1 Kɔ Isifu ɛntɛmpɛnɛ papa kɔn kəroŋ, k'ombok kɔ kəroŋ, k'oŋcup kɔ. 2 Kɔ Isifu osom acar ɔn akɔ ŋanayɔnɛ atɛn cɔl mɔ, a ŋasop kas acɔl nŋɛ ŋɔsɔŋɛ ta wəfi ente katəna mɔ. Kɔ atɛn cɔl ŋasop Yakuba acɔl ŋaŋɔkɔ. 3 Kɔ tɔŋkɔ mata 40. Tɛm tatɔkɔ mataka mamɔkɔ m' aŋc-sop afi acɔl ŋa kətɔte ŋaŋɔkɔ, kɔ aMisira ŋambok kɔ mata 70.

4 Ntɛ mataka ma kəbal kɔn meŋcepər mɔ, kɔ Isifu oloku afum akɔ ŋanayi nde saŋka sa Firawona mɔ, k'oloku ŋa: «K'intam kəsɔtər nu layidi-ɛ, nəloku ntɛ Firawona ilɛtsɛnɛ nu: 5 Papa kem ɛnasɔŋ' em kədɛrəm, pəc-loku: ‹Kəfi k'inder! Məkɔ məwup im nde kufu kəŋkɔ iŋkay nde atɔf ŋa Kanahan mɔ.› Difɔ ifaŋ kəpɛ ikɔ wup papa kem. K'ilip-ɛ, inder.» 6 Kɔ Firawona oloku kɔ: «Məpɛ məkɔwup papa kam pəmɔ tɔkɔ ɔsɔŋ' am kədɛrəm mɔ.» 7 Kɔ Isifu ɛmpɛ kəkɔ-wup papa kɔn. Kɔ ŋampɛ kɔ abeki aka saŋka sa Firawona fəp kəbəp abeki a atɔf ŋa Misira. 8 Kɔ afum a Isifu fəp, kəlɛk awɛŋc aŋa kəbəp ka afum a papa kɔn, mɛnɛ awut, yɔcɔl yaŋan yɔpɔŋ kɔ yɛfɛt ŋ' anasak atɔf ŋa Kosɛŋ. 9 Isifu kɔ cibil ca dəntɔf k'ayɛksɛnɛ fəlɛs ŋampɛ kɔ nkɔn, kɔ tɔsɔŋɛ akɔ a Kanahan kəla. 10 Ŋandebəp pəferere pa Atad, nŋɛ ŋeyi Yurdɛn takəroŋ mɔ, kɔ ŋawup Yakuba dəndo kəyekyekəs disrɛ. Kɔ Isifu ombok kas mata camət-mɛrəŋ. 11 Kɔ andɛ a atɔf ŋaŋɔkɔ, aka Kanahan, ŋayi kəbal ka Yakuba dəndo pəferere pa Atad. Kɔ ŋaloku: «Defi dɔpɔŋ dɔ dandɛ aMisira dacɔ!» Ti t' asɔŋɛ tofo tatɔkɔ tewe ta «Abel Misira» nde Yurdɛn takəroŋ. 12 Kɔ awut a Yakuba ŋayɔ tɔkɔ papa kəŋan ɛnaloku ŋa mɔ. 13 Kɔ awut ɔn ŋaŋkekərɛ kɔ atɔf ŋa Kanahan. Kɔ ŋawup kɔ nde kufu ka dalɛ da Makpela, dalɛ ndɛ Abraham ɛnaway Hɛfəroŋ wəHiti dəwaca mɔ, pəyɔ di dəkəwupɛnɛ da afum ɔn, nde Mamre kəsək. 14 Ntɛ Isifu elip kəwup papa kɔn mɔ, k'oluksərnɛ Misira kɔ awɛŋc aŋa kɔ akɔ ŋanacəmbər kɔ, kəkɔ-wup papa kɔn mɔ.

15 Ntɛ awɛŋc a Isifu ŋanəŋk fɔ papa kəŋan efi mɔ, kɔ ŋaloku: «Kɔ Isifu ɛŋkafəlɛ pəyɔnɛ wəterɛnɛ kosu, kəluksɛ ka ayɛk ŋa pəlɛc mpɛ sənayɔ kɔ mɔ!» 16 Kɔ ŋasom a paloku Isifu: «Papa kam ɛnasom ntɛ a pəc-fi: 17 ‹Ntɛ tɔ nəŋkɔ-loku Isifu: Oh! Ilɛtsɛn' am məŋaŋnɛnɛ awɛŋc əm aŋa pəlɛc kɔ kiciya kəŋan, bawo ŋanayɔ əm pəlɛc! Ilɛtsɛn' am məŋaŋnɛ oŋ kiciya ka acar a Kanu ka papa kam!›» Kɔ Isifu ombok ntɛ analoku kɔ moloku mamɔkɔ mɔ. 18 Kɔ awɛŋc aŋa ŋander ŋa sərka ŋatɛmpɛnɛ Isifu dəntɔf kɔ ŋaloku: «Sən' ɔfɔ akaŋɛ acar am.» 19 Kɔ Isifu oloku ŋa: «Ta nənesɛ. Cepɔ Kanu k'iyɔnɛ? 20 Nənasek' em kəyɔ ka pəlɛc. Mba Kanu kənakafəli ti pətɔt, kəlompsɛ ka ntɛ teyi mɔkɔ mɔ, kɔ kəyac ka defi da afum alarəm. 21 Ndɛkəl oŋ, ta nənesɛ! Indetamɛ nu mɛfaŋ monu fəp kɔ ma awut anu.» Kɔ Isifu ontorɛ torɛ ŋa bəkəc, k'olok' lokərɛ ŋa dim d' antɔf.

22 Kɔ Isifu ɛndɛ Misira nkɔn kɔ afum ɔn. K'eyi doru meren 110. 23 Kɔ Isifu ɛnəŋk awut a Ɛfrayim haŋ dɛtɛmp maas. Kɔ Makir, wan ka Manase, oŋkom awut ɔn ləŋk ya Isifu kəroŋ. 24 Kɔ Isifu oloku awɛŋc aŋa: «Kəfi k'inder. Mba Kanu kəndemar nu ilaŋ ti. Kanu kəndepɛnɛ nu nde atɔf ŋɔkɔ kənalɛkɛ Abraham, Isiyaka kɔ Yakuba layidi kəsɔŋ ŋa mɔ.» 25 Kɔ Isifu ɔsɔŋɛ awut a Yakuba kədɛrəm, pəc-loku: «Kanu kəndemar nu ilaŋ ti. Nəde nəpɛnɛ bɛnt yem, nəbɔlɛnɛ yi nnɔ.» 26 Kɔ Isifu efi pəsɔtɔ meren 110. K'asop kɔ acɔl nŋɛ ŋɔŋsɔŋɛ wəfi kətɔte katəna mɔ. Kɔ ŋambɛr kɔ kaŋkəra ka tasar pɛpat dəndo atɔf ŋa Misira.