16
Yesu mi eniya ge gaiapa sima ari emboda budo sisina.
1 Ango edo Yesu ainda ambodanide eniya ge nei engo sisina:
“Iji da (1)de rorae embo da (1) ami gisijiari avigesisina, ainda gaiapa sima arate. Edo ainda amboda embo neneimi gundo rorae embode, ‘Embo awa ito gaiapa sima ae dumbae eira,’ ango tedo bekumba esitera. 2 Awatedo, rorae embomi ainda buro embo dao tesiri gumbiri ainde sisina, ‘Imo buro nongo nongo eto embo neimi imo bekumba ero ge ingeni? Buro nongo esi awa ove gaiedo pieyo gane! Imo gisijiarida buro dodo idege!’
3 “Ango tesiri buro embomi akuta tedo sisina, ‘Na buro ro ani? Badarari natomi buro natoda teugaina awa. Na goroba itae. Nanemi butu durari tao ae. Edo na embo neinde ganu piorote atega ana, awa mengari nato. 4 Awara, na kotembari dave bena. Edo gido engo ana, iji nonde nato badararimi na buro natoda teugari idegano, embomai neneimi na “Oro” tedo bara awamaneda mandoda.’
5 “Edo imo embo ainkaimi ainda badararida roviravi tepo kundo jigamo esitera, awamane berari dao tesiri guputera. Edo embo gisi gupusina ainde tedo gosisina. ‘Imo badarari natoda rorae mina piae nandogo tepo budo jigamo eutasi?’
6 “Edo embo gisi gupusina ami mina sisina, ‘Na ni olive beda gama sigi* ni olive beda gama sigi da da tega awa 30 litres ango. babaingo 100 awa gerigari beda ari burana.’
“Awatedo, gaiapa sima ari embomi ainde sisina, ‘Awara, ingota ito eire kundo anumbedo 50 gaieyo.’
7 “Ango edo embo nei gumbiri ainde sisina, ‘Imo badarari natoda rorae nandogo tepo budo jigamo eutasi?’
“ ‘Na wheat kanjia babain 1,000 burana,’ embo neimi ango sisina.
“Edo gaiapa sima ari embomi sisina, ‘Awara, ingota ito eire kundo anumbedo 800 gaieyo.’
8 “Edo badararimi wasiri awa gido gaiapa sima ari embo dambu darae awa dasiga esisina, aindabé, ami ainda jirogari jigamo edo buro esisina. Ge engo tena, aindabé, iji einde butu embomaimi awamaneda jirogari jigamo jiwae eite buro edo era, ata God da embomaimi tepo awamaneda jirogari jigamo saka eite buro edo era. 9 Edo nanemi imondemane tena, itomane butu gaiapami, otawo teteka bawate, ango buro ewo. Edo ango awa, iji nonde imomane betedo utuda mambawo awamanemi imomane ategesite bara, natopo itari nasi ainda.
10 “Edo embo aimi rorae sakabé awa gebémi jigamo aina gido, embo awa rorae bajina awa inono jigamo aina. Edo aimi rorae sakabé awa jigamo ae dumbae aina gido, embo awa rorae bajina awa inono gebémi jigamo ari tao ae. 11 Awatedo, gaiapa butu einda jigamo ae dumbae edo ewa gido, God da gaiapabé natopo itari utuda awa mana imondemane piaina. 12 Edo imomane embo neinda rorae jigamo ae dumbae edo ewa, embo aimi rorae itomane topobé imondemane piaini?
13 “Buro embo da (1)mi badarari tote (2)da buro iji dá ainde ari tao ae. Embo awa ainda badarari nei jipapa ae eite neinda dubobudo aina, ko ami ainda badarari nei tou eite neinde sinigambari edo aina. Inemane God ae butu gaiapa de tumondebain ari tao ae.”
Yesu mi God da Aodarida gebé ari matawa itaina awa atopaposisina.
