17
17:1-9 Pol Mane Tesalonaika Avo Minono Regegeta Uria Re.
1 Ungá umó Filipai doa aria, Amfipolis bogu naava bubua, serigea aria, Apolonia anava bubua, ungá aná naa doa aria, bogu naa ragaro Tesalonaika teterurota. Tesalonaika anava Jiusi enemboda nghaĩ itari kambo* eini avo irieta tafirie. 2 Pol da donu eta uria aghagonu urota, Nangu Undari fefera bakode, umó aria Tesalonaika nghaĩ itari kambova terua, God da Gaganu iruguturota, minono reta urie. 3 Aghá urota, God daiyagha ari-bari akokogo nundubea gia doaita rea, Embó eini itota furari-du riria-da gaganu irugeta urie. Umó enembomi data ambua, kotú amburarivareta jebugea eraita rouvia beago, iruguturie. Aghá iruguturota ririe. “Embó Iesu da Gaga oreki nímandava rera mo, Embó God na ninengota furari-du riria, aná umouvie.” 4 Aghá ririeta, Jiusi enembo dumeni Pol da gaga ningia, gaabee egeguturota, Pol ungá Sailas aghade dano irita egeguturie. Evevetu bingáde kotú Grik enembo dumeni, God gaabee egegeta uria beago Pol da gaga ningia gaabee egegea, numonde danode irita urie.
5 Aghá ueta, Jiusi enembo dumenimi mandudu egeguturota, dogabi emborova jirari kakato dumeni aghi egeguturieta bubua danode ea, Pol ungá Sailas gha nandia, natofoda dibeva bua furaita rea aria, bogu naa susughi uta aria, Jeson da kambo bebato bejea teteruguturie. 6-7 Teterurie-tago, Pol ungá Sailas gha jo tambambi egeguturie-gea, Jeson de kotú Iesu gaabee ari enembo dumenide dano nanandigea bua, naada gavanadava igiguturota, be koko fugea regeguturie, “Ená embobo enda nanjogova dara eaveta siroreta rousua-nu Jeson na bua, unda kambova kaifa eta rouvie. Númane kini eini ragaro Iesu reta rouvia-nu, gaabee eta rousue. Aghá egeguturota, namonde amó Rom enemboda kotofu bee itivada agho dari bejeta rousue.”
8 Aghá regeguturota, anava enembode númanda naada babarigaride kotú gavana manede dano avo desiturieta, Jiusi enembomi Iesu da yaveronu injigha ari-du rea, duberu regeguturie. 9 Aghá urieta, naada kokotofumi regeguturieta, Jeson unda kokomanade, rourogo rekago dara egegauve-degea regeguturieta, guri jojabe ututuguturie.* Fefera tufokova dara rekago jo ambi egegasua mo, númanda guri rekago doa utasueta bubugasue. Aghá urieta, númane dotuturieta igiguturie.
17:10-15 Beria Bogu Naava Iesu Da Gaganu Minono Regegeta Uria Re.
10 Tumba ririturieta, Iesu da yavero erea, Pol ungá Sailas gha ninenguturieta, Beria bogu naava arie. Aria bubua, ungá Jiusi enemboda nghaĩ itari kambova* igiguturie. 11 Jiusi enembo Beria bogu naava kotofuda aitonu fugeta urie. Jo Tesalonaika Jiusi enembo uria aghagonu egegambi re. Beria enembo Pol ungá Sailas ghada gaga gangorogha niningigutuaveta, ungá umó rifo inono God da Gaganu nghaĩ ititigeta urie. Anada bee mo, Pol da gaga mo, gaa bee ra aĩ, gavera ra, ananu ningia tanana urota God da Gaga irugeta egeguturie. 12 Aghá urota, Jiusi enembo oruabe, Grik embobo oruabe, kotú Grik evevetu bingáde vitiria-mi, Pol da gaga niningigea, Iesu gaabee egeguturie.
