Kaheba Katilallasam natuli' Lukas
Bätäna issinna
Inde suha' natuli' Lukas mesa tuandotto' si umpasolai Paulus illaam pa'laoanna umpa'pakahebaam Kaheba Katilallasam diona Puang Yesus (Kol. 4:14; 2Tim. 4:11; Flm. 24). Maelo' la natuli' inde suha' diona Puang Yesus, nasuhum napellantunni manappa mengkalao pahandu'na ingganna pa'palakoanna Puang Yesus (1:1-3).
Illaam inde suha', natuli' Lukas diona Kaheba Katilallasam naua Puang Yesus-um too indo To dilanti' la mepasalama' to puha nadandi Puang Allataala. Sule inde lino aka la umpasalama' ingganna hupatau to matappa' lako, susi to Yahudi teem taianna to Yahudi (2:10; 2:30-32; 3:6; 24:47), umba susi natula' naua: “...suleä' umpeä anna la umpasalama' ingganna to bulim” (19:10).
Illaam issinna inde suha', deem sanaka-naka handanna napaitoo'na Lukas. Natuli' diona pa'kamasena Puang Yesus lako hupatau tandaam illaam pa'palakoanna, susinna lako to mase-mase (6:20; 7:22; 14:12-13; 21:1-4), to madosa (5:30; 7:37-50; 15:1-2), baine (7:11-17; 8:2-3; 10:38-42; 13:10-13; 21:1-4; 23:27-31) anna änä'-änä' (8:41-42; 54-55; 9:38-42; 9:46-48; 18:15-17). Natuli' toi duka' diona sambajam, pengkähänganna Penaba Maseho, pengkähänganna baine to umpamoloi Puang Yesus, kaampunganna dosa, anna budapi senga'na.
Lesoanna issinna
1. Kada passu'bä' (1:1-4)
2. Kadadianna Yohanes to si mantedo' anna kadadianna Puang Yesus (1:5-2:52)
3. Kada napalambi' Yohanes to si mantedo' (3:1-20)
4. Puang Yesus ditedo' anna napa'sändä'i tomahajanna setam (3:21-4:13)
5. Pengkähänganna Puang Yesus lako hupatau dio Galilea (4:14-9:50)
6. Pa'lao-laona Puang Yesus mengkalao dio Galilea sule längäm Yerusalem (9:51-19:27)
7. Ma'katampasanna pa'palakoanna Puang Yesus dio Yerusalem anna lako sikahuku'na (19:28-23:56)
8. Katuboanna sule Puang Yesus anna umpa'paitaam kalena lako passikolanna anna wattunna tiäkä' längäm suhuga. (24:1-53)
1
1 O Teofilus to dipa'kasallei, budam tau umpeäi lalanna anna malai natuli' situhu' tonosanna ingganna indo kadadiam to puha dadi illaam alla'-alla'na hupatau. 2 Sikanatuli' situhu' indo puha natulasangkia' to umpa'pakahebaam Battakada Debata, indo to muitai sola mata mengkalao pahandu'na kadadiam ia too. 3 Dadi tappana kupellantunni manappa mengkalao pahandu'na kaha-kaha ia too, iya kuuam mapia ke kutuli'i situhu' tonosanna ingganna ia too anna malai umbata. 4 Kupateem anna malai muissam muua indo to puha dipa'guhuangko abana tappa' si'da.
Kadadianna Yohanes to si mantedo' dipa'paissangam
1:5-25
5 Wattunna anna mendadi tomahajai Herodes dio lembäna Yudea, deem mesa sando isanga Zakharia, mentama duka' kamesaanna to mate Abia. Bainena Zakharia isanga Elisabet, mesa duka' pessubunna sando Harun. 6 Indo to dua, malolo pa'palakoanna dio olona Puang Allataala, aka bassim tä' deem sassainna kamanuhusanna untuhu'i ingganna pahentana Debata. 7 Sapo' indo to sipobaine tä' deem änä'na, aka abana tämänä Elisabet, anna bassim matuam.
