21
Puang Yesus dipa'kasallei anna dipakahoa' kasuleanna tappana la umpenandai Yerusalem
21:1-11
Mrk. 11:1-10; Luk. 19:28-38; Yoh. 12:12-15
1 Tappana la umpenandai Yerusalem Puang Yesus sola passikolanna, iya lempä salapi dio Betfage, mesa tondä' dio Tanete Zaitun, mane ussuai dua passikolanna 2 naua: “Le'ba'koa' lako dio tondä' tapenandaia'. Aka sulekoa' too lako, iya ullambi'unna' mesa keledai bihä disäke' sola änä'na. Bukkaia' anna umbabaam duaä' sule. 3 Anna maka' too deengkoa' ungkutanai naua: ‘Akanna mualaia'?’ iya la muuaanna': ‘Aka napahalluam Debata, anna la bale' dipasule siam sule.’ ”
4 Ia asanna ia too dadi anna mala sule lako indo kadanna Debata napalombum nabi naua:
5 “Palandasannia' inde tula' lako issinna kota Sion* issinna kota Sion: Indo dituli' illaam basa Yunani, naua ia ke basa Bambanni: änä' daha illaam Sion. Sion mesa sanganna Yerusalem. Ingganna issinna Yerusalem si bassa' disangai änä' daha illaam Sion. muua:
‘Petua'ia' tomahajammu sule napellambi'iko,
tä' deem pada samahempo penaba anna ussäkei mesa keledai.
Ussäkei mesa keledai lundaha.’ ”† Za. 9:9.
6 Iya le'ba'um duka' indo dua passikolanna anna napalako asanni pada indo napakahi'diam. 7 Naalam indo keledai sola änä'na anna le'ba'i nababaam. Sulei lako, muäläiim jubana anna nalapi'ianni, mane nasäkei Puang Yesus. 8 Wattu eta too buda tau muäläi jubana anna naampa'i lako lalam la naolanna Puang Yesus tanda pa'pakasallena. Anna buda toi duka' tau senga' ussäppe'i palapa andulam anna naampa'i duka' lako lalam. 9 Ingganna tau to ullahui, susi yolona teem ibundinna sikaahhe naua:
“Tapujia' peampoanna tomahaja Daud!
Katambasam to sule illaam sanganna Debata!
Tapa'kasalleia' Puang Allataala To Handam Matande!”‡ Puj. 118:26.
10 Tappana mentamai kota Yerusalem Puang Yesus, iya gege' siaham issinna indo kota anna nauai: “Menna hia umbai' isanga?”
11 Iya natimba'im indo tau buda to ullahu lelem Puang Yesus naua: “Iam too inde diuaam Puang Yesus, mesa nabi buttu dio mai Nazaret mesa tondä' illaam lembäna Galilea.”
Puang Yesus ussua lao to sibalu'-balu' illaam pa'hanteanna Banua Debata
21:12-17
Mrk. 11:15-19; Luk. 19:45-48; Yoh. 2:13-16
12 Puhai ia too, le'ba'um Puang Yesus tama pa'hanteanna Banua Debata. Sulei tama, iya ullambi'um to si balu'-balu' illaam. Tappa nasua siaham lao Puang Yesus anna napembalisannii mejana indo to si ussuka'i doi'na to buttu dio mai botto senga' anna usseham okkosanna to si umbalu' dangam-dangam. 13 Anna mane umpa'tula'i indo tau buda naua: “Deem tisuha' illaam Battakada Debata naua:
‘Banuangku la naongei hupatau ma'sambajam,’
sapo' umpadadi hia' iko pa'mesaanna pa'bulele kalasi anna pa'tombonganna to maboko allo.Ӥ Yes. 56:7.
14 Iya suleim to buta sola to mate sapolona umpellambi'i Puang Yesus illaam indo Banua Debata lambi' napabono' asam. 15 Iya sangngim keaha'um indo kapala sando sola to ullatta' Pepaondonganna Musa tappana naita indo tanda memängä-mängä napadadi Puang Yesus. Anna keaha' toi muita indo änä'-änä' sikaahhe illaam Banua Debata naua: “Tapujiia' anna tapa'kasallei peampoanna tomahaja Daud!”
