Bibeli Luayãtaalá Soũↄ 38

38

Taaside wabikɛa

1 Davidi lɛ.

2 Dii, ńsu ma toto ń pↄfɛ̃oo,

ńsu ma lele ń pↄkũmaoo.

3 N ka ma kũ maa,

n ↄtↄ̃̀ↄlɛa.

4 Ma mɛ dáamavĩo n kpɛ̃nɛ yã́i,

ma wá aafiao ma duuna yã́i.

5 Ma tàaeↄ dàmala,

aa tↄ̃̀a lán aso gbiawa.

6 Ma bↄↄ lì fↄ̃na ũ,

aa yaikɛ̀ ma sↄũkɛ yã́i.

7 Má kooa ma gↄ̃ dↄ̀lↄlↄ,

miↄ bɛ oosisiaɛ gↄↄpii.

8 Ma wó lɛ́ wí sĩana,

ma mɛ dáamavĩo.

9 Má yɛ̃̀ɛɛ vĩo, ma mɛ kɛ̀ múɛmuɛ,

málɛ wiilɛ ma sↄ̃̀ pusubↄa yã́i.

10 Dii, ń pↄ́ pↄ́ má yei dↄ̃ píi,

ni ma wea fɛ̀ɛɛ ma sã́asã.

11 Ma sↄ̃ lɛ́ vĩ gbò gbò, ma gbãa yã̀a,

ma wɛ́ lɛ́ tɛkɛ lↄo.

12 Ma gbɛ̃naↄ ń ma gbɛ̃́ↄ ì ɛ̃mɛɛɛ,

ma daɛↄ ì zɛmɛɛ zã̀zã ma bↄ yã́i.

13 Gbɛ̃́ pↄ́ ye ma kaikɛↄ ì ma pá,

ma wɛnaↄ ì vãikpaaĩmanↄ,

aaìↄ mↄafiliyã gwa ń kↄ̃o gↄↄpii.

14 Ma gↄ̃ lán swãdowa,

mili yãmao,

ma gↄ̃ lán lɛ́nanaalɛadewa,

mili lɛwɛ̃aao.

15 Má dɛ lán gbɛ̃́ pↄ́ lí yãmaowa,

mili yã́zãsimáo.

16 Dii, ḿmɛ ma wɛ́ dↄnzi,

ńyↄ̃ ma yãma, Dii ma Lua.

17 Ma mɛ̀ ńsu to aa tidↄmalao,

ńsu to aa ĩ́anadã ma tiia guwa yã́io.

18 Ma ka lɛ́lɛa,

miↄ ku yã'ↄ̃mauɛ gↄↄpii.

19 Má a yãvãiↄ siunɛ sa,

asa ma duuna yã́i ma pↄ yaa.

20 Ma ibɛɛↄ gbãa mɛ́ aa aafia,

gbɛ̃́ pↄ́ zamagu pãↄ dasi.

21 Aaì maa fĩabomɛɛ ń vãio,

maa má tɛ́i, ↄ̃ aa íbɛlɛsɛ̀manↄ.

22 Dii, ńsu ma vũaao,

ma Lua, ńsu ǹyↄ̃ kumanↄ zã̀o.

23 Mↄ dↄmalɛ kpakpa,

ma Dii, ma Suabana.