8 Pissam wattu, lambi' oom wattunna la ma'palako sando to mentama kamesaanna to mate Abia, nasuhum Zakharia umpalako oloam sando dio olona Puang Allataala. 9 Situhu' kabiasaam, si diundi indo to la umpalako oloam sando illaam Banua Debata la untunu tunuam bubanau', iya Zakharia nahua eta too. 10 Mahassanni dipalako indo hettem tunuam bubanau', sulibam ia tau buda ma'sambajam.
11 Wattu etam too naongei umpa'paitaam kalena mesa malaika'na Debata lako Zakharia. Indo malaika' ke'de' dio tandai kananna indo meja dipantunui tunuam bubanau'. 12 Naitanna Zakharia indo malaika', tappa tikkedu' anna mahea'. 13 Sapo' ma'kada indo malaika' naua: “O Zakharia, daa ummahea', nahingngiammi Puang Allataala pa'sambajammu. Nasuhum la nadadiangangko bainemu Elisabet mesa änä' muane-ane anna la ussangai Yohanes. 14 Tä' deem pada la satiala inabammu ke dadim indo änä'-änä', anna la buda tau kassi wattu eta too. 15 Aka indo änä'mu, mesa to la keangga' dio olona Debata. La tä' mala muihu' anggur sola uwai senga' indo si mepamäbo'na. Anna subunna too, iya naponnoim Penaba Maseho. 16 La buda to Israel napopengngolo sule lako Puang Allataala, Debata to napenombai nene to naponene. 17 Anna la umpendioloangam Debata sule naponnoi kuasa susi nabi Elia. La umpasikapiai ambe anna änä', anna lako tau to tä' manuhu' la napatinanda sule lako lalanna to si umpogau' kamaloloam. Pa'palakoam iam too umpaitai lalam hupatau anna mala toka penabanna la mendadi umma'na Debata.”
18 Iya natimba'im Zakharia lako indo malaika' naua: “Tä' natama pikkihangku itim tula'mu, aka kao illaammä' kamatuaam, susi siam duka' baineku.”
19 Natimba' indo malaika' naua: “Kaom too Gabriel to si nasua Puang Allataala. Anna nasua omä' temo umpalambisangko inde Kaheba Katilallasam. 20 Inde to puha kutula' tä' mala tala dadi ke lambi'um wattunna. Sapo' aka tä'ko kannam, nasuhum tä'ko la mala ma'kada sule lako diganna'i inde kaha-kaha puha kupokada.”
21 Wattu eta too, mamali'um tau buda muampai Zakharia anna sangngim mängä-mängä naua: “Akanna masäe sugali'i illaam Banua Debata?” 22 Pissananna ham ia messubum illaam mai tä'um mala ma'kada, iya napakana mandam lako tau buda indo to naita illaam Banua Debata. Naissam pole' tau buda naua: “Deem aka-aka napaitaiam Debata illaam.”
23 Tappana puha wattu pengkähänganna Zakharia illaam Banua Debata, iya ma'pasulem lako tondä'na. 24 Tä' masäe lessu'na ia too, iya kebättä si'da ham Elisabet bainena, lambi' ungkuhum kalena illaam banua lima bulanna. 25 Iya nauam Elisabet: “Inde kaha-kaha napadadi Debata tama kaleku, solanapi pa'kamasena di kao nasuhum tä'mä' pole' la si napa'bahinni'-hinni'i solaku.”
Kadadianna Puang Yesus dipa'paissangam
1:26-38
26 Annanni bulanna tambu'na Elisabet, iya nasuam Puang Allataala indo malaika' isanga Gabriel lao lako Nazaret, mesa tondä' dio lembäna Galilea. 27 Dioi, umpellambi'im mesa änä' daha isanga Maria. Indo Maria balim nakutanai muane isanga Yusuf, mesa duka' peampoanna tomahaja Daud. 28 Iya ma'kadam indo malaika' lako Maria naua: “O to kehongko'! Naundu'ko anna namana' Debata.”