16 Nasuhum ma'kada lako Puang Yesus naua: “Tä' isanga uhhingngi tula'na inde lako änä'-änä'?”
Natimba' Puang Yesus naua: “Kuhingngi. Sapo' tä' daka' tiko deem umbata illaam Battakada Debata naua:
‘O Debata, Iko umpatudu änä'-änä' sola änä'-änä' malea anna malai naissam untula' pampujiam matim olomu!’ ”** Puj. 8:3.
17 Puhai ia too, iya le'ba'um Puang Yesus umpellei indo tau buda anna lu lakoi mesa tondä' isanga Betania, anna etai ma'bengi.
Puang Yesus umpanata'i satoo' ara
21:18-22
Mrk. 11:12-14, 20-26
18 Mebengngi'i, iya le'ba'um Puang Yesus sola passikolanna ma'pasule lako Yerusalem. Wattu eta too tadea' Puang Yesus. 19 Iya muitam satoo' ara dio ampe' lalam. Iya le'ba'um lako too'na, sapo' tä' deem buana, anggam paka daum bäbä nalambi'. Nasuhum napanata'i Puang Yesus naua: “Tä'ungko iko deem la kembua sampe matemu!” Iya malasso siaham lambi' mate.
20 Tappana naita passikolanna kadadiam ia too, iya tä' deem pada sanakapilla'i nasuhum ma'kada naua: “Maaka hia umbai' anna malai tappa mahekko' bäbä inde dio kaju ara?”
21 Iya nauam Puang Yesus: “Setongam-tonganna, assala'na deenna' kamatappasammu anna tä' tookoa' la bata-bata, malaa' duka' umpogau' inde kupogau' tentomai. Anna tä' angga mandi ia too la malaa' umpogau', sapo' la malapokoa' duka' ussua inde dio buntu mentieli' tama le'bo', anna tä' mala tala dadi. 22 Aka iai too umpelaua' längäm Puang Allataala sola ponno kapahhannuam, tä' mala tala naponnoiangkoa' indo pelauammu.”
Pekutanaanna to umpeängam tuntungam su'be' Puang Yesus diona kabuttuanna kakuasaanna
21:23-27
Mrk. 11:27-33; Luk. 20:1-8
23 Puhai ia too, iya tahhu'um Puang Yesus sola passikolanna tama Banua Debata. Tappana ma'pa'guhu illaam, iya sulem sanaka-naka kapala sando sola matua ulunna to Yahudi umpellambi'i anna nakutanai naua: “Aka isanga umpolalam anna umpogau'i inde mai ingganna pa'pogausam, anna menna umbeengko kakuasaam?”
24 Sapo' natimba'i Puang Yesus naua: “La kukutanaikoa' duka'! Maka' too muissanna' untimba'i, iya etapi too anna mane kutulasangkoa' duka' menna umbeennä' inde kakuasaam. 25 Menna umbeenni kakuasaam Yohanes anna si mantedo'i? Puang Allataala haka hupatau haka?”
Iya sipa'tula'-tula'um naua: “Mapahhi' la ditimba'i, aka taua hia' manii: ‘Kakuasaanna Puang Allataala,’ iya la nauaammakia' too: ‘Akanna tä'ia' ungkatappa'i?’ 26 Iya la taua hia' manii: ‘Kakuasaanna hupatau,’ iya tä' ohi aka mahea' tau lako tau buda. Aka inde Yohanes nakatappa'i asam tau naua: ‘Abana mesa nabi.’ ”
27 Lambi' angga ham pentimba'na lako Puang Yesus naua: “Tä' kiissam la kitimba'i indo pekutanaammu.”
Nasuhum naua Puang Yesus: “Maka' susi, iya tä' duka' kuaku la kutulasangkoa' menna umbeennä' kakuasaam nasuhum kupogau' kaha-kaha ia too.”
To kasallena to Yahudi napasihhapam Puang Yesus mesa änä' tä' untuhu'i ambena
21:28-32
28 Iya umpalao oom mesa pehapangam Puang Yesus naua: “Maakaa' iko susi pikkihammu diona inde kaha-kaha: Deem mesa tau dua änä'na bassim änä' muanem. Indo tau le'ba' umpellambi'i indo änä' uluana anna nauaanni: ‘O änä'ku, laoko temo pengkähängki' lako bela' anggurta.’
29 Sapo' natimba' naua: ‘Mokaä'.’ Puhai naua: ‘Mokaä',’ iya ussossom kalena anna mane le'ba' lako indo bela'na ambena anna mengkähäi. 30 Puhai umpa'tula'i indo änä' uluana, iya lu lako opi indo änä' tämpä'na anna nauaanni duka' umba susi indo tula'na lako änä' uluana. Natimba' indo änä' tämpä'na naua: ‘Io, lao hamä' ambe'.’ Sapo' dio bäbä pudu'na naua: ‘Io,’ aka tä' di le'ba'. 31 Dadi situhu' pikkihammua', mennanna kabam umpalako pa'elo'na ambena inde dua änä'?”
Mentimba'im naua: “Indo änä' ulua.”
Iya nauam Puang Yesus: “Tappa' pentimba'mua'. Sapo' setongam-tonganna, mendiolo leko'um ia tuam passima sola baine passunda' mendadi umma'na Puang Allataala illaam kapahentaanna anna la ikoa'. 32 Aka sule Yohanes to si mantedo' umpaitaikoa' lalam kamaloloam, iya moka hakoa' ungkatappa'i. Sapo' nakatappa'i leko' ia tuam passima sola baine passunda'. Moinna anna muitanna' matappa' indo to si diangga' kadake gau', sapo' moka siangkoa' iko muondo' gau'mu anna tä' ungkatappa'i indo tula'na.”
To kasallena to Yahudi dipasihhapam to untesam bela' anggur
21:33-46
Mrk. 12:1-12; Luk. 20:9-19
33 Mane umpalao oi mesa pehapangam Puang Yesus naua: “Deem mesa tau muampuam sangngenam litä' lo'bä. Pissam wattu natanannim anggur anna nabalai lao pali'. Puhai, umbo'bä'um pallullusam anggur mane umpake'de'i lempo batu la naongei to mangngampana. Puha asanni, iya napa'petesangammi anna mane le'ba' lako botto mambela. 34 Tappana naagiam la matäsä' indo bua anggurna, iya ussuam sanaka-naka sabua'na le'ba' umpellambi'i indo to mantesanna, aka la natahimaam bahena. 35 Sapo' tappana sulei lako, iya ke nasakka hia indo to mantesam. Deem natembe' puso, deem naleba'i batu, anna deem napatei. 36 Iya ussua pole oom sabua'na indo puäna bela', buda puha ia anna la indo yolona. Sapo' napateem pole oo duka'. 37 Katampasanna, ussua änä' ikalena aka naua inabanna: ‘Tä'um tia pole' la napatei inde änä'ku aka la nakalaja' di tia.’
38 Sapo' naitanna indo to mantesam, iya sipattuju-tuju oom naua: ‘Iam too inde to la ullombum kullena tomatuanna. Tapateia' anna mala taalaa' inde bela'na.’ 39 Lambi' nasakka anna napa'tibeanni lako bihim bela' mane naula'i napatei.
40 Dadi, maka' sule indo puäna bela', iya aka umbai' la napogau' lako indo to mantesanna?”
41 Iya natimba'im indo kapala sando sola matua ulunna to Yahudi naua: “Mannassam tia anna la umpatei indo to kadake gau', mane napa'petesangam polei indo bela'na lako tau senga' to la si umbeenni tabana ke lambi' oom wattunna.”†† Illaam inde pehapangam Puang Allataala dipasihhapam puäna bela' anggur. Kapahentaanna Puang Allataala dipasihhapam indo bela' anggur. To kasalle illaam peadasanna to Yahudi dipasihhapam to mantesam. Ingganna nabinna Puang Allataala dipasihhapam sabua'na indo puäna bela'. Anna Puang Yesus Ia dipasihhapam änä'na puäna bela'. Kalembasanna inde pehapangam: Indo yolona Puang Allataala ussua ingganna nabi lao umpellambi'i to Yahudi. Sapo' deem napatei anna deem nadahha. Katampasanna ussua Änä' ikalena lao umpellambi'i to Yahudi. Sapo' la napopepatei duka' to kasallena to Yahudi. Iam too anna la dipassalam indo to kasallena to Yahudi, anna tau taianna to Yahudi la mendadi ia pole' umma'na Puang Allataala illaam kapahentaanna.
42 Iya nauam Puang Yesus: “Tä' daka' tiko deem umbata illaam Battakada Debata naua:
‘Indo batu natibe tukam,
ia leko' di diala dipobatu longkahhim.‡‡ batu natibe tukam: Puang Yesus diuaam aka Ia handam napa'bahinni'i to Yahudi, ma'katampasanna Ia leko' di handam keangga' illaam kapahentaanna Puang Allataala.
Kaha-kaha ia too mala dadi aka pa'pogau'na Debata,
anna takamängä-mängäia' kita pa'pogausam ia too!’§§ Puj. 118:22-23.
43 Iam too anna kutulasammokoa' kuua: Indo pangngalatabamua' illaam kapahentaanna Puang Allataala la naäläi sule anna la napalulakoanni tau senga' to untuhu'i pahentana lambi' ungkembuaam bua la sihatanna. 44 [Anna menna-menna metobä dokko indo batu la huppu'-huppu' bukunna, anna menna-menna natappai indo batu la dahi kapu'.”*** Puang Yesus dipasihhapam indo batu. Kalembasanna, menna-menna untumpu pala' Puang Yesus la dipasihhapam to dihuppu'-huppu' bukunna lambi' tä'um ia deem la ullambi' katuboam.]
45 Tappana nahingngi kapala sando sola to illaam kakalebuanna Parisi indo pehapangam napalao Puang Yesus, iya silele pole' naua: “Kita hia' kita päläe' napasihim indo pehapanganna!” 46 Lambi' umpeäim pole' lalam la ussakka Puang Yesus, sapo' mahea' ohi lako tau buda aka inde Puang Yesus nasangai tau buda mesa nabi.
*21:5: issinna kota Sion: Indo dituli' illaam basa Yunani, naua ia ke basa Bambanni: änä' daha illaam Sion. Sion mesa sanganna Yerusalem. Ingganna issinna Yerusalem si bassa' disangai änä' daha illaam Sion.
†21:5: Za. 9:9.
‡21:9: Puj. 118:26.
§21:13: Yes. 56:7.
**21:16: Puj. 8:3.
††21:41: Illaam inde pehapangam Puang Allataala dipasihhapam puäna bela' anggur. Kapahentaanna Puang Allataala dipasihhapam indo bela' anggur. To kasalle illaam peadasanna to Yahudi dipasihhapam to mantesam. Ingganna nabinna Puang Allataala dipasihhapam sabua'na indo puäna bela'. Anna Puang Yesus Ia dipasihhapam änä'na puäna bela'. Kalembasanna inde pehapangam: Indo yolona Puang Allataala ussua ingganna nabi lao umpellambi'i to Yahudi. Sapo' deem napatei anna deem nadahha. Katampasanna ussua Änä' ikalena lao umpellambi'i to Yahudi. Sapo' la napopepatei duka' to kasallena to Yahudi. Iam too anna la dipassalam indo to kasallena to Yahudi, anna tau taianna to Yahudi la mendadi ia pole' umma'na Puang Allataala illaam kapahentaanna.
‡‡21:42: batu natibe tukam: Puang Yesus diuaam aka Ia handam napa'bahinni'i to Yahudi, ma'katampasanna Ia leko' di handam keangga' illaam kapahentaanna Puang Allataala.
§§21:42: Puj. 118:22-23.
***21:44: Puang Yesus dipasihhapam indo batu. Kalembasanna, menna-menna untumpu pala' Puang Yesus la dipasihhapam to dihuppu'-huppu' bukunna lambi' tä'um ia deem la ullambi' katuboam.