Bibeli Luayãtaalá Soũↄ 94

94

Lua mɛ́ yã́kpalɛkɛna ũ

1 Dii á Lua pↄ́ ì tↄsimáɛ.

Lua pↄ́ ì tↄsimá, bↄ gupuau!

2 Dṹnia yã́kpalɛkɛna, fɛlɛ!

Fĩa bo ĩ́andãnaↄnɛ ń yãkɛawa.

3 Gbɛ̃vãiↄ aaↄ pↄnakɛ e bↄɛ ni?

Aaↄ tidↄwála e bↄɛ ni, Dii?

4 Vãikɛnapiↄ ì gↄ̃sagↄ̃sa yã'o,

aaì yãbↄlɛ, aaì ĩ́anadã ḿpii.

5 Dii, aaì táa'o n gbɛ̃́ↄwa,

aaì gbãamↄ gbɛ̃́ pↄ́ n ń sɛ́piↄnɛ.

6 Aaì gyaa gbɛ̃andoↄ ń bↄ̀mↄↄ dɛdɛ,

aaì tonɛ pↄ́ gwana vĩoↄ suumpa.

7 Aaì mɛ Dii lɛ́ ń eo,

Yakↄbu buiↄ Lua laai kúmáo.

8 Á sↄũↄ, à laaika!

Á mìsaideↄ, á ↄ̃nↄkũ bↄɛɛ la?

9 Lua swã́ pɛ̀, ìli yãmao lé?

À wɛ́ kàsa, ìli gu'eo lé?

10 Ì bui píi toto, a ń swã́gagaoa?

Ì yãdanɛ́, a dↄ̃a vĩoa?

11 Dii gbɛ̃nazĩna làasooↄ dↄ̃,

a dↄ̃ kɛ́ aa yãfũu lán gbɛ́ tíwa.*

12 Báaaden gbɛ̃́ pↄ́ ni toto,

ni n ikoyã dadaɛ ũ, Dii.

13 Ni aà nↄ̀sɛ daɛ̀ doũ taasikɛgↄↄ,

e wà gɛ ɛyↄ̃ vãikɛnaɛ.

14 Dii a pãkpa a gbɛ̃́ↄzio,

a gbɛ̃́ pↄ́ á sɛ̀ a pↄ́ ũↄ vũaao.

15 Wa ɛa yã́kpalɛkɛ a zɛ́wa,

nↄ̀sɛpuadeↄ i zɛò.

16 Démɛ a fɛlɛmɛɛ gbɛ̃vãiↄwai?

Démɛ a zɛmanↄ vãikɛnaↄ musui?

17 Mɛ́ i kɛ Dii dↄnlɛkɛ̀mɛɛ yãa no,

dↄ̃ má kú miau kílikili gↄ̃̀ↄ.

18 Kɛ́ ma mɛ̀ zãana lɛ́ ma sɛ́lɛ,

n ma kũ n gbɛ̃kɛ guu, Dii.

19 Kɛ́ ma làasoo kↄ̃̀ ma sↄ̃u,

n ma sↄ̃ nìnimɛɛ n ma pↄ kɛ̀na.

20 N lɛ́ líↄ ku yã́gↄ̃gↄ̃n koleaↄ yã́uo,

an yãdilɛaↄ ì mↄnɛ́ ń taasio.

21 Aaì lɛkpaaĩ gbɛ̃maazi,

aaì yãda tàaesaidea wà aà dɛ.

22 Dii mɛ́ ma zɛgikĩi ũ,

ma Lua mɛ́ gbɛsi pↄ́ mi ulɛu ũ.

23 A ń vãikɛa sↄaamáɛ,

i ń buibↄ an tàaeↄ yã́i,

Dii wá Lua a ń buibↄ.

*94:11 1Kln 3.20