Bibeli Luayãtaalá Soũↄ 7

7

Yãnakpaa, Dii!

1 Lɛ pↄ́ Davidi sì Diiɛ Bɛ̃yãmɛɛ bui Kusi yã́ musu.

2 Dii ma Lua, ma nanziɛ,

ma suaba ǹ ma bↄ gbɛ̃́ pↄ́ pɛ̀lɛmaziↄ ↄzĩ.

3 Tó màa no,

aa ma taitai lán nↄ̀ↄmusuwaɛ,

aa ma kɛ̃́kɛ̃kↄ̃ɛɛ,

gbɛ̃e a ma misio.

4 Dii ma Lua, tó ma tàaekɛ̀ɛ sↄ̃,

tó ma ↄ ku yãvãiu,

5 tó ma vãikɛ̀ ma gbɛ̃́deeɛ,

ge tó ma gbãamↄ̀ ma wɛ̀lɛɛ pã,

6 ma ibɛɛpi pɛ́lɛmazi aà ma kṹ,

i ↄ̃zↄ̃a tↄↄlɛ,

i ma tↄ́ vĩlɛ bùsu'ũfãau.

7 Fɛlɛ zɛ ń pↄfɛ̃o Dii,

fɛlɛ kpɛ̃nɛbↄbↄ ma ibɛɛↄwa.

Ǹ n mɛ sɛ́, ma Lua,

ní yã́gↄ̃gↄ̃ a zɛ́wa.

8 To gbɛ̃́ↄ kãaanzi,

ní kiblemá kua za musu.

9 Dii, ni yã́kpalɛkɛ ń gbɛ̃́ↄ.

Dii, to yã́ bↄmanↄ na ma yã́zɛde lɛ́u,

Musude, kɛmɛɛ ma nↄ̀sɛpua lɛ́u.

10 Lua, ḿmɛ ń maa,

ni nↄ̀sɛ ń làasooo yↄɛ.*

Gbɛ̃vãiↄ pãsĩkɛa midɛ,

ní gbɛ̃maaↄ gba zɛkĩi.

11 Lua Musude mɛ́ ma sɛ̀ngbao ũ,

ì nↄ̀sɛmaadeↄ suaba.

12 Lua ì yã́kpalɛkɛ a zɛ́wa,

ì to yã́ àↄ zↄ̃lɛmá gↄↄpii.

13 Tó gbɛ̃́ i nↄ̀sɛlilɛo,

Lua ì a fɛ̃nda lɛkɛ, ì a sá kã́.

14 Ì a ka gbaɛ̀,

ì a gↄ̃kɛbↄ pↄ́ ì ga inɛ́ↄ kɛkɛ.

15 Gwa, vãi ì nↄdↄ gbɛ̃́piu,

ì yãdↄnwɛia nↄsi à nɛ'iɛ̀ ɛgɛ ũ.

16 Ì ɛyↄ̃ gbɛ̃́ↄnɛ zã̀zã bai ũ,

ↄ̃ ì zu ɛ pↄ́ a yↄ̃̀pi guu.

17 Aà yãdↄnwɛia a wi aà musu,

aà gbɛ̃́ↄ wɛtãa a sↄaa aà miwa.

18 Má Dii sáaukpa aà maakɛ yã́i,

má Dii Musude tↄbↄ ń lɛsiao.

*7:10 Zia 2.23