisi aŋa, dəŋkom dam. Isol' am.» 4 Kɔ Yakuba ewe Rasɛl kɔ Leya aŋɛ ŋanayi dalɛ ŋackɛk yɔcɔl yɔn cir kɔ ŋkesiya mɔ. 5 K'oloku ŋa: «Iŋgbɛkərɛ fɔ, kəro ka papa konu kəyi fɛ sɔ nnɔ iyi mɔ, pəmɔ tɔkɔ pənayi cɔkɔ-cɔkɔ mɔ. Mba Kanu ka papa kem kəsol' em. 6 Nəŋcərɛ nəna yati a imbəcɛ papa konu kɔ fənɔntər fem fəp. 7 Mba papa konu ɛŋkafəli-kafəli, k'eŋcepɛ-cepɛ kəway kem haŋ wəco. Mba Kanu kəwosɛ fɛ kɔ kəyɔ em pəlɛc. 8 Pənaloku fɔ yɛtɛmsər yɔyɔnɛ kəway kam-ɛ, kɔ yɔcɔl fəp yɛnader yockoməs awut atɛmsər. Pənaloku sɔ fɔ ya cəgbɛr yɔyɔnɛ kəway kam-ɛ, yɔcɔl fəp kɔ awut a cəgbɛr yɔ yɛnader yockoməs. 9 Kanu kəmbaŋ yɔcɔl yɔn nnɔ papa konu eyi mɔ, kɔ kəsɔŋ im. 10 Tɛm ntɛ yɔcɔl yɛŋcfaŋ kəcɛcɛnɛ mɔ, k'iyekti fɔr dareŋc, k'iwɛrəp a yɔcɔl yorkun nyɛ yɛŋc-cɛc yɛran mɔ, yɛnayɔ cəgbɛr, yɛtɛmsər, yɛcɛmcɛmər. 11 Kɔ mɛlɛkɛ ma Kanu molok' im dəmere: ‹Yakuba!› K'iwosɛ: ‹In' ɛwɛ!› 12 Kɔ mɛlɛkɛ molok' im: ‹Məyekti fɔr məmɔmən. Yɔcɔl yorkun fəp nyɛ yeyi kəcɛc yɛran mɔ, yɔyɔ cəgbɛr kɔ yɛntɛmsər kɔ yɛcɛmcɛmər. Bawo inəŋk mɔyɔ mɔkɔ Labaŋ ɔyɔ əm mɔ fəp. 13 In' ɔyɔnɛ Kanu ka Betel, nde mənacəmbər tasar, kɔ məloŋər pi moro mɔ, nde mənasɔŋ im temer mɔ. Ndɛkəl oŋ, məyɛfɛ atɔf ŋaŋɛ, məlukus dəŋkom dam.›» 14 Rasɛl kɔ Leya ŋaloku kɔ: «Mba səyɔ sɔ kɛ nnɔ kəlɔ ka papa kosu? 15 Mba ɔlɔm fɛ su oŋ pəmɔ acikəra ba, bawo ɛŋcaməs su, k'endi pəsam posu. 16 Daka ndɛ Kanu kəmbaŋər papa kosu mɔ fəp, dendeyɔnɛ oŋ dosu k'awut asu. Məyɔ tɔkɔ Kanu kəlok əm mɔ fəp.» 17 Kɔ Yakuba ɛyɛfɛ, k'ɛndəs awut ɔn yɔkɔme kəroŋ kɔ aran ɔn. 18 Kɔ Yakuba osolɛ yɔcɔl yɔn kəkɛk, kɔ daka dɔn fəp ndɛ ɛnasɔtɔ mɔ, yɔcɔl nyɛ ɛnasɔtɔ Padaŋ-Aram mɔ, k'ɔŋkɔ ndena papa kɔn Isiyaka, atɔf ŋa Kanahan. 19 Kɔ Labaŋ ende pəkɔ kəgbɛt-gbɛt ŋkesiya yɔn. Kɔ Rasɛl eŋkiyɛ mɛrəŋka ma papa kɔn Labaŋ. 20 Kɔ Yakuba nkɔn entiŋkər Labaŋ wəAram kəkɔ kɔn, ta elembərnɛ kɔ-ɛ. 21 Kɔ Yakuba ɛyɛksɛ kɔ daka dɔkɔ ɛnayɔ mɔ fəp, k'ɛyɛfɛ k'empimnɛ kəŋgbɔkɔ, k'ɛntɛfərnɛ mɔrɔ ma Kalahadu.