(Matthew 5:31-32; 11:12-13; Mark 10:11-12)
14 Edo iji ainde Parasi mane ganu dubobudo esitera, awamane yai ainda isite Yesu ge berari sira awa gido imo tedo jijiritera. 15 Ata embo ami awamanede sisina, “Imomane emboda jisida wasiri dambu darari ango edo ewa. Ata God mi do itomane gido eira. Awatedo, imomane ajiregaina. Dave rorae ango embomi kotembedo era awa beyaebé God da jisida.
16 “Edo Aodarida† Aodari da moka einda awa ge berari God mi Moses de piesiri gagurisina. Awatedo, Judah embomaimi ove gaiari ipa da (5): Genesis, Exodus, Leviticus, Numbers, edo Deuteronomy awa, dao ‘Aodari’ tedo esitera. ae Peroveta maneda Ove Gaiari‡ Peroveta maneda Ove Gaiari awa God da ge ainda bino onjigarida karigari embobomi iji matu gaguritera, Isaiah edo Daniel ango. de awa matawa isiri John Bapataito Ari Embo gupusina. Ainda edo, God da gisijiarida bino dave awa karigedo era. Edo embo jiwaebé awa ingido God da gisijiarida torain mina mita edo esitera. 17 Awarata giwo! Utu de butu de awa manaina, ata God da Aodarida ge saka da (1) bé awa mana siraina.
18 “Edo embo da aimi ainda arode ove engo ‘Jimbari itae ena’ gaiedo ainda aro dowari mambari eutu nei jimaina, embo awa jimbo ipuda ari ainda aro matuda yai esira. Edo embo da aimi eutu nei iu dowari jimaina, embo awa jimbo ipuda ari ainda iu matuda yai esira.
Yesu mi gaiapa embo ae Lazarus deda ge jijirisina.
19 “Awara, gaiapa embo da (1) isinesina. Ami ombari jiari tokona§ tokona awa ove dangiri ae ororo deda baige ari. virarae mina babain piedo bari awa omundo iji berari injido kundo eite dubodave edo esisina. 20 Edo daedo, iji angode awa, mapa embo da (1) isinesina. Ainda dao awa Lazarus, edo embo awa ginimi tutupegari. Iji berari ainda otatawomi kundo maundo embo gaiapade ainda manguro beda kondade ari atega ain pioro isima edo esisina. 21 Edo imo gaiapa emboda tenemba indari itoto durari awa, inain jipapa edo esisina. Ango isiuri sinomanemi gundo ainda gini mamatu taribo eora.
22 “Ango edo, mapa embo awa betesiri God da anelamanemi kundo maundo Abraham da demonda* Abraham da demonda awa kariwa ge. Yai awa betari embomai daveda asisida oena apari yai davebé dave. God da gebé ari embomai Abraham ae Jacob de David de yai ainda matu maunsitera. Awatedo, iji nonde mapa embo betedo, ainda asisi yai ounda maundo imo Abraham tamundo embo ainde umojijieite isinesina. pipisitera. Edo gaiapa embo daedo betesiri goitera. 23 Embo awa goietero imo bebetegarida sima ari yai,† bebetegarida sima ari yai da dao nei awa ‘Hades’ edo ainda kupo awa tote (2). Kupo da (1) awa betari embomai beyaeda asisida rirowa bari yai. Kupo nei awa betari embomai daveda asisida oena apari yai davebé dave (Abraham da demonda). Yesu da betedo erari gisida, ‘Hades’ awa bebetegari embo berarida asisida sima ari yai. niyao matawa aveira, ainda maunsisina. Edo imo yai ainda isite memesi bajinabé bureite jisi piedo da aikeda Abraham gosisina. Edo daedo Lazarus aikae Abraham da demonda isiri gosisina. 24 Awatedo, embo ami Abraham dao tedo sisina, ‘Mamo Abraham, niyao emi na aveira, edo memesi beyaebé burena. Na do ewasi! Lazarus pie, ainda ipa toromi un saka jimundo kundo gundo iwawa natoda piari damodamo are.’
