1 Mi aaqannanasaa Yaaweefa Mooseena qimaminoo qinau. 2 Anee Isaraee maqannaasa qimanniminaqa misa oosana oosana ainaina qini qimiani qinnana qimiaqa. Faiqí anaasee qini qimirara nidinaqa minisainna ainaina anee mara quqaa. 3-5 Maa ainainausa maree anifaranoo. Koora faqa siruaa faqa booroosa faqa amiqira qamunna faqa dirindaasi akira sipsipa asausi faqa pannoona akira sipsipa asausi faqa faeena akira sipsipa asausi faqa mimmi asausinnai auqira qamunna faqa sipsipa akoona apatasaa faeena akirana faqa ooruku nammariki mari firaa noodaana apata faqa akasia saqari amiqira saqari faqa maree minisaifana mara quqaa. 6 Qooma qumbi maria fadameenna faqa aanaiqikirausa aki maria oosana oosana fadameenna faqa moo pauraqa ida arasaafanoo muninoo amiqira afundi mari pauraqana faqa mini amiaqa. 7 Firaa feefauru aqi maria oonisa faqa aka amiqira ooniuqa faqa aanaiqikirausa eefooda qamunnasaa faqa nimuqusasaa rumbee marianasaa faqa atooqaaqa.

8 Isaraee maqannaasa qimanniminaqa qini naaquqara uiqaana maqa usakasaifaqa qinee misa qambaanai marianaura. 9 Innee uiqaana maqa faqa minakinaa aiqama ainaina faqa qinee naakapaunandee miqi kai masee auquaqa.

10 Innee akasia saqari marasee minannai moodaanaki kira bookisa auquaqa. Mina kisaaqa 110 centimetres amana auquaqa. Mina qusandanai faqa mina kuradarafa faqa amana amana kai 66 centimetres amana auquaqa. 11 Innee amiqira koora marasee turimmasai ausi rumafinaqa minannai kai bookisa adisaa faqa aundurai faqa ititaaqa. Mi bookisana afaimau koorannai amatookika masee rafaaqafuaqa. 12 Innee koorannai qaindusi fandinnana amaaqa qaara faqa qaara faqa 4 auqusee aiqama aikusaa quqaaqa. Dinni aikusaa qaara qanda dinni aikusaa qaara qanda quqaaqa. 13 Akasia saqari qaindusi fandinna qanda koora turimandee ausiruma qumaree minannai kukuqiaqa. 14 Kukuqa maseeqa dinni dinni amaaqa auquqainnanaki ausuaqa. 15 Miqimmaseeqa sia radukuaqa, saifanoo miqinoo mariani. 16 Miqimma saifaqa kasooaqee qaara oonisaa qeeqa sanda ufa akara ruma nimianaqa minaki quqaaqa.

17 Bukisa afu faqa Koorannai kai auquaqa. Mina kisaaqa 110 centimetres amana mariani. Mina qusa 66 centimetres amana mariani. 18 Innee kooraa turimmaseeqa bukisa afu auquseeqa minannai kai dinni dinni qangiroo qaara qanda nimana auquaqa. 19 Afu dinni atinni moo qangiroo amana auqusee dinni moo qangiroo amana auquaqa. Afu faqa mi qangiroo qanda nimana faqa moodaa koorannai kai auquaqa. 20 Mi qangiroo qanda bukisa afusaa quqasaifaqa noori narí qafee narí qafee iaqa. Miqanda niqoosa uqeerasaifanoo bookisa afusaa ititanoo mariani. 21 Qaara oonisaa sanda ufa marina mi bukisanaki quqasee afu rafaaqafuaqa. 22 Qinee inni faqa miqoo moodaanakika mafiqa bukisa afusaa qaara qangiroo qambaana maridaqa qeeqa sanda ufa inni Isaraee maqannaasa nimianaura.

23 Innee akasia saqarinnoo teeboora auqauqa. Mina kisaaqa 88 centimetres mariani. Mina qusandanai 44 centimetres mina kuradarafa 66 centimetres mariani. 24 Innee amiqira koora marasee turimmasaifanoo ausiruma finaqa minannai teeboora rafaaqa fusee kafaa moonnai teeboora atiqara fiqu fiqumma rafaaqa fuaqa. 25 Innee teeboora atiqara fiqu fiqumma 8 centimetres amana ititasee mina afaimau koorannai rafaaqa fuaqa. 26 Innee koorannai qaindusifandinnana amaaqa 4 auqusee teeboora aiqama aiku namusaa quqaaqa. 27 Teeboora afai ameemaanandanai qaindusirana amaaqa auquaqa. 28 Qaindusifandinna saqari qanda akasia saqari ateekasee koorannai mina kuku iaqa. 29 Amiqira koorannai kai teeboorasaa quqeefandinna pirita kaafausa faqa kisaaqa kaafauqa faqa uainna adiara pirita uqnaurirana faqa auquaqa. 30 Qini qimifandinna bereetana mi teebooranasaa quqaqaifanoo aiqama kari qini moodaanaki kira bukisa aaqa mariani.

31 Innee qooma qumbifandinna aikana amiqira koorannai auqua. Innee koora turiiseeqa minannai kai qooma aika oosana faqa adaka faqa asaanauqa faqa auquaqa. Mi asaanausa saa mi kooranannai kai taatuqee aqama afufeenaari marindee maseeqa auqusaifanoo kaafara foora afisu amaqanoo mariani. 32 Mi qooma aikausa qisauku dinni taikasee dinni ani moodaa marasee 6 mariani. Dinni qaaramoo dinni qaaramoo mariani. 33 Aiqama mi asaana namuna atimau koorannai taatuqee aqama afufeenaari marindee masee afaaqa auquaqa. Mi afufeenaarirafa teeqnoorina aqamara foora marufaqa mi asaana namuna saa auquaqa. 34 Mina adakasaa qaara faqa qaara faqa 4 saa taatuqee aqama teeqnoorina aqamara foora auquaqa. 35 Moodaa aqama indaaruqaa asaana qara ameemaanai mariani. Kafaa mina murufi asaana qara ameemaanai moo aqama mariani. Kafaa mina murufi asaana qara ameemaanai moo mariani. 36 Amiqira koora turiiseeqa minannai kai oosana faqa asaanauqa faqa afufeenaarirana faqa auquaqa.

37 Miqimmaseenana dinni taikasee dinni ani qaara qanda marasee 7 qooma auqusee mi asaanausa ati mau quqaa. Quqaseenana mara quandasainanoo mi qoomausa kaaqa qarafa sia kaqinni fuani. Maaqa aundurai kai kaaqa qaani. 38 Mina ufaqa faqa futufita faqa amiqira koorannai kai auquaqa. 39 Qooma quqara aika amiqira koorannai 35 kilogram ummaara amana kai marasee auquaqa. 40 Moosee qinee aaqanasaa ani qimamunandee aiqama ainaina miqikaimmasee andeeqasee auqua.