13 Pol Beria bogu naava irirota, God da Gaganu minono rieta, Jiusi enembo Tesalonaika bogu naava vitiria-mi niningigea furia, Beria bogu naava bububugea, Pol ungá Sailas gha tuvari-du o dari-du enemboda neno evuruturie. 14 Aghá ueta, Iesu da yaveromi Pol ninenguturieta, karajekena vorarie. Atá, Sailas ungá Timoti gha Beria naava jiriturie. 15 Embobo dumeni Pol kanona ea, numonde aria, Atens bogu naava bububugea, Pol na eghá ririe, “Timoti ungá Sailas gha tutumi ninengota furari-du rere,” aghá ririeta, númane Atens doa kaverea Beria igiguturie.
17:16-34 Pol Na Atens Bogu Naava Minono Reta Uria Re.
16 Pol Atens avo, Timoti ungá Sailas gha furari-du kaifa urota, aná bogu naava enemboda ingomi uubu ari god nu tumogha baĩ egegeta uria-nu gia, númandu neno mema jojabe urie. 17 Amindu, Pol na Jiusi enemboda nghaĩ itari kambova* Jiusi de kotú Jiusi enemboda dumeni gitofo God gaabee egegeta uria-de, besiga ininigha urota, uriga eta urie. Kotú fefera inono umó iiava utua bari kambesiva enembode ininigha besiga egegeta urie.
18 Kotú, irugari kakato noni ungagha beago fuava, Pol de besiga egegeta urie. Noni eini rera-da ragaro Epikurian rirota, kotú noni eini Stoik regegeta urie.† Baiboro rova ená gaga “irugari kakato … noni ungagha … ragaro Epikurian … Stoik regegeta rousua” gaita rora, jo irugari kakato sasingu mane irugeta rousua-du rambi re. Enembo bee mane nundubari dabako urota, uumo danode egeguturota, mino-mino númanda nundubari manedu rea niningigeta uria-du reirie. Noni eini Epikurian reiria mo, númane gaa bee, kotú nundubari bee, beforo gari beenu tanana ari mana-mana egegeta urie. Jo tambari inono irambi gaa regegeta urie. Aghá-gea, númane eghá irugeta egeguturie, “Namonde anda beforo gari-de, nundubari-de aná ijoko re. Atá, namonde anda itatamade unode, aná jojabe re.” Kotú enembo dumenida noni ragaro Stoik, númane daiyagha beforo gari kotú nundubari oruabe bubugasua-nu nundubuturota vitirie. Númane eghá irugeta egeguturie, “Namonde anda tamoda uno bureguturota, beforo gari rururota iririgore!” Pol na Iesu da Gaga Taubana, umó, daiyagha ea amburarivareta jebugea eroruria-nu, irugeta uria-du, irugari kakato dumenimi kuvia gegha regeguturie, “Ená embó be fusama reirie. Umó daiyagha reiri?” kotú dumenimi, “Umó abua dumenida god maneda bingánu reiria-jogo.” aghá regeguturie.
19-20 Kanisera* mane Areopagus ootova desea irieta, númane Pol bua aria, avo bubua, eghá regeguturie, “Imó gaga reka rieta, námanda tutunova reisi-niningore. Amindu, anada beenu rege, námane niningigore.” 21 Aghá regeguturia-da bee mo, Atens enembo kotú abua dumeni Atens bogu naava vitiria-de dano, númane buro ambi, tefo desea irirota, gaga reka kotú nundubari reka manenu rea niningigaita uno egegeta urie.
22-23 Areopagus danode desari kambova, Pol na kanisera maneda dibeva jiria eghá ririe, “Amó nímanda naava deĩ urota, nímanda benunu ari kambesi oruabe tambere. Amó rei-gerore, nímane god dumeninu kakara egeguturota, benunu eta rosoravore. Amó eve deĩ urota, benunu ari faro eini tafivutare. Faro tamova donu gefiria aná evere:
‘Ená God Ragaro Jo Ningambi Vitera,
Undú Faro Tefo Rei-simbugetore.’
