1 Dii á Lua nɛ́ↄn á ũ. Ásu à á mɛ líli ge à á mi bo gɛ yã́ musuo, 2 asa Dii á Lua gbɛ̃́ pↄ́ an kua adoaↄn á ũ. À á sɛ́ dṹnia buiↄ guu a gbɛ̃́ yenzideↄ ũɛ. 3 Ásu tɛ̃e bleo. 4 Nↄ̀ↄ pↄ́ áli sóↄn kɛ: Zu, sã, ble, 5 bana, tue, bua, sae, yaa, gbↄ, kpasaa. 6 Nↄ̀ↄ pↄ́ a swɛ paaa pla mɛ́ ì pↄbↄ a kòlou à ɛa àↄ só, àli beeↄ só. 7 Tó a swɛ paaa plao, ge ìli pↄbↄ a kòlou à ɛ̀a sòo, ásuli sóo. Ásu yiongo ge kífɛ̃nɛna ge ɛ̃́n'ui'uina soo. Aaì pↄbↄ ń kòlou aa ɛa só, ãma an swɛ paaao. À nↄ̀ↄ beeↄ tɛ̃́. 8 Sàwa swɛ paaa, kási ásu soo, asa ìli pↄbↄ a kòlou à ɛ̀a sòo. À nↄ̀ↄ beeↄ tɛ̃́. Ásu ↄkã a gɛwa seo.

9 Pↄ́ pↄ́ kú í guu, tó a ka ń tɛɛo vĩ, àli só. 10 Pↄ́ pↄ́ ka ń tɛɛo vĩ sↄ̃o, à tɛ̃́, ásuli sóo. 11 Àli bã pↄ́ wi dilɛ tɛ̃ ũoↄ só píi. 12 Bã pↄ́ áli sóoↄ tↄ́n kɛ: Yãamusu, kúu, bãso, 13 baɛ, zabã, bleaa bui píi, 14 gbagbaa bui píi, 15 koohũhũna, taataa, yaabɛɛ bui píi, 16 koo bui píi, bãyakpa, fana, 17 gáu, tɛɛpili, kpↄbↄ'ilɛna, 18 wàaliana, yaapuna bui píi, wɛlɛmbã, sasi. 19 À kↄ̀ↄ gã̀sĩadeↄ tɛ̃ píi, ásu soo, 20 a gã̀sĩade pↄ́ dɛ tɛ̃ ũoↄ bàasi. 21 Ásu pↄ́ pↄ́ gà ń azĩao soo.* Lev 17.12-15, Zĩn 15.20 À kpa bↄ̀mↄ pↄ́ kú á uawa aà so ge à yía buipãlewa. Ápiↄ, Dii á Lua gbɛ̃́ pↄ́ an kua adoaↄn á ũ. Ásuli blenɛ nↄ̀ↄ kuu ń a da yↄ̃́'ioo.† Bↄa 23.19, 34.26

22 Àliↄ á bua pↄ́wɛna kwide kpa wɛ̃ ń wɛ̃o.‡ Nao 18.21 23 Àli ble Dii á Lua aɛ gu pↄ́ a sɛ àli a sísiu, á pↄ́wɛna ń á vɛ̃ɛo ń á nísio ń á pↄtuo nɛsana sɛ̃́iaↄ, kɛ́ à e àↄ Dii á Lua vĩa vĩ gↄↄpii yã́i. 24 Tó gu pↄ́ Dii a sɛpi asu àↄ zã̀ɛ, mɛ́ á fↄ̃ sɛ à gɛò we píio báaa pↄ́ a dàágupi yã́i, 25 à yía, í gɛ́ ń a ↄ̃ao we. 26 Àli pↄ́ pↄ́ á yei lú ń ↄ̃apio, zu ge sã ge vɛ̃ɛ ge wɛ̃ ge pↄ́ pↄ́ á pↄ gbà píi, í ble Dii á Lua aɛ we à pↄnakɛò, ápiↄ ń á bɛdeↄ píi.

27 Ásu niazĩkpa Levii bui pↄ́ kú á wɛ̃́lɛuↄzio, asa aa bùsu kpaalɛsɛánↄo. 28 Àli wɛ̃̀ àaↄ̃de pↄ́ kwide kálɛ á wɛ̃́lɛↄu, 29 á wɛ̃́lɛ Levii bui pↄ́ aa bùsu kpaalɛsɛánↄoↄ ń bↄ̀mↄↄ ń nɛtonɛ pↄ́ gwana vĩoↄ ń gyaa taasideↄ aai mↄ ble aa kã́, Dii á Lua i báaadaágu zĩ pↄ́ álɛ kɛ yã́ musu píi.