Salmo 107
107
I kafye mgimò Amuito Dwata di dad ton
1 Too gamu mlé fye di Amuito Dwata, du too kenen fye;
i kakdon, landè kgilin kel di landè gusenan.
2 Dnayenyu kenen, kdeeyu i tafalwaan.
Gamu dad to tansoan mdà di kagot dad to dmuen gamu, fye ku tulenyu!
3 Tulenyu sa, du tafasfuléan gamu di gamu banwe,
mdà di gusambalétla gamu di dad banwe gsen di gusut i duh, na gsen di gusdafan,
na mdà di dad banwe gsen di gufdu i nus sabnal na gsen di gufdu i nus timul.
4 Nun dademe di dad to falwaan du tatì ale lamngab di banwe gulandè to,
na landè teenla banwe fye gumnèla.
5 Bitil ale na malau,
na too mlungay i nawala.
6 Bay di knèla fa di sasè kagkahla tlola Amuito Dwata,
na falwaan ale di kaflayamla.
7 Na nalakan ale di matlu dalan salu ditù di bong banwe gufnean dale.
8 Taman fye ku too ale mlé bong fye di Amuito Dwata mdà di kakdon landè kgilin,
na mdà di kafye mgimoan di dale,
9 du kenen i mlé ninum di dad to malau,
na mlé fye knaan du fabsolan i dad to bitil.
10 Nun dademe, salngad ku mnè ale di gukmifun, dunan i too sasè kaflayam;
gakfè ale na mgikat ale di kaflayam, na lê mgikat i dad blìla sangkalì.
11 Maflayam ale du taknagolla i kated Dwata, i Too Mdatah,
na tanadoyla i flaun dale.
12 Taman fdanà ale fagu di too blat fimòla dale;
na di klungayla fugen ale, na landè to tmabeng dale.
13 Bay di knèla fa di sasè kagkahla tlola Amuito Dwata,
na falwaan ale di kaflayamla.
14 Falwaan ale di gukmifun,
na falwaan ale di dad gamgikat dale.
15 Taman fye ku mlé ale bong fye di Amuito Dwata mdà di kakdon landè kgilin,
na mdà di kafye mgimoan di dale,
16 du kenen i gmagan lambà dad takab tek,
na tamfò i dad taldak tek gumilanggù dad to.
17 Nun dademe mbaling fandas mdà di kgimòla sasè,
na maflayam i lawehla mdà di sasè nimòla.
18 Talandè ayèla kmaan balù tan bung gkaan,
na tafan ale mati.
19 Bay di knèla fa di sasè kagkahla tlola Amuito Dwata,
na falwaan ale di kaflayamla.
20 Na fagu alò di taluan fanguléan ale mdà di dad fdasla,
na falwaan ale mdà di fati.
21 Taman fye ku mlé ale bong fye di Amuito Dwata mdà di kakdon landè kgilin,
na mdà di kafye mgimoan di dale,
22 na fye ku mlé ale fye di kenen fagu di kadsù,
na ku tmulen ale gablà di kdee mgimò Dwata di dale fagu di lehew lingag.
23 Nun dademe di dale maweng mifal di mahin;
smakay ale di malbang kafal di kafngaballa klidùla.
24 Na ditù di tah i mahin teenla lêman i dad mgimò i Amuito Dwata,
na i dad gamtikeng mgimoan di gumngalam i mahin.
25 Du dekan i mahin, na nun kel bong mgal nus,
na mbaling malbang i dad lwek.
26 Na i dad kafalla magket di tah mahin di kgal i nus,
na lê gsulif salu di lam i gumngalaman,
na landè nan fandamla ku galwà ale
du mdà di klikòla.
27 Fan ale fugen di kagula di kafal gambet i dad to langal,
na landè nan gadèla nimò di kebela i kafal snakayla.
28 Kabay di mnè ale fa di sasè kagkahla tlola i Amuito Dwata,
na falwaan ale di kaflayamla.
29 Na fafanakan i kgal i nus na mahin,
na mbaling lanél i mahin.
30 Na too ale lehew du talanél nan i mahin,
na neben ale fsalu di gudmuung i kayèla gumafat.
31 Taman fye ku mlé ale bong fye di Amuito Dwata mdà di kakdon landè kgilin,
na mdà di kafye mgimoan di dale,
32 na fdatahla kenen di bong kastifun i dad to,
na dnayenla di kastifun dad tua gal mebe dale.
33 Too mtulus Amuito Dwata du fkafagan i dad malbang yéél,
na fatlagan kaloh i dad sfuten du fye baling kafag i tanà di banwe i dad to sasè.
34 I tanà mabù fanbalingan mahì,
du mdà di ksasè i dad nimò dad to mnè ditù.
35 Na i dad kafag banwe landè to mnè ditù, fanbalingan tanà nun dee kligu,
na fatbulan i dad sfuten ditù,
36 du ditù gufnean dad to bnitil,
na ditù gufdakla i syudadla du én banwe gumnèla.
37 Na di banwe atù i gumlala, mule ale i walad grép,
na too bong gwèla ulê i fulela.
38 Na toon ale fbel fagu di dee kafye blén dale,
na kel di dad lmanafla, landè gukulangla.
39 Kabay di kbaling là dee i dad ton mdà di sasè kabkut i dad to dmuen na misan dale,
mbaling ale too mdanà mdà di kaflayamla na klidù nawala.
40 Taman fite Dwata i kaflabean i dad to mkut dale,
na tatian ale falngab ditù di banwe landè to di landè too gugafatla.
41 Kabay i dad to landè, i dad to bankut, falwaan ale di kaflayamla,
na fbelan ale salngad di kbel dad lmanaf too fanse nifat.
42 Di kite i dad to matlu i kifatan dale too ale lehew,
bay i dad to mimò sasè, landè gmanla.
43 Na balù simto to fulung faldam fye ku toon fandam i gmangu,
na fye ku toon dnilè i bong kakdo Amuito Dwata landè kgilin.