Bibeli Luayãtaalá Soũↄ 50

50

Lousisia sĩana

Asafa lɛ.

1 Dii Lua Gbãapiide lɛ́ yã'o,

àlɛ lɛzu dṹnia gbɛ̃́ↄzi

za ĩatɛ̃bilɛkĩi e a gɛ̃kpɛukĩi.

2 Lua gawi bìlɛ Siↄna,

wɛ̃́lɛ pↄ́ a kɛfɛnkɛ bↄlɛi.

3 Wá Luapi lɛ́ mↄ́, aↄ ku kílikilio.

Tɛ́ pↄ́ ì kṹmá kú aà aɛ,

zàa pãsĩ liaaaàzi.

4 Àlɛ lɛzu musudeↄ ń zĩ́lɛdeↄzi,

kɛ́ à e yã́kpalɛkɛ ń a gbɛ̃́ↄ.

5 À mɛ̀: À ma yãmanaↄ kãaamɛɛ,

gbɛ̃́ pↄ́ ma bàa kúńnↄ sa'oaa yã́iↄ.

6 Lua mɛ́ yã́kpalɛkɛna ũ,

musudeↄ ì aà yãkɛa a zɛ́wa kpàwakɛ.

7 À ma ma gbɛ̃́ↄ, má yãvĩ mà oɛ́,

Isailiↄ, má bↄbↄánↄ,

mámɛmaa Lua á Lua.

8 Málɛ zↄadↄwá á sa'oa yã́io,

asa i sa pↄ́ wì a pↄ́ kátɛu à tɛ́kũ oa kↄ̃sↄ̃kↄ̃sↄ̃.

9 Má zuswana pↄ́ kú á kpàsau ni vĩo,

ge ble pↄ́ kú á kaau,

10 asa sɛ̃̀anↄbↄↄá ma pↄ́ↄnɛ

ń pↄtuo wai pↄ́ kú sĩ̀sĩ píi musuↄ.

11 Má gbɛ̀ musu bãↄ dↄ̃ píi,

mɛ́ sɛ̃sao pↄkelenaↄ ku ma pↄ́ ũɛ.

12 Tó nↄa lɛ́ ma dɛ, má oɛ́o,

asa mámɛ má dṹnia vĩ ń a pↄ́ↄ píi.

13 Mi zuswana nↄ̀ↄ so yã̀?

Mi blesana au mi yã̀?

14 À sa'oa ma sáaukpaa ũ,

à lɛ́ pↄ́ á kɛ̀ ma Musudewa fĩabo.

15 À lɛzumazi taasikɛgↄↄ,

mí á bↄu, í ma kpɛla.

16 Ɔ̃ Lua ò vãikɛnaↄnɛ:

Àkɛa álɛ ma yãdilɛaↄ dↄdↄi,

mɛ́ ma bàakuańnↄ yã́ dↄ á lɛ́ui?

17 Á ye ma yãdanɛio,

a ma yã́ↄ kpà kpɛ.

18 Tó a kpã́i è, i aà kɛ á gbɛ̃́ ũɛ,

mɛ́ á bàa ìↄ kú ń gbãsĩkɛnaↄ.

19 Á lɛgbɛ'i vãi,

mɛ́ i lɛnakasanɛ́.

20 I zↄ̃lɛ ń á gbɛ̃do tↄ́o,

mɛ́ i á da nɛ́ bɛ̃̀ɛbo.

21 A yã́ beeↄ kɛ̀ ↄ̃ má nílɛ.

Álɛ e má dɛáwaɛ,

ãma má zↄadↄwá, mí bↄbↄánↄ.

22 Á gbɛ̃́ pↄ́ ma yã́ sã̀águↄ

à yã́pi ma.

Tó màan sↄ̃o, má á taitai,

gbɛ̃e a e á siao.

23 Gbɛ̃́ pↄ́ sa'òa ma sáaukpaa ũ

ade ma kpɛlàɛ,

àlɛ ma gba zɛ́ mà ↄlↄɛ

lá mi gbɛ̃́ↄ suabaɛ.