Bibeli Luayãtaalá Soũↄ 59

59

Ma si ma ibɛɛↄwa

1 Lɛ pↄ́ Davidi dà gↄↄ pↄ́ Saulu gbɛ̃́ↄ zĩ̀ aa aà dã́dã aà bɛ aa aà dɛ.*

2 Ma Lua, ma si ma ibɛɛↄwa,

ma bↄ gbɛ̃́ pↄ́ fɛ̀lɛmanↄↄ guu.

3 Ma si vãikɛnaↄwa,

ma bↄ gbɛ̃dɛnaↄ ↄzĩ.

4 Gwa, aalɛ ma kpakpaɛ,

gbɛ̃́ pãsĩↄ lɛ́ sòlekɛmanↄ.

Dii, mi tàae ge duunakɛnɛ́o,

5 mi zãnɛ́ yãewao,

ↄ̃ aa kú ń naaamanↄ sↄuo.

Ma wɛgwa! Fɛlɛ mↄ dↄmalɛ!

6 Mpi Dii Lua Zĩgↄ̃de, Isailiↄ Lua,

fɛlɛ ĩada bui píiwa.

Ńsu bↄnkpɛde vãipiↄ wɛ̃nagwao.

7 Aaì ɛa su oosi lↄ, aaì wɛ̃́lɛ kɛɛlɛ,

aaì hɛ̃̀ɛkɛa lán gbɛ̃ↄwa.

8 Gwa, an lɛ́'i lɛ́ tↄ̃́,

fɛ̃na kpá ń lɛ́u.

Aaì mɛ ńlɛ ń yãmao.

9 Mpi sↄ̃ Dii, ni ń yáalↄ,

ni bui píi láanikɛ.

10 Lua ma gbãa, ma wɛ́ dↄnzi,

ḿmɛ ń ma aafia'ekĩi ũ.

11 Lua a dↄaamɛɛ a gbɛ̃kɛ guu,

a to mà tidↄ ma wɛ̀lɛpiↄla.

12 Dii wá sɛ̀ngbao, ńsu ǹ ń dɛdɛo,

kɛ́ an yã́ su sã ma gbɛ̃́ↄguo yã́i.

To aa olo'olobo,

ní ń kwɛ́ ń n gbãao.

13 Yã́ pↄ́ ì bↄ ń lɛ́uá duunaɛ.

To an tòe ń pui,

asa aaì lɛgbɛ̃ pãɛ aaì gbɛ̃́ ká.

14 Ǹ ń midɛ ń pↄkũmao,

ǹ ń bãdɛ, aasu wàↄ ku lↄo.

Gbɛ̃́ pↄ́ kú e tↄↄlɛ lɛ́waↄ i dↄ̃

Lua mɛ́ lɛ́ kible Yakↄbu buiↄwa.

15 Aaì ɛa su oosi, aaì wɛ̃́lɛ kɛɛlɛ,

aaì hɛ̃̀ɛkɛa lán gbɛ̃ↄwa.

16 Aaì liaaliaa wàↄ pↄblea wɛɛlɛ,

tó aai kão, aaì gbokɛɛ.

17 Mapi sↄ̃ má lɛsi n gbãa yã́ musu,

má gulakɛ kↄↄ n gbɛ̃kɛ yã́ musu,

asa ḿmɛ ń ma aafia'ekĩi ũ,

ḿmɛ ń ma ulɛkĩi ũ taasikɛgↄↄzĩ.

18 Lua ma gbãa, má n táasilɛ,

asa ḿmɛ ń ma aafia'ekĩi ũ,

ni gbɛ̃kɛkɛmɛɛ.

*59:1 1Sam 19.11