Bibeli Luayãtaalá Soũↄ 79

79

Yelusalɛũ dɛɛlɛa wii

Asafa lɛ.

1 Lua, buipãleↄ sì ń bùsuu,

aa n kpɛ́ pↄ́ a kua adoa ↄ̃̀ↄkpà,

aa Yelusalɛũ dɛ̀ɛlɛ.*

2 Aa n zↄ̀blenaↄ dɛ̀dɛ aa ń gɛ kpà bãↄwa,

aa n yãmanaↄ gɛ tò wàiↄnɛ blɛ ũ.

3 An au bàalɛ̀ lán íwa Yelusalɛũ bĩ́i kpɛ,

gbɛ̃e ku à ń vĩo.

4 Wa gↄ̃ pↄ́ yáalↄaↄ ũ wá saɛdeↄnɛ,

láanipↄ ũ gbɛ̃́ pↄ́ liaawáziↄnɛ.

5 Dii, n pↄ aↄ paawázi e bↄɛ ni?

N kpɛ̃nɛ tɛ́ aↄ kũ gↄↄpii yã̀?

6 Pↄkũma bↄbↄ bui pↄ́ aa n dↄ̃oↄwa,

gbɛ̃́ pↄ́ aali ń sísioↄ bùsuↄwa.

7 Asa aa Yakↄbu buiↄ blè,

aa ń bùsu ↄ̃̀ↄkpàɛ.

8 Ńsu wá maeↄ duuna wi wá musuo.

Wɛ̃nadↄ̃wɛ̃ɛ kpakpa,

asa wa busa dúuduuɛ.

9 Dↄwálɛ, Lua wá Suabana.

Wá misi, kɛ́ ǹ tↄbↄ,

wá duuna kɛ̃́wá n tↄ́ yã́i.

10 Bↄ́yãi ńyↄ̃ to buipãleↄ wá lá:

Wá Lua ku máɛ la?

To buipãleↄ dↄ̃ wá aɛ,

kɛ́ ni n zↄ̀blenaↄ dɛdɛa tↄsimá.

11 To zĩ̀zↄↄ ↄↄlↄ gɛ̃ n swã́u,

gbɛ̃́ pↄ́ kú ga lɛ́zĩpiↄ bↄ

ń n gã̀sa gbãao.

12 Láani pↄ́ wá saɛdeↄ zĩ̀ma,

fĩabonɛ́ gɛ̃n sopla, Dii.

13 Wápiↄ n gbɛ̃́ↄ, n kpàsa sãↄ,

wíↄ n sáaukpa gↄↄpii,

wíↄ n tↄ́ galikɛ e wá buiwa.

*79:1 2Kia 25.8-10, Zel 52.12-14