12
Puang Yesus natolloi minnä'-minnä' Maria aka napa'kasallei
12:1-8
Mat. 26:6-13; Mrk. 14:3-9
1 La annampi benginna mane lambi'i wattunna napakahoa' to Yahudi allo Kalappasanna dio mai kasabuasam, iya le'ba'um Puang Yesus lako Betania, tondä'na Lazarus to napatibangom sule Puang Yesus dio mai alla'na to mate. 2 Eta too ma'hame-hame tau untosabe Puang Yesus. Natahiai Marta anna dio duka' heem Lazarus mangngande sola. 3 Iya naalam Maria setangnga lite' minnä'-minnä' bubanau' isanga narwastu, si masulli' allinna, mane natolloianni bitti'na Puang Yesus, anna napassii beluä'na. Iya titumpammi bubanau' ponno indo banua.
4 Sapo' ma'kada mesa passikolanna Puang Yesus isanga Yudas Iskariot (to la umbalu' Puang Yesus) naua: 5 “Akanna tä'i dibalu' itim minnä'-minnä' bubanau' si tallu pulo bidä allinna anna dibeenni to mase-mase?”* tallu pulo bidä allinna: Indo dituli' illaam basa Yunani, naua ia ke basa Bambanni: tallu hatu' dinar; mesa dinar pada sahona mesa tau mengkähä sangngallo. 6 Setonganna taia to mase-mase napikki' Yudas. Sapo' ma'kada susi aka mesa pa'boko. Biasa si muala bäbä doi' illaam mai pa'pongngeam doi', aka ia si muannai.
7 Sapo' ma'kada Puang Yesus naua: “Päbäi napateem itim baine. Aka napogau' loppo'um ia indo la dipogau' ke dipatamaä' ku'bu'. 8 Aka to mase-mase ia sola-sola liukoa', sapo' Kao-kao tä'kia' la sola liu.”
Nakattu to kasallena to Yahudi la umpatei Lazarus
12:9-11
9 Buda to Yahudi umpekahebai diua diom Betania Puang Yesus. Iam too anna le'ba'im lako. Tä' angga mandi Puang Yesus natungka, sapo' maelo'pi duka' la muita Lazarus indo to napatubo sule Puang Yesus. 10 Iam too anna nakattum ingganna kapala sando la umpatei Lazarus, 11 aka katibangongannam too Lazarus nasuhum buda to Yahudi tä'um untuhu'i indo kapala sando anna matappa'i lako Puang Yesus.
Puang Yesus natammui tau buda dio Yerusalem
12:12-19
Mat. 21:1-11; Mrk. 11:1-11; Luk. 19:28-40
12 Tappana makale'na mebengngi', napekahebam indo tau buda to sule umpakahoa' allo kasalle diua illaammi pangngola-lalangam Puang Yesus lu längäm Yerusalem. 13 Iya mualaim palapa andulam† mualaim palapa andulam: deem napa'bandeha, deem napengngampasam lako lalam tanda pa'pakasallena anna katilallasanna. anna mane le'ba'i mentammu napasindum sikaahhe naua:
“Tapujia' Puang Allataala!
Katambasam to sule illaam sanganna Debata!
Katambasam Tomahajanna to Israel!”
14 Iya mualam mesa keledai mangnguha Puang Yesus anna nasäkei. Iya sule lakom pole' indo deem tisuha' illaam Battakada Debata naua:
15 “Daa ummahea' inggannakoa' issinna Sion!
Petua'i, tomahajammua' sule
ussäkei mesa keledai mangnguha.”‡ issinna Sion: Indo dituli' illaam basa Yunani, naua ia ke basa Bambanni: änä' daha illaam Sion. Sion mesa sanganna Yerusalem. Ingganna issinna Yerusalem si bassa' disangai änä' daha illaam Sion. Za. 9:9.
16 Wattu eta too tä'pi napähäm tongam ingganna passikolanna kalembasanna indo kaha-kaha ia too. Puha ham diäkä' längäm ongeam kamatandeanna Puang Yesus, mane naalai pole' pikkihanna naua: “Indo napogausam to Yerusalem abana inna tisuha' loppo'um tia illaam Battakada Debata.”
17 Ingganna to dio heem indo anna untambai Lazarus Puang Yesus messubum illaam mai ku'bu' napatubo sule, silele tamonda-monda natula' indo kakuasaanna. 18 Iam too kasuhunganna anna buda sugali'um tau untammui Puang Yesus aka naissam naua Ia umpogau'i indo tanda memängä-mängä.