29 Tikkedu' Maria uhhingngi tula'na indo malaika' lambi' mekutana illaam penabanna naua: “Aka hia umbai' kalembasanna indo tula' ingngena'?” 30 Iya nauam indo malaika': “O Maria, daa ummahea' aka iko mesako to napilei Puang Allataala la natamba'. 31 La kebättäko anna la undadiangko änä' la muane-ane anna la ussangai Yesus. 32 La mendadi mesa to kasalle anna la diuaam Änä'na Puang Allataala To Handam Matande. La napatadongkom Puang Allataala Debatanta mendadi tomahaja illaam kapahentaanna tomahaja Daud nene to naponene. 33 Anna la umpahenta pessubunna Yakub sule lako salako-lakona, anna kapahentaanna tä' deem la meangganna.”
34 Iya ma'kadam Maria lako indo malaika' naua: “La mala haka tia sule lako itim kadammu aka tä'pä' deem siisso muane.”
35 Sapo' naua indo malaika': “Penaba Maseho la ussalokko'ko anna kakuasaanna To Handam Matande la mengkähä illaam kalemu. Iam too anna la diuaammi indo änä'-änä' la undadiam: ‘To Malolo, Änä'na Puang Allataala.’ 36 Ungkilalai haka indo Elisabet sahapummu, annammi bulanna tambu'na temo, moi anna illaammi kamatuaam anna si naua asammi tau: ‘Tämänä.’ 37 Aka tä' ia deem nakapusa'i Puang Allataala.”
38 Iya nauam Maria: “Kao sabua'naä' Debata; iai too muua, iam too la dadi tama kaleku situhu' indo tula'mu.” Iya le'ba'um indo malaika' umpellei Maria.
Maria lao umpessitai Elisabet
1:39-45
39 Puhanna ia too, tappa le'ba' siaham Maria lako mesa kota dio lembäna Yudea yabo tipatanetena. 40 Sulei lako, iya le'ba'um tama banuanna Zakharia anna umpa'kadai Elisabet. 41 Nahingnginna Elisabet pa'kadanna Maria, tappa pahiu siaham indo änä'-änä' illaam tambu'na. Iya nasahum siaham Penaba Maseho Elisabet, 42 lambi' metamba naua: “Ingganna baine iko handam ma'kalolosam tamba'mu, anna la ditamba' toi indo änä'-änä' la undadiam. 43 Setonganna tä' sihatannä' la napellambi'i indona Debatangku. 44 Aka kuhingnginna pa'kadammu, tappa pahiu siaham indo änä'-änä' illaam tambu'ku, kassi. 45 Kehongko'ko anna maupa', aka ungkatappa'i muua indo kadanna Debata tama kalemu tä' mala tala dadi!”
Kada katilallasanna Maria umpuji Debata
1:46-56
46 Iya ma'kadam Maria naua:
“Mengkalao illaam unä' penabangku lemba' dio pudu'ku umpujiä' Debata,
47 anna kutilalla'i sola sakalebu penabangku längäm Puang Allataala to umpasalama'ä',
48 aka moinna anna mesaä' to handam matuna, sapo' tontää' napaillaam penaba.
Napahandu' temo la nauaam asannä' ingganna lapi'na hupatau: ‘To kehongko'.’
49 Aka Puang Allataala To Handam Kuasa puha umpogau' tanda memängä-mängä tama kaleku.
Maseho sanganna!
50 Pa'kamasena Puang Allataala tihandu' lako ma'hupatau sule lako ampo-ampona to mengkahea' dio olona.
51 Katea' bassinna umpogau' pa'pogausam kasalle.
Puha usseham ingganna to malangka' penaba anna ingganna pattujunna napompoi asam.
52 Buda tomahaja napatuhum yabo mai okkosam kahajaanna,
sapo' to madio napomatande.
53 Umpadea' kamapiaam ingganna to tadea',
sapo' to makaka nahambai ia lao ma'pala' lo'bä.
54 Umpamoloi pessubunna Israel sabua'na,
tä' deem lembe nakamasei.
55 Aka Puang Allataala tä' ungkalembei pa'dandianna lako Abraham nene to naponene,
sola ingganna pessubunna sule lako salako-lakona.”
