Uhuna Suha'na Yohanes
Bätäna issinna
Inde suha' natuli' Yohanes napakatuam to matappa' anna mala tontä liu manontom lako Puang Allataala sola Yesus Kristus anna la si ungkamasei solana to matappa', situhu' pepatuduam puha natahima. Tä' la napalulako penabanna ingganna kakadakeam illaam inde lino, sapo' la umpalako pa'elo'na Puang Allataala.
Natula' toi indo la dipangngissanni diua salama'um tau, naua: “Menna-menna muakui naua: ‘Puang Yesus Änä'na Puang Allataala,’ tau ia too sakalebum Puang Allataala anna Puang Allataala tohho illaam kalena.” Anna situhu' issinna inde suha' la tandaammi too diua manontom liungkia' lako Puang Allataala ke si ungkamaseingkia' solata. Aka menna-menna ungkamasei Puang Allataala, la ungkamasei duka' solana to Sahani battu diua to matappa'.
Natuli' duka' diona pepatuduanna to umbali Kristus. Yolona tau ia too ussangai duka' kalena to Sahani, sapo' umbaba hi pepatuduam tää'na sihondoi pepatuduam illaam kasahaniam. Indo pepatuduanna naua: “Ingganna aka-aka illaam inde lino sangngim kadake. Dadi tä' natama pikkiham kela diuai: ‘Kristus puha mehhupatau,’ aka la nakadakei kakadakeanna lino.”
Indo to umbaba pepatuduam kadake naua polepi: “Dipasalama' kalembasanna dilappasam dio mai kaha-kaha katuboam illaam inde lino.” Napepatuduam toi naua: “Indo kasalamasam tä' silambangam gau'na hupatau illaam lino, anna tä' toi tau manggi' ungkamasei solata.”
Iya sisala hi pepatuduam natula' Yohanes illaam inde suha' napomasiä' naua: “Yesus Kristus sulem inde lino mehhupatau, anna ingganna to ungkatappa'i la ungkamasei ingganna solana to matappa'.”
Lesoanna issinna
1. Kada passu'bä' (1:1-4)
2. Tubo illaam kamasiäsanna Puang Allataala (1:5-2:27)
a. Tubo illaam kamasiäsam kalembasanna ma'gau' mapia situhu' pa'elo'na Puang Allataala (1:5-2:17)
b. Menna-menna untumpu pala' Puang Yesus, tau ia too tä' deem kasilombunganna Ambeta (2:18-27)
3. To disangai änä'na Puang Allataala (2:28-4:6)
a. Menna-menna tä' umpalako kamaloloam battu haka tä' ungkamasei to matappa', tau ia too taia änä'na Puang Allataala (2:28-3:24)
b. Menna-menna tä' muakui Puang Yesus tau ia too tä' napentamai Penaba Maseho (4:1-6)
4. Pa'kamasena Puang Allataala lako kita anna pa'kamaseta lako solata (4:7-5:5)
5. Kasa'biam diona Yesus Kristus (5:6-12)
6. Katuboam sule lako salako-lakona (5:13-21)
1
Yesus Kristus-um too diuaam Kada To Mepatubo
1:1-4
1 Illaam inde suha' kituli' diona To inna deemmi pempom dio mai. Puham kiita sola matangki, kihingngi sola talingangki tula'na. Kianda'im sola limangki anna kiitam pa'palakoanna. Iam too Kada To Mepatubo. 2 Katuboam ia too puham dipa'paitaam anna kiitam kami'. Iya kisa'biim anna kipa'pakahebaam indo katuboam to la tontä liu sule lako salako-lakona. Indo katuboam sitimä sola Ambeta mengkalao dio mai anna puhangkam dipaitai. 3 Iai too puha kiita anna kihingngi, iam too kipakahebaiangkoa' anna malakia' mesa illaam kakalebuam. Aka kami'-kami' sakalebungkam sola Ambeta anna Yesus Kristus Änä'na. 4 Kitulasangkoa' indee anna mala sundum anna sule lako kakassiangki.
Tubo illaam kamasiäsam kalembasanna ma'gau' mapia situhu' pa'elo'na Puang Allataala
1:5-10
5 Iam too inde kaheba kihingngi dio mai Yesus Kristus kipakahebaiangkoa': Indo Puang Allataala kamasiäsam battu diua kamapiaam anna tä' deem kamalillingam battu diua kakadakeam illaam kalena. 6 Maka' taua: “Sakalebungkia' Puang Allataala,” sapo' tubo illaam dikia' kamalillingam, iya taägä'i hia' tia isanga aka tä'kia' ma'palako situhu' kamaloloanna Puang Allataala. 7 Sapo' maka' tubokia' illaam kamasiäsam susi kamasiäsanna Puang Allataala, iya sakalebungkia' too anna ingganna dosata nabaseiangkia' haha titollona Puang Yesus, Änä'na.
8 Maka' taua: “Tä'ki' deem madosa,” iya umbaba bulingki' kaleta anna kamaloloanna Puang Allataala pa'de illaam kaleta. 9 Sapo' maka' taakui dosata längäm Puang Allataala, la tontä Ia manontom umpasule lako pa'dandianna anna ma'palako situhu' kamaloloanna, nasuhum la naampunniangkia' dosata anna nabaseiangkia' ingganna pa'pogau' kadaketa. 10 Sapo' maka' taua: “Tä'ki' deem madosa,” iya iam tia isanga ussangaiki' Puang Allataala kaua-ua bäbä anna tä' tapaillaam penaba kadanna.