Suha' lako to Ibrani
Bätäna issinna
Inde Suha' Ibrani tä' diissam to untuli'i aka tä' natuli' sanganna. Anggam diissam diua indo to untuli'i mesa to pebabanna to Sahani to muissam si'da-si'da issinna Pa'dandiam Yolona Puang Allataala. Sapo' anggam ia aka makaleso taia indo sapulo dua suhona Puang Yesus (2:3).
Inde suha' mengkalao dio mai abana disangai Suha' lako to Ibrani. Indo to Ibrani tontäm ke diuai to Yahudi battu diua to Israel. Setonganna tä' diissam menna dipakatu inde suha', sapo' mannassa anna to Sahanii to mahassam ussi'dim kamapi'disam anna pandahhaam aka matappa' lako Puang Yesus (10:32-34, 13:3,13). Illaam indo ussi'dim kamapi'disam deemmi piha manenne penabanna anna deem maelo' la soho' boko' illaam mai kasahaniam (12:12). Anna deem duka' tä'um naaku lao ma'sambajam (10:25).
Tallu handanna napaitoo'na to untuli' inde suha': uhuna, la mendadi pepatuduam lako to umbatai, kaduanna la mendadi pepakatoto', anna katallunna la mendadi penännä'.
Uhuna napepatuduam naua: Puang Yesus Änä'na Puang Allataala to puha umpalombungangkia' tula'na Ambena (1:2). Anna Puang Yesus Sando Too' to untondom ingganna malaika' anna untondom toi Musa (1:1-4:13). Anna untondom polepi ingganna sando too' illaam peadasanna to Yahudi (4:14-7:28). Kahana pengkähäna Puang Yesus nasuhum ingganna to matappa' tä'um nakuasai dosa, tä'um mahea' sule dio olona Puang Allataala, anna lappa'um dio mai kakuasaanna kamateam, aka ullambi'um katuboam sule lako salako-lakona. Anna napepatuduampi naua: Puang Yesus mendadim Sando Too' to mebaba lako kasalamasam. Tä' mala dihannuam tunuam anna bua pemala' senga' la mepasalama' dio olona Puang Allataala. Anggam kamateanna Puang Yesus mendadi bua pemala' la umbasei dosa budanna hupatau, battu diua mepasalama'. Iam too anna diissammi diua pengkähäna Puang Yesus mentondom puha ia anna la pengkähäna ingganna sandona to Yahudi. Anna indo pa'dandiam bakahunna Puang Allataala nakähä Puang Yesus mentondom puha ia anna la indo pa'dandiam yolona.
Kaduanna, mepakatoto' anna mala ingganna to Sahani tontä liu manontom lako Puang Yesus, moi anna didahha. Naua tä'ungkia' mahea' le'ba' lako olona Puang Allataala aka napendioloangammakia' Puang Yesus längäm (4:16; 6:20; 10:19-23). Anna nauapi: ingganna to Sahani tä' mala tala landa' lako indo pellubeam la mebeem Puang Allataala aka kamatappasanna (3:10-4:11). Indo diuaam pellubeam la mebeem Puang Allataala, deem muuai maka' matem to matappa' iya mellubem aka tä'um la mengkähä inde lino. Deem toi duka' muuai indo diuaam pellubeam, kalembasanna tä'ungkia' pahallu mengkähä illaam lino umpeä ikale kasalamasam, aka napasalama'ungkia' Puang Yesus.
Katallunna, menännä' indana deenni tau soho' boko' illaam mai kasahaniam (2:1-4; 3:7-19; 5:11-6:12; 10:26-39; 12:18-29). Anna nauapi la mabanda' pa'tahungkunganna to umpa'lullu' Änä'na Puang Allataala anna muangga' mesina-sina haha titollona Kristus.