25 “Ata Abraham mi mina sisina, ‘Mai nato, kotembeyo, iji angode imo butuda isima esiteta awa, rorae davegave budo esiteta. Ango eiwoto Lazarus awa rorae bebegae budo esisina. Ata embo awa boroko kondade ari dave bureira, edo imo memesi beyaebé bureta. 26 Awarata, nei da (1), aindabé, God mi yai tonga kapari ugonubé pipisisina toropu nakare itera einda edo imomane ainda, na imo kondade ari tao ae ena. Awatedo, embo da aimi nakare itera einda isite imomane ainda maundo tembari tao ae, edo embo da aimi imomane itewa ainda isite nakare einda gundo tembari tao ae.’
27 “Edo gaiapa embomi sisina, ‘Aiyaee! Mamo Abraham, ango teta awatedo, Lazarus piewasi mamo natoda mandoda mambare. 28 Aindabé, nato nanonameji ipa da (5) ounda itera, awamane ge tari gore. Buro beyae nane eona, edo memesi beyaebé bari yaida gumena itena, engo eóre!’
29 “Ango tesiri Abraham mi ge mina sisina, ‘Awamane itera ainda Moses da Gaiari ae‡ Moses da Gaiari da moka einda awa ge berari God mi Moses de piesiri gagurisina. Awatedo, ove gaiari ipa da (5): Genesis, Exodus, Leviticus, Numbers, edo Deuteronomy awa, dao ‘Moses da Gaiari’ tedo esitera. Peroveta mane deda Ove Gaiari, embomi ajigedo tera, ami awamane inono atopatari gara.’
30 “Ami sisina, ‘Ango ae Mamo Abraham! Ata, edo embo da (1)mi bebetegarida edo maundo awamanede ge taina, awamaneda beyae dodo God da yai wareregara.’
31 “Ata Abraham mi gaiapa embode sisina, ‘Edo awamanemi Moses ae Peroveta mane deda Gaiari, embomi ajigedo tera, awa ingainyae, edo bebetegarida embo da (1)mi erido maundo awamanede ge taina, awamane daedo gebé ainyae.’ ”
*16:6 ni olive beda gama sigi da da tega awa 30 litres ango.
†16:16 Aodari da moka einda awa ge berari God mi Moses de piesiri gagurisina. Awatedo, Judah embomaimi ove gaiari ipa da (5): Genesis, Exodus, Leviticus, Numbers, edo Deuteronomy awa, dao ‘Aodari’ tedo esitera.
‡16:16 Peroveta maneda Ove Gaiari awa God da ge ainda bino onjigarida karigari embobomi iji matu gaguritera, Isaiah edo Daniel ango.
§16:19 tokona awa ove dangiri ae ororo deda baige ari.
*16:22 Abraham da demonda awa kariwa ge. Yai awa betari embomai daveda asisida oena apari yai davebé dave. God da gebé ari embomai Abraham ae Jacob de David de yai ainda matu maunsitera. Awatedo, iji nonde mapa embo betedo, ainda asisi yai ounda maundo imo Abraham tamundo embo ainde umojijieite isinesina.
†16:23 bebetegarida sima ari yai da dao nei awa ‘Hades’ edo ainda kupo awa tote (2). Kupo da (1) awa betari embomai beyaeda asisida rirowa bari yai. Kupo nei awa betari embomai daveda asisida oena apari yai davebé dave (Abraham da demonda). Yesu da betedo erari gisida, ‘Hades’ awa bebetegari embo berarida asisida sima ari yai.
‡16:29 Moses da Gaiari da moka einda awa ge berari God mi Moses de piesiri gagurisina. Awatedo, ove gaiari ipa da (5): Genesis, Exodus, Leviticus, Numbers, edo Deuteronomy awa, dao ‘Moses da Gaiari’ tedo esitera.