22 Tataka ta maas, k'aloku Labaŋ a Yakuba ɛyɛksɛ. 23 Kɔ Labaŋ ɛlɛk awɛŋc aŋa kɔ ŋaŋcəmɛ Yakuba darəŋ kəkɔt ka mata camət-mɛrəŋ, kɔ ŋambəp kɔ nde mɔrɔ ma Kalahadu. 24 Kɔ Kanu kənder Labaŋ wəAram dəmere ma pibi, kɔ Kanu kəloku kɔ: «Məkɛmbərnɛ kəlok-lokər Yakuba.» 25 Kɔ Labaŋ ɛmbəp Yakuba pəcəmbər abal ŋɔn tɔrɔ kəroŋ. Kɔ nkɔn sɔ dəmnɛ ɛŋcəmbər abal ŋɔn kɔ awɛŋc aŋa tɔrɔ ta Kalahadu kəroŋ. 26 Kɔ Labaŋ eyif Yakuba: «Cəke cɔ məyɔ tantɛ-ɛ? Ta ake tɔ məntiŋkər' em-ɛ, məkekərɛ awut em aran pəmɔ afum aŋɛ aŋsumpər dəkəwan mɔ-ɛ? 27 Ta ake tɔ məŋgbɔpnɛnɛ kɔ məyɛksɛ-ɛ? Məntiŋkər f' em ba, məyɛksər f' em ba? K'inasak əm məkɔ pəbotu disrɛ, pac-leŋəs, pac-fula pac-fer. 28 Məwosɛ f' em kəcup awut-sɔ em arkun kɔ awut em aran! Tantɛ taŋ məmbut amera. 29 Intam kəyɔ əm pəlɛc, mba Kanu ka papa kam kəlokus' em nendisna: ‹Məkɛmbərnɛ kəloku ka Yakuba pəlɛc!› 30 Bawo pəŋwon əm kəkɔ ndena papa kam, ta ake tɔ məŋkiyɛnɛ canu cem-ɛ?» 31 Kɔ Yakuba oloku Labaŋ: «Indenanesər-nesər ti kəcɛm-cɛmnɛ fɔ, məndebaŋər im awut am aran. 32 Mba məmɔmən nwɛ o nwɛ məŋnəŋkɛ canu cam afum em dacɔ mɔ, wəkakɔ eŋfi! Awɛŋc asu aŋa fɔr kiriŋ məmɔmən məlɛk mpɛ o mpɛ pɔyɔnɛ pam mɔ məkekərɛ.» Mba Yakuba ɛnacərɛ fɛ a Rasɛl eŋkiyər Labaŋ canu ca kusuŋka kəŋan. 33 Kɔ Labaŋ ɛmbɛrɛ abal ŋa Yakuba, k'owur k'ɛmbɛrɛ ŋa Leya, k'owur k'ɛmbɛrɛ abal ŋa acar aran aŋɛ mɛrəŋ, ɛnəŋk fɛ daka o daka. Kɔ Labaŋ ɛmbɛrɛ abal ŋa Rasɛl disrɛ. 34 Rasɛl pəlɛk mɛrəŋka pəboc mi dəntɔf, k'ɛlɛk dɔcɔm ndɛ aŋnɔnɛ yɔkɔmɛ kəroŋ mɔ k'endeŋər, k'ɛyɛfɛ k'ɛndɛ di kəroŋ. Kɔ Labaŋ efen-feni abal disrɛ fəp ɛnəŋk fɛ mɛrəŋka mmɛ. 35 Kɔ Rasɛl oloku papa kɔn: «Papa, ta pətɛl' am, ntɛ intɔyɛfɛn' am mɔ, tɛntəŋnɛ iyɔ tɔkɔ teŋyi aran tɛm o tɛm mɔ.» Kɔ Labaŋ ɛntɛn mɛrəŋka mmɛ haŋ, ɛnəŋk fɛ. 36 Kɔ abəkəc ŋɛmpɛ Yakuba, k'ɛŋcaŋ Labaŋ kəcɔp. Kɔ Yakuba ɛlɛk moloku, k'oloku: «Deke iləsər-ɛ, deke iŋciya-ɛ tantɛ məŋcəm' em darəŋ mɔ? 37 Ntɛ məfen-feni ca yem fəp mɔ, ake mənəŋk-ɛ ca yam ya dəkəlɔ-ɛ? Məmentər im yi fɔr ya awɛŋc im aŋa kɔ awɛŋc əm aŋa ŋabɛrɛ su dacɔ ina kɔ məna. 38 Meren wəco mɛrəŋ mɔ iyi nnɔ ndaram. Mba aŋkesiya