56 Umbai' tallu bulampi tohho Maria dio sola Elisabet, mane ma'pasulei lako banuanna.
Kasubunganna Yohanes to si mantedo'
1:57-66
57 Tappana lambi' wattunna keänä' Elisabet, iya undadiammi mesa änä' muane-ane. 58 Naissanna ingganna sambanuanna sola kasahapuanna maaka susi pa'kamasena Debata lako Elisabet, iya tä' deem pada satilalla' duka' sola Elisabet.
59 Kahuai benginna subunna indo änä'-änä', iya suleim anna nasunna'i.* disunna': kalembasanna, ditille. Situhu' pepaondonganna to Yahudi pahallu disunna' asam muane dipotanda diua mendadim umma'na Puang Allataala. Pahallu disunna' änä'-änä' ke kahuam benginna dadinna. Sangngim mohäe la nasangai Zakharia napasikona ambena, 60 sapo' naua indona: “Tää', aka la disangai hi tia Yohanes.”
61 Natimba'iim naua: “Aka tä' deem kasahapuammua' ma'sanga susi.”
62 Iya umpa'pakana-kanam limanna lako Zakharia hapam nakutanai naua: “Aka la disangaiam inde änä'-änä'?” 63 Iya umpelaum batu tuli' anna natuli'i naua: “La disangai Yohanes.” Iya sangngim mängä-mängä pole'. 64 Wattu eta siam anna tibukkai sule pudu'na Zakharia, lambi' mala sule ma'kada anna umpujii Puang Allataala. 65 Ingganna sambanuanna sangngim mahea', anna ia mandam natula' lako dio mai ingganna tau dio tipatanetena Yudea. 66 Ingganna to uhhingngii kaha-kaha ia too sangngim mekutana illaam penabanna naua: “La dadi aka amo indo änä'-änä' ke dako'i?” Aka mannassa anna naundu'i Debata.
Kadanna Puang Allataala napalombum Zakharia
1:67-80
67 Indo Zakharia ambena indo änä'-änä' nasahum Penaba Maseho, nasuhum umpalombum kadanna Debata naua:
68 “Tapujiia' sanganna Puang Allataala Debatanna to Israel,
aka sulem umpellambi'i umma'na anna nalappasam.
69 Nabeengkia' To Mepasalama' tä'um deem tondonna,
pessubunna tomahaja Daud sabua'na.
70 Umba susi puha nadandi Puang Allataala napalanda' ingganna nabi masehona yolona,
71 la nalappasangkia' dio mai balinta
anna kakuasaanna ingganna to ungkabassikia'.
72 Susim too umpatandaam pa'kamasena
anna ungganna'i pa'dandiam masehona indo to puha nadandi lako nene to taponene.
73 Indo pa'dandiam to puha napa'pindai lako Abraham nene to taponene naua:
74 ‘La kulappasangkoa' dio mai balimmu,
anna mala beba'koa' umpalako pa'elo'ku,
75 anna la tontä liukoa' tubo situhu' pa'elo'ku anna umpogau' kamaloloam dio oloku upu' salu katuboammua'.’
76 Anna iko änä'ku, la disangaiko nabinna Puang Allataala To Handam Matande;
Aka ikom too disua mendiolo la umpatokaam lalam Debata.
77 La umpa'paissangam lako umma'na muua la mala tau dipasalama'
ke naampunnim Puang Allataala dosata.
78 Napateem aka tä' deem pada sakasalle pa'kamasena Puang Allataala lako kita,
lambi' tuhum yabo mai suhuga napellambi'ikia'
sihhapam bihha'na allo ke mebengngi'i,
79 la muindo ingganna hupatau to tubo illaam kamalillingam
anna illaam lembäna kamateam,
la napatinanda lako lalam kamasannangam.”
80 Iya tuttuam kasallem indo änä'na Zakharia anna tuttuam manontom. Iya tohhom dio pohiallasam sampe lambi' wattunna umpa'patandaam kalena lako to Israel.
*1:59: disunna': kalembasanna, ditille. Situhu' pepaondonganna to Yahudi pahallu disunna' asam muane dipotanda diua mendadim umma'na Puang Allataala. Pahallu disunna' änä'-änä' ke kahuam benginna dadinna.