19 Iya sipa'tula'-tula'um indo to illaam kakalebuanna Parisi naua: “Tä'um pole' diissam aka amom la dipogau'! Aka taitanna' natuhu' asammi tau buda.”
Puang Yesus umpa'paissangam diona la kamateanna
12:20-36
20 Indo tau buda to längäm Yerusalem lao umpenombai Puang Allataala wattunna dipakahoa' indo allo kasalle, deem duka' sanaka-naka to Yunani. 21 Indo to Yunani umpellambi'i Filipus anna nauaanni: “O Tuam, maelo'kam la silambi' Puang Yesus ke malai.” (Indo Filipus to buttu dio mai Betsaida illaam lembäna Galilea.) 22 Iya umpellambi'im Andreas Filipus anna solai le'ba' umpa'tula'i Puang Yesus.
23 Natimba'im Puang Yesus naua: “Lambi'um wattunna la dipomatandeä' indo to diuaam Änä' Mentolino. 24 Setongam-tonganna maka' tä' dilamum dokko litä' salise' gandum sihhapam to mate, iya la tontä liu salise'. Sapo' maka' dilamum indo salise' gandum, iya etam too pole' la tubo dio mai anna buda buana. 25 Menna-menna umpakalando puha ia katuboam di lino, katampasanna la pa'dem ia katuboanna. Sapo' menna-menna tä' umpakalando ia katuboam di lino, la da'da' liu ia katuboanna sule lako salako-lakona. 26 Menna-menna naaku umpamoloiä', la natuhu'ä' anna mala sola liungkanni umba-umba ngei kuongei. Anna la napa'kasallei ia Ambeku.
27 Husa' penabangku temo. Aka amo la kuua? La kuua haka: ‘O Ambe', lappasannä' dio mai inde kamasussaam la ullambi'ä' temo’? Sapo' ia hi kusuhum sule inde lino, anna mala nalambi'ä' kamasussaam ia too. 28 O Ambeku, pa'patandaanni kamatandeanna sangammu!”
Iya tappa dihingngim kamaha yabo mai langi' naua: “Puham kupa'patandaam kamatandeangku anna la kupa'patandaam polepi.” 29 Ingganna indo to ma'hempum eta too sangngim nahingngi indo kamaha. Iya deemmi muuai: “Guntu' umbai'!” Sapo' deem duka' muuai: “Taia! Malaika' umpa'kadai.”
30 Iya ma'kadam Puang Yesus lako indo tau buda naua: “Indo kamaha uhhingngia', setonganna taKao napahalluam, sapo' ikoa' napahalluam. 31 Tentomai lambi'um wattunna la dipopa'tadongkongam issinna lino. Anna lambi'um duka' wattunna indo tomahajanna setam to ungkuasai lino la ditibe ia lao. 32 Anna Kao-kao, maka' too balimä' ditandeam yaboanna inde lino,§ Kao-kao, maka' too balimä' ditandeam yaboanna inde lino: Puang Yesus ditandeam wattunna dipatei yabo kaju sitambem, anna wattunna diäkä' längäm ongeam kamatandeanna yabo suhuga. Petua'i duka' Yoh. 3:14 sola 18:32. iya ingganna hupatau** ingganna hupatau: kalembasanna, to buttu dio mai ingganna botto, taia angga mandi to Yahudi. la kuhuntu' lako kaleku.” 33 Ia anna ma'kada susii Puang Yesus aka napa'paissangam la maaka susi kamateanna.
34 Natimba'im indo tau buda naua: “Illaam Suha' Pahenta tisuha' naua: Indo To dilanti' la mepasalama' la tubo liu ia sule lako salako-lakona. Iya akanna muua hiko: ‘Änä' Mentolino la ditandeam yaboanna lino?’†† la ditandeam yaboanna lino: situhu' to Yahudi, kalembasanna la dipatei yabo kaju sitambem. Aka hiko ussanga Änä' Mentolino?”
35 Natimba'i Puang Yesus naua: “Indo kamasiäsam la säpäi' mandam illaam alla'-alla'mua'. Dadi lombaia' mellao sumala deempi kamasiäsam, indana nakuasaikoa' kamalillingam. Aka menna-menna mellao illaam kamalillingam tä' ia naissam lalam umba la naola. 36 Katappa'ia' indo kamasiäsam sumala solapokoa' inde lino anna mala mendadikoa' änä'-änä' to tubo illaam kamasiäsam.”