Lesoanna issinna
1. Puang Yesus untondom asam ingganna-ingganna sia (1:1-10:18):
a. Puang Yesus Änä'na Puang Allataala (1:1-3)
b. Mentondom puha ia Puang Yesus anna la ingganna malaika' (1:4-2:18)
c. Mentondom puha ia Puang Yesus anna la Musa (3:1-4:13)
d. Puang Yesus Sando Too' handam matande, mentondom puha ia anna la ingganna to ungkähä pa'dandiam yolona Puang Allataala (4:14-7:28)
e. Mentondom puha ia pengkähäna Puang Yesus anna la pengkähäna ingganna sando illaam peadasanna to Yahudi (8:1-10:18)
2. Kamanontongam lako Puang Allataala (10:19-12:29)
3. Pa'palakoam situhu'na pa'elo'na Puang Allataala anna kada pebubum (13:1-25)
1
Matande puha ia Änä'na Puang Allataala anna la ingganna malaika'
1:1-14
1 Indo yolona pembuda ma'battakada Puang Allataala lako nene to taponene napalombum ingganna nabi. Ma'hupa-hupa lalam napogau'. 2 Sapo' illaam inde wattu la kasuppisanna lino ma'kale Ia Änä'na Puang Allataala puha umpalombungangkia' tula'na. Indo Änä'na abana inna napa'tantum Puang Allataala la Ia muampuam asam ingganna-ingganna sia. Anna Änä'na siam duka' ungkähäi anna napadadii Puang Allataala langi' sola lino. 3 Ia naongei tandaam pangkähhä kamatandeanna Puang Allataala, anna susi siam sipa'na anna pa'pogausanna Puang Allataala. Anna Ia toi umpaliaha ingganna-ingganna sia, tula'na ponno kakuasaam napake. Tappana puha umbasei lao dosa budanna hupatau, iya le'ba'um längäm suhuga muokko' dio tandai kananna To Handam Matande. 4 Lambi' matande puha ia tadongkonganna anna la ingganna malaika', umba susi matande puha ia indo sanganna to nasangaiam Puang Allataala anna la sanganna malaika'. 5 Aka tä' tia deem la naua Puang Allataala lako malaika':
“Ikom too Änä'ku;
mengkalao allo temo kupomakaleso kuua: Kaom too Ambemu.”* Puj. 2:7.
Sapo' anggam diona Änä'na naua:
“Kao la mendadi ambena
anna Ia la mendadi Änä'ku.”† 2Sam. 7:14.
Tä' ia deem ma'kada susi diona malaika'.
6 Mane deenni, wattunna anna ussuai Änä' uluana Puang Allataala mentama inde lino,‡ Änä' uluana: Puang Yesus diuaam Änä' uluana Puang Allataala aka untondom asam ingganna-ingganna sia. ma'kada naua:
“Ingganna malaika'na Puang Allataala la pahallu menomba dio olona.”§ Puj. 97:7.
7 Anna diona ia ingganna malaika', naua Ia:
“Puang Allataala umpopengkubalim malaika'na napadadi susi hibu',
anna to si napakasua-sua napopengkubalim napadadi susi lelona api.”** Puj. 104:4.
8 Sapo' lako ia Änä'na naua:
“O Puang Allataala, la mentomahaja liuko sule lako salako-lakona!
Ma'pahentako sola undu' lollä.
9 Umpohäeko kamaloloam anna ungkabassiko kakadakeam.
Iam too kasuhunganna anna Kao, Puang Allataala to umpenombai,
puhako kupopentondom anna la ingganna solamu,
aka kulanti'ko kutolloi minnä'-minnä' tanda dipa'kasalleiko,
anna mala naponnoiko katilallasam.”†† Puj. 45:7-8.
10 Nauapi duka' Puang Allataala lako Änä'na:
“O Debata ikom too umpadadi inde lino, indo anna dipadadii,
anna Iko siam duka' umpapia langi'.
11 Ingganna ia too la pa'de asam sule,
sapo' Iko-Iko la tontä liuko.
Langi' anna lino la malusa sihhapam poheba,
12 la ulluppi'-luppi' susi juba,
anna umpabala'i polei bakahunna.
Sapo' Iko-Iko tä' punalako deem la tidende,
anna la tubo batuko.”‡‡ Puj. 102:25-27.
13 Anna tä' tia deem la naua Puang Allataala lako malaika':
“Okko'ko dio tandai kanangku,
sule lako wattunna la kupopa'bukku ingganna balimmu
dio olomu lambi' uhhondoi dokko.”§§ Puj. 110:1.
14 Dadi, aka ia umbai' indo malaika'? Indo malaika' sangngim mempenaba to napakasua-sua Puang Allataala la umpamoloi hupatau to la dimana' kasalamasam.