1 Areme Josofu fune urina e ije bu fuone imevo ijiebuo e nigofo ije fu are fuone ije samuamo ije vua izege fu redufuo ijene kuarae. Fu kuae, Ni e gure ruaeva ijiebuo kamui ije bu ire ke vadufuo ije vierafekina kumune bino karina ijia riejiane. Areme ni moni buone bu kumune fuaeveva ijene karina una kamui buone ijia abie kedejiane. 2 Areme ni ame iviene ijadufuo kamui ije kumune diboure rie ro itire ni kafusi none ire siriva ijia amaeriva ije abe ijia kedeno kuae. Josofu fu ijiege e fuone imeno ijene kuaramoga e ije fune ijiege rei.

3 Areme bune naoeva suoke mugamia bune urina doniki buone kena bune una vakuae vae. 4 Ijiege rena bune sidove ije sibaneke arena vako ijia Josofu fu urina e fuone imeno ije kuae, Iviama urina e ige vako ijene nuvediane. A nuvedia va biediakuma ni kia, E ireobo none fuka ja marejiae ro ja irerefuo una ise ije fuone rei. Ja irerefuo kafusi fuone bu ire siriva ijia amaeriva ije iniemena abe ruovono kiane. 5 Ire kafusi ja abe ruovo ije fuka ijia do ino. Ro kuke fu kafusi ijare ire bino bu rekuvejo ije nijaeko fu ijia giamo ja ije abe ruaevano kiane. Vame ije ja reva ije jaka ma ise ije revano kiane.

6 Ijadufuo e ije Josofudo imeno ije fune nuvediana ja biediana Josofu vua izege fu kuaraema ijiege kuariae. 7 Rove Josofudo uviarafa ije bu urina kuae, E Ireobo a vua ije irere kuaemo ije no naebe vierafe. Noka E Ireobodo ive kurae no ire ise ijieki ije noka naebe rei. 8 Ro moni ije kamui nuvuone no kumune keva ire ijia bu kedeva ije none Kenani giana kara una gafia vua vajiae. Ro no irerefuo e ireobo one ijadufuo are ijia ire siriva ro gorodi ije iniemeke? 9 Ni kamui nuvuone ijia reregaga kafusi ije erare abejoga e ije nika kana fu baronekiro e ige gue noeje ni arega no una oefuo moni baki imeno kuae.

10 Bu ijiege kuaravoga e Josofudo imeno fune urina kiae, Ije fune maredo nane ja kuarieva ijiege reke. Ijadufuo na vierafe na e ije erare kafusi ije abema ijiaru mesiri una vaga fu noefuo moni baki imekiro e gure gue jaeje ni vano kiae. 11 Areme ame gaegi ije bune migegire kamui bu keva ijene kari ume ijia na areme bune kamui itire fadia irae. 12-13 Bu fadiana irakoga e ije Josofudo imeno ije fune urina ame boga ijadufuo kamui ijia zinuivena kafusi ije rerei. Fu rerena ruoma Bezimanido kamui ijia kafusi ije kei. Fu ame iviene ijadufuo kamui ijia kafusi ijene kemoga uviarafa fuone buka ma oefiadiamoga bu urina ugone buone farae. Areme bune doniki buone kena una gamia Ijifiti sidove ijia vae.

14-15 Juda fune uviarafa fuone kaenamiana una vakuma gamia keke gake Josofu fu uria are fuone ijia fine. Fu ijia fino bu usiaena nikubae fuone ijia tuana ume ijia dijevoga fu urina kiae, Ja izege rega ja una ruove? Ja vierafekuae nabe giakono kuaena ja ijiege revano kiae.

16 Juda fu urina kuae, E Ireobo no vierafe no vua irere kuarakuva baki. Ro kuke no izege kuaeko ire ije no naebe revano kuaeke? No isema rekuva ije fune Godire guona vierafeke. Ijadufuo ivia e boeje ige none oefuo moni baki imeke. Ro ade e ije fu kafusi abema ijiaru mesiri vakiro nika nodua toenamuono kuae. 17 Rove Josofu fu urina kiae, Na irerefuo ja kame isekafiakuva baki. Rove name vierafe na e ije erare kafusi ije abema ijiaru mesiriga fure noefuo moni baki imeke. Ro ame gue jaeje nine oemarekinu una are asoe jone fino ijia vano kiae.

18 Fu ijiege kuariamoga Juda fu va Josofu fino ijia kekena kuae, E ireobo aka daro ma ireobo kini fu abema a ijiege abei. Ro naeje name e be oefuo imenoevo. Ijadufuo a isekie vua ige na kuaekuvejo ije abe fiena ziemo. 19 Maza ije no ruaeva ije a kuo, Asoe jone fube uria fino ro jabe ame ivierafa binono kue? 20 A ijiege kuomoga no kua, Asoe nuvuone fu uria fi ro kuke fune eore ro fu ame iviene besuno kuae. Ro ame ijadufuo bo fuone ije fune baronemano kuae. Ro fune ame ijare uria fine ro asoe fuone fuka ame ije mukoreigia oetuamono kuae. 21 No ijiege kuaravoga a kuo, Ni va ame ije mesiri roga na gano kuae. 22 Ro kuke no kua, Ame ije fu asoe fuone ije nujana ruakuma asoe fuone fuka baronekono kuae. 23 Rove a kuo, Ja iviene jone ja naebe mesiri ruakuva jabe una na giekono kuae. 24 Ijadufuo no una vaeva vua ije none asoe nuvuone ijene ijiege kuarae.

25-26 Areme asoe nuvuone fu vierafe no una ro kumune bino fuaevekiro kuomoga no kua nobe una vake. Rove no una vakuva noka iviene nuvuone mesiri vakuva no ijare e ireobo ije gake. Ro no bakuva nobe nidua fuone ijia vake. Ijadufuo no una vakuva iviene nuvuone ije fuka noena vano kuae.

27-28 Juda fu ijiege kuarana kuae, E ireobo no asoe nuvuone fu kuke kuaruona kuo fu bara ije fu oetuamo ijare ame inokiro ijene nafe vajie. Rove ame bu fune sauimo fu naebe gako funeka maza ireobo furi. Ijadufuo fu bite bune fanu taraeko ijiebe sakina dabe buvua ivaro fu ijiege vierafei. 29 Ro fu kuke kuo, Iviama naneka eoradieko ja una kuke ame gure mesiri vako ije fu va irufui bino biediakuma ije jane na irufui vajiekuva naneka baroneke. 30-31 Asoe nuvuone fuka Bezimani ma ireobo oetuamo. Ijadufuoro no una asoe nuvuonedo are ijia usiae ro fu gake Bezimani fu naebe noena ruaeva fuka baronedufuo. Ro irufui ije no noeje no konuvuo amaeri. 32 Na asoe none na kua na mukoreigia samua vaekina una mesiri ruako kuae. Ro kuke na kua, Na naebe mukoreigia samuaga fu irufui biekuma nare irufui ije abekono kuae.

33 Ijadufuo e ireobo a isekie, ni ivie none kuaga fu vakiro nare are fuone ije abene. Nare are fuone abena oefuo moni baki imene ro Bezimani fu uviarafa gue ijena una are vadufuo. 34 Ro Bezimani fu naebe nosiki una vakuma naka izege asoe none ijadufuo niome ije gake? Ro fu oefiane abekuma na izege irufui fuone dasumakuva bakino kuae.