Puhai ma'tula' Puang Yesus, le'ba'um umpellei indo ongeam ia too anna tä' opi si tama alla'-alla'na tau buda.
To Yahudi tä' matappa' lako Puang Yesus
12:37-43
37 Moinna anna budam tanda memängä-mängä napogau' Puang Yesus dio olona indo to Yahudi, sapo' sangngim moka siam ungkatappa'i 38 anna mala sule lako indo tula'na nabi Yesaya naua:
“O Debata, mennam ungkatappa'i indo kaheba kipengkadaam?
Menna bäbä hi puha dipaitai indo kakuasaammu Debata?”‡‡ Yes. 53:1.
39 Iam too kasuhunganna anna sangngim tä'um mala matappa' aka inna puham duka' natula' loppo' nabi Yesaya kadanna Puang Allataala naua:
40 “Sangngim kubutai matanna anna mala tä' paita,
kupomakahha' penabanna anna mala tä' deem aka naala penabanna.
Aka indana ma'pasulei-sule lako Kaleku nasuhum kupabono'.”§§ Yes. 6:10.
41 Ia anna ma'kada susii Yesaya aka puham muita loppo' kamatandeanna Puang Yesus anna puham duka' natula' loppo' diona Puang Yesus.
42 Moinna anna susi, buda siam duka' to kasallena to Yahudi matappa' lako Puang Yesus. Sapo' moka ohi umpellampasanni indo kamatappasanna aka mahea'i lako to illaam kakalebuanna Parisi. Aka naua tä'um la mepäbäi tama pa'sambajanganna to Yahudi ke matappa'i tau lako Puang Yesus. 43 Aka sangngim napakalando ia napuji hupatau anna la napuji Puang Allataala.
Tula'na Puang Yesus la umpassala hupatau
12:44-50
44 Pissam wattu napekasallei ma'kada Puang Yesus naua: “Menna-menna ungkatappa'iä', takao mandi nakatappa'i, sapo' setonganna ungkatappa'i duka' indo to ussuaä'. 45 Anna menna-menna muitaä', muitam indo To ussuaä'. 46 Suleä' tama inde lino sihhapam kamasiäsam anna mala ingganna to ungkatappa'iä' tä' la tohho illaam kamalillingam.
47 Maka' la anggam napehingngii bäbä tau tula'ku, sapo' tä' napogau', iya takao la umpassalai. Aka tä' suleä' la umpassala lino, sapo' la kupasalama'. 48 Menna-menna untumpu pala'ä' anna tä' umpaillaam penaba tula'ku, deem ia to la umpassalai. Indo kada puha kutula', iam too la umpassalai ke illaammi allo ma'katampasanna. 49 Aka ma'tula'ä' tä' situhu' pa'elo' ikaleku bäbä, sapo' pa'elo'na Ambeku to ussuaä'. Aka nasuaä' untula'i indo la pahallunna kutula' anna kupalambi'. 50 Anna kuissam kuua indo to napa'pahentaam la umbabakoa' lako katuboam sule lako salako-lakona. Dadi ingganna tula'ku kupalanda' umba susi puha napokada Ambeku.”
*12:5: tallu pulo bidä allinna: Indo dituli' illaam basa Yunani, naua ia ke basa Bambanni: tallu hatu' dinar; mesa dinar pada sahona mesa tau mengkähä sangngallo.
†12:13: mualaim palapa andulam: deem napa'bandeha, deem napengngampasam lako lalam tanda pa'pakasallena anna katilallasanna.
‡12:15: issinna Sion: Indo dituli' illaam basa Yunani, naua ia ke basa Bambanni: änä' daha illaam Sion. Sion mesa sanganna Yerusalem. Ingganna issinna Yerusalem si bassa' disangai änä' daha illaam Sion. Za. 9:9.
§12:32: Kao-kao, maka' too balimä' ditandeam yaboanna inde lino: Puang Yesus ditandeam wattunna dipatei yabo kaju sitambem, anna wattunna diäkä' längäm ongeam kamatandeanna yabo suhuga. Petua'i duka' Yoh. 3:14 sola 18:32.
**12:32: ingganna hupatau: kalembasanna, to buttu dio mai ingganna botto, taia angga mandi to Yahudi.
††12:34: la ditandeam yaboanna lino: situhu' to Yahudi, kalembasanna la dipatei yabo kaju sitambem.
‡‡12:38: Yes. 53:1.
§§12:40: Yes. 6:10.