Salmo 130
130
Én katlo i to gamsalà ftabeng di Dwata
Ani satu lingag i dad to salu di Bong Gumnè i Amuito Dwata.
1 Amugu Dwata, di too sè klidù i nawagu,
tamlo agu di ge.
2 Amugu, begam agu fanlinge;
fanlingem i katlogu ftabeng di ge.
3 Amugu, ku galam too neye i kdee gugsalàmi, na laam nlifet,
simto galwà di kukumam? Landè sa!
4 Kabay nlifetam sa i salàmi,
du fye toomi ge nafè na nimen.
5 Toogu fatan i kafalwà Amugu Dwata deg,
na smalig agu di tnaluan.
6 Smasaw i nawagu fatan i tabeng i Amugu Dwata,
mdatah fa di to munung di butang fatan i kakwalan.
7 Gamu bel Israél, smalig gamu di Amuito Dwata,
du i kakdon landè kgilin,
na fdu di kenen i kagalwà landè gukulangan.
8 Na kenen msò i bel Israél di kdee salàla.