Avore, nímane ená god ragaro jo ningambi irirota, tumogha baĩ eta rosoravore. Umó avouvi, anona oreki karigota niningigaita rosoravore. 24 1 Kgs 8:27; Is 42:5; Eka 7:48Ená God rera, unona uutude endade eini-eini nanjogo endava dano, uubu urieta siroruturie. Endade uutudeda Jojabee umouvie. Atá, umó jo enemboda benunu ari kambova enembo irambi eta rouvie. Umó uutude endade dano beda ea irita rouvie. 25 Namonde amó jo God sonembari inono irambi re. Anada bee mo, eini-eini nanjogoda jebuga unona ututa rouvie, kotú namonde andava jebuga fefera yafabe unona ututa rouvie. 26 God na sei embó dabako urieta siroruturieta, unda imemendinu God na ririeta, númanda abua ari abua ari siroruturieta, númanena roo enda niavo-niavo ya nanjigo naa binjugea asusumbaita rousua, kotú fefera domi ya naa binjugea asumbea iririguturogo ambubugaita rousua, God na gategea ririeta, aria, naa binjugea asusumbuguturie. 27 God aghá uria-da bee mo, namonde amó umó tava ea, tambari-du urie. Avotago, God namonde andava jo airobe irambi re. 28 Kotú, nímanda irugari kakato dumeni beago, aghago gigiguturota, eghá gegembuguturie.
‘Ano undavareta futa rouvie.
Kotú namonde amó unda anomi retueta jebuga desea vitere.’
Gaga eini mo,
‘Namonde amó unda sasingu re.’
29 Anada bee mo, namonde amó unda sasingu re. Amindu namonde jo nenomi nundubuturota, auri eini (goldi o siliva reta rousua) o singoi eini bua anami uubu ea anadu God gaa rambi aita rosore. God mo jo enemboda ingomi uubu ari aghago irambi re. 30 Enembo dano sei God da Agho Dari jo tanana egegambi re. Amindu númanda sembago mane God gia dotuturie. Avotago, oreki God namonde amó niavo-niavo desea vitera, neno kaveruturota namonde anda ari-bari akokogo karigari-du reirie. 31 God na irurarida fefera eini gateguturieta vitie. Ambova furaita rouvie. Namonde ananu gari-du rea, God ririeta, unda Mendi amburarivareta jebugea erorurie. Irurarida feferava, God na rata, aná embó amburarivareta eroruria-mi, enembo nanjogo unona beedu-enembo iruraita rouvie. Umó enemboda ari-bari akokogode taubanadedu rea, unda beedu-enembo iruraita rouvie.”
32 Avore, Pol na Iesu ambua eroruria-da gaganu ririeta niningigea, enembo dumeni kuvia gegha regeguturie. Kotú dumeni eghá regeguturie, “Ambova kaverea fu, ená gaganu rekago riradi niningigore!” 33 Aghá regeguturieta, Pol erea arie. 34 Enembo dumeni Pol da gaga niningigea, Pol da yavero egegea, Iesu gaabee egeguturie. Areopagus da kanisera maneda eini, ragaro Dionisius de, evetu ragaro Damaris de, kotú enembo dumenide dano Iesu gaabee egeguturie.
*17:9 Fefera tufokova dara rekago jo ambi egegasua mo, númanda guri rekago doa utasueta bubugasue.
†17:18 Baiboro rova ená gaga “irugari kakato … noni ungagha … ragaro Epikurian … Stoik regegeta rousua” gaita rora, jo irugari kakato sasingu mane irugeta rousua-du rambi re. Enembo bee mane nundubari dabako urota, uumo danode egeguturota, mino-mino númanda nundubari manedu rea niningigeta uria-du reirie. Noni eini Epikurian reiria mo, númane gaa bee, kotú nundubari bee, beforo gari beenu tanana ari mana-mana egegeta urie. Jo tambari inono irambi gaa regegeta urie. Aghá-gea, númane eghá irugeta egeguturie, “Namonde anda beforo gari-de, nundubari-de aná ijoko re. Atá, namonde anda itatamade unode, aná jojabe re.” Kotú enembo dumenida noni ragaro Stoik, númane daiyagha beforo gari kotú nundubari oruabe bubugasua-nu nundubuturota vitirie. Númane eghá irugeta egeguturie, “Namonde anda tamoda uno bureguturota, beforo gari rururota iririgore!”
17:24 1 Kgs 8:27; Is 42:5; Eka 7:48