ŋam ŋin, wir wan win wɛlɛcɛ fɛ kor, isɔmɛ f' am aŋkesiya yɔcɔl yam dacɔ. 39 Iŋkɛrɛ f' am pɔcɔl pefi, in' ɛnacərɛ teta yi. Məŋc-wer im kəsɔŋ ka kəway kɔ nyɛ aŋc-kiyər im pəwaŋkəra kɔ pibi mɔ. 40 Inayi nnɔ nne yɔc-cɔf im pəwaŋkəra, kəfe kəc-sut im pibi, mere mɔbɔlɛn' em. 41 Tɔsɔtɔ meren wəco mɛrəŋ ntɛ iyi nnɔ ndaram mɔ. Icbəc' am teta awut am aran meren wəco kɔ maŋkəlɛ, kɔ meren mmɛ camət-tin, ta yɔcɔl yam yɛfɛt-yɛfɛt. Mba mənacepɛ-cepɛ kəway kem haŋ wəco. 42 Pəyɔnɛ fɛ Kanu ka papa kem Abraham, Kanu Kəwɛy-wɛy ka Isiyaka kəsol' em-ɛ, kɔ tantɛ tɔ məsak im ilukus waca wɔsɔkər. Kanu kənəŋk malap mem, kɔ kəlɔləs nkɛ inalɔləs waca mɔ, ti tɔ kəmbocɛsa su nendisna kiti.» 43 Kɔ Labaŋ oloku Yakuba: «Awut arkun akaŋɛ, awut aran akaŋɛ kəbəp yɔcɔl yayɛ fəp yemi yɔ. Cəke c' intam mɔkɔ kəyɔnɛ awut em aran kɔ awut aŋɛ ŋaŋkom mɔ-ɛ? 44 Ndɛkəl məder səsek danapa fɔr ya fum wəlɔma kiriŋ ina kɔ məna.» 45 Kɔ Yakuba ɛlɛk tasar tin, k'ɛŋcəmbər pi cos. 46 Kɔ Yakuba oloku awɛŋc aŋa: «Nəwɛtəs masar!» K'awɛŋc aŋa ŋawɛtəs masar kɔ ŋamboc tɛpɛsa. Kɔ ŋandɛ tɛpɛsa papɔkɔ kəroŋ kɔ ŋandi yeri. 47 Kɔ Labaŋ ewe tɛpɛsa papɔkɔ «Yekar Sahaduta,» * Itɔ tatɔkɔ cəAram cɔ «tɛpɛsa pa sede» kɔ Yakuba nkɔn ewe pi «Kalɛdu.»† kaled = H. «tɛpɛsa pa sede» 48 Kɔ Labaŋ oloku: «Tɛpɛsa pampɛ peyi su mɔkɔ dacɔ.» Ti tɔ asɔŋɛ pi tewe ta Kalɛdu. 49 Tɛpɛsa papɔkɔ p'aŋwe sɔ Mispe, bawo Labaŋ ɛnaloku: «Kanu kəgbɛkərɛ su ina kɔ məna kɔ səndesɔlərɛnɛ. 50 Kɔ məntɔrəs awut em aran-ɛ, kɔ məlɛk sɔ aran alɔma-ɛ, məcərɛ fɔ bafɔ fum eyi su dacɔ, mba Kanu yati.» 51 Kɔ Labaŋ oloku: «Tɛpɛsa pɛmpɛ, kɔ tasar pɔkɔ iŋcəmbər ina kɔ məna dacɔ mɔ. 52 Tɛpɛsa pampɛ kɔ tasar pampɛ peyi su dacɔ, kəcərɛ fɔ ifɔsɔcepər tɛpɛsa pampɛ kəkɔ-caŋərn' am kəyɔ ka pəlɛc, məna sɔ ta məcepər tɛpɛsa pampɛ kɔ tasar pampɛ kəkɔ-caŋərn' em kəkɔ-yɔ pəlɛc.» 53 Kɔ Labaŋ oloku: «Kanu ka Abraham kɔ Nahor, kɔ Kanu ka kas kəŋan kəyi su dacɔ.» Kɔ Yakuba ɛndɛrəmɛ Kanu Kəwɛy-wɛy ka papa kɔn Isiyaka. 54 Kɔ Yakuba oloŋnɛ tɔrɔ tatɔkɔ kəroŋ, k'ewe awɛŋc aŋa kədedi yeri yayɔkɔ. Kɔ ŋandi yeri yayɔkɔ kɔ ŋandirɛ tɔrɔ papɔkɔ kəroŋ.