Bibeli Luayãtaalá Wɛ̃nalɛ 5

5

Wabikɛa kua ĩadamau

1 Dii, to yã́ pↄ́ wá lé dↄngu!

Gwa ǹ gwa lá wà widàwá.

2 Buipãleↄ mɛ́ gↄ̃̀ wá bùsu vĩ,

zĩ̀loↄ mɛ́ kú wá kpɛ́ↄ guu.

3 Wa gↄ̃ nɛtonɛↄ ũ desai,

wá daↄ gↄ̃̀ gyaaↄ ũ.

4 Í pↄ́ wá vĩ, wi luɛ wà gbasa mi,

baa wázĩa yàa wi ↄ̃abↄ wà luɛ sa.

5 Wá ibɛɛↄ looawála,

wa kpasa, wi ĩ́ampakĩi eo.

6 Wa ↄdↄ̀ Egipiↄ ń Asiliↄzi

kɛ́ wà blɛ e à mↄ́wá yã́i.

7 Wá maeↄ duunakɛ̀, aa ku lↄo,

ↄ̃ an tàaeↄ lɛ́ wí wá musu.

8 Zↄↄ mɛ́ lɛ́ kiblewá,

gbɛ̃e ku à wá bↄ ń ↄzĩo.

9 Wi blɛ wɛɛlɛ kai guuɛ

gbãamↄnɛde pↄ́ kú sɛ̃uↄ yã́i.

10 Wá báa wã̀ lán oo pↄ́ ditɛawa,

nↄana mↄ̀ ń mɛ̀wãa pãsĩo.

11 Wà gbãamↄ̀ wɛ̃́ndiaↄnɛ Siↄna

ń wá Yudaↄ wɛ̃́lɛↄ guuo.

12 Wà kíaↄ yèye ń ↄↄwa wà ń loo,

wi bɛɛɛ dↄ̃ maezↄ̃ↄↄnɛo.

13 Wì wísilↄgbɛ di ɛ̀waasoↄnɛ,

nɛgↄ̃ɛnaↄ lɛ́ fu yàabaaawa.

14 Gbɛ̃zↄ̃ↄↄ lí kãaa gãaɛ lↄo,

ɛ̀waasoↄ kã́mabò ń lɛsiao.

15 Wá pↄna làa,

wá ↄ̃wãa gↄ̃̀ búbuapɛa ũ.

16 Wá fùa gò wá miwa à lɛ̀lɛ,

waiyoo wápiↄ, wa duunakɛ̀.

17 Bee yã́ mɛ́ tò wá pↄ yà,

yã́ beeↄ yã́i wá wɛ́ sìsi.

18 Siↄna gbɛ̀sĩsĩ gↄ̃̀ bɛzia ũɛ,

we gbɛ̃gbonaↄ ì kìlimpau.

19 Mpi Dii, niↄ kible gↄↄpiiɛ,

n zↄ̃lɛa báawa láaa vĩo.

20 Bↄ́yãi wá yã́ ìↄ sãangui?

Ńyↄ̃ wá vũaa e wá wɛ̃ni lɛ́u yã̀?

21 Dii, to wà suma, wí su.

To wà ɛa su wá pá ziu.

22 Ge n giwázi fĩ́afĩa yã̀?

N pↄ fɛ̃̀wázi dúuduu yã̀?