Bibeli Luayãtaalá Soũↄ 75

75

Lua mɛ́ yã́kpalɛkɛna ũ

1 Asafa lɛ.

2 Wa n sáaukɛ̀ Lua,

wa n sáaukɛ̀.

Tó wà n yãbↄnsaɛↄ galikɛ̀,

ń kú kãi.

3 Lua mɛ̀: Ma gↄↄdìlɛ,

má yã́kpalɛkɛ a zɛ́wa.

4 Tó dṹnia dèe, a gbɛ̃́ↄ lɛ́ kɛ sèee,

mámɛ mi a gbapɛlɛ kṹ gíũgiũ.

5 Mi o yↄ̃̀ↄdeↄnɛ aasu ń gasa fɛlɛo,

mi o vãikɛnaↄnɛ aasu káakuo.

6 Ásu à á gasa fɛlɛao,

ásu kàamai kɛmanↄo.

7 Asa gbãa lí bↄ gukpɛ ge bɛ'aɛo,

ìli bↄ guwaiwai guu no,

8 Lua mɛ́ yã́kpalɛkɛna ũ,

ↄ̃mɛ ì gbɛ̃do sↄ̃ↄlɛ, ì gbɛ̃do fɛlɛ.

9 Imibↄ ku Dii ↄzĩ, í gbãa ka a pai,

àlɛ pí aà pↄkũma ũ.

Ì kↄ́lɛ dṹnia vãikɛnaↄwa píi,

ↄ̃ aaì mi wesai ń a gbↄ̃ↄ.

10 Mapi sↄ̃ máↄ yã́pi o gↄↄpiiɛ,

mí Yakↄbu Lua táasilɛ.

11 Má vãikɛnaↄ gasa kwɛ́,

gbɛ̃maaↄ gasa iↄ ku musu.