Bibeli Luayãtaalá Daalɛa 49

Yakↄbu sa'olɛkɛa a nɛ́ↄnɛ

1 Yakↄbu a nɛ́ↄ sìsi, ↄ̃ à mɛ̀: À kãaamazi, mí yã́ pↄ́ a á le gbɛzã oɛ́.

2 À kↄ̃ kãaa ma nɛ́ↄ, à swã́kpa,

í á mae Isaili yãma.

3 Lubɛni ma yoa, ma gbãa,

ma gↄ̃sakɛ nɛ́ sɛ̃́ia,

n gawi ń n ikoo dɛ ń gbɛ̃́ↄla.

4 Ń pãsĩ lán ísↄ̃wa,

kási ńyↄ̃ↄ dɛńlao,

asa n dɛdɛ n da n mae wúlɛkĩia,

n gbadà ma nↄↄ dowaɛ.*

5 Simɛↄ ń Leviio mɛ́ kↄ̃gbɛ̃ↄ ũ,

aa pãsĩ ń fɛ̃ndao.

6 Ma lɛ́ kú an lɛkpaaĩ guuo,

ma bàa kúńnↄo.

Asa aa gbɛ̃́ↄ dɛ̀dɛ ń pↄkũmao,†

aa zuↄ kĩzã zↄ̃̀zↄ̃ lán kↄ̃̀ↄ yã́wa.

7 Lua láaikɛmá ń pↄkũma zↄ̃ↄ yã́i,

aà lɛkɛnɛ́ ń pↄfɛ̃ pãsĩ yã́i.

Má ń kɛ̃kↄ̃wa Yakↄbu buiↄ guuɛ,

mí ń buiↄ fãaa Isailiↄ guu.

8 Yuda, n gbɛ̃́ↄ n sáaukpa.

Ńyↄ̃ n ibɛɛↄ kṹ ń nↄ̀ɛ,

n mae nɛ́ↄ kúlɛnɛ.

9 Yuda dɛ lán nↄ̀ↄmusuwa.‡

Ma nɛ́pi ì su ń toekao,

ì gaɛ ì wúlɛ a tòou.

Démɛ a fↄ̃ aà vui?§

10 Kpala a go Yudalao,

aà buiↄ mɛ́ aaↄ lípana kũa

e kpalade àↄ mↄ́,

bui píi i misiilɛɛ̀.

11 A a zàa'ĩna dↄ vɛ̃ɛliwa,

a a zàa'ĩn nɛ́ ye vɛ̃ɛli maawa.

Vɛ̃ɛ aↄ diaàziɛ, iↄ pↄ́ píò,

iↄ a ula pí ń vɛ̃ɛbɛ'io.

12 Vɛ̃ɛ a aà wɛ́ tɛ̃akũ,

vĩ i aà swaa puakũ.

13 Zabulↄni aↄ ku ísia saɛ,

aà bùsu aↄ dɛ gó'ilɛnadↄdↄkĩi ũ.

Aà buiↄ bùsu lɛ́n Sidↄ̃ lɛ́u.

14 Isakaa dɛ lán zàa'ĩn gbãawa,

ìↄ wúlɛa asoↄ zãnguo.

15 Tó aà buiↄ è an kã́mabokĩi maa,

mɛ́ an bùsu na,

aa koo ń aso zíɛɛ, aai zↄzĩkɛnɛ́.

16 Dã a a gbɛ̃́ↄ yã́gↄ̃gↄ̃ a zɛ́wa,

aↄ dɛ Isaili buiↄ do ũ.

17 Dã buiↄ aaↄ dɛ lán mlɛ̃ pↄ́ kú zɛ́ lɛ́wa,

lán sↄ̀gbalawa zɛ́wɛwɛna saɛ.

Aa sↄ̃́ só a koewa,

sↄ̃de i bↄlɛlɛ kpaanla.

18 Dii, ma wɛ́ dↄnzi ǹ ma suaba.

19 Gada buiↄ sↄ̃, zĩgↄ̃ↄ ãnamá,

kási aali pɛ́lɛńziɛ.

20 Asɛɛ buiↄ blɛá blɛ nísideɛ,

blɛ pↄ́ dɛ kía blɛ maa ũ ↄ̃ aali kɛ ń bùsuu.

21 Nɛfatali buiↄ dɛ lán banawa sɛ̃u,

aa nɛ́ kɛfɛnaↄ i.

22 Yosɛfu buiↄ dɛ lán lí nɛ'ina pↄ́ kú nibↄna saɛwa,

aà gↄ̃naↄ fɛlɛ da gĩa fↄ̀ↄↄ.

23 Kàzunaↄ íbɛlɛsɛńnↄ,

aa ń yá ń kao.

24 Aaↄ ń sá kũa deesai

Yakↄbu Lua Gbãade sabai,

an ↄ gbãa mɛ́ a gↄ̃i vĩ

Isailiↄ Gbɛ pↄ́ ì dↄaanɛ́ yã́i.

25 N mae Luapi mɛ́ a dↄnlɛ,

Gbãapiidepi mɛ́ a báaadangu

ń lou'i pↄ́ ì bↄ musuo,

ń ɛ̀fãai pↄ́ kálɛa tↄↄlɛ zíɛo.

N nↄↄ ń n pↄ́ↄ aaↄ dɛ nɛadeↄ ũɛ.

26 Sa'olɛ pↄ́ n mae n gba

zↄ̃ↄ dɛ ma deziↄ pↄ́a,

a zↄ̃ↄ dɛ gbɛ̀sĩsĩ ziↄla.

Lua to pↄmaaↄ su Yosɛfu miwa,

asa ↄ̃mɛ bɛɛɛ vĩ a gbɛ̃́ↄ guu.

27 Bɛ̃yãmɛɛ buiↄ aaↄ dɛ

lán àwalɛwan pãsĩwa,

aa lɛ́lɛ gbɛ̃́ↄwa kↄↄ,

aai ń pↄ́ↄ naaa oosi.

28 Isaili bui mɛ̀n kuɛplaↄn we píi. Sa'olɛ pↄ́ an mae ń gbán we, baade ń a pↄ́o.

Yakↄbu gaa ń aà vĩao

29 Ɔ̃ a ònɛ́: Tó ma ã́nuatò, à ma vĩ ma deziↄ gbɛ̀'ɛ pↄ́ kú Iti bui Ɛfↄ̃nↄ bua guu. 30 Gbɛ̀'ɛpi ku Mapelaɛ, Mamale gukpɛ oi Kanaa bùsuu, bua pↄ́ Ablahaũ lù Iti bui Ɛfↄ̃nↄwa gɛvĩkĩi ũ.* 31 We wà Ablahaũ vĩ̀u ń a na Salao.† We wà Izaaki vĩ̀u ń a na Lɛbɛkao.‡ We ma Lea vĩ̀u. 32 Wà búpi ń a gbɛ̀'ɛo lù Itiↄwaɛ. 33 Kɛ́ Yakↄbu lɛ́pi dìlɛ a nɛ́ↄnɛ a làa, à ɛ̀a wùlɛ, ↄ̃ à gà.

*49:4 Daa 35.22

†49:6 Daa 34.25

‡49:9 Zia 5.5

§49:9 Nao 24.9

*49:30 Daa 23.16-17

†49:31 Daa 25.10

‡49:31